Gulzor mahallasida tuman hokimining sayyor qabuli va yoshlar bilan uchrashuvi boʻlib oʻtdi

Zamonaviy bilim va koʻnikmalarga ega, mamlakatning munosib kelajagi uchun javobgarlikni oʻz zimmasiga ola biladigan barkamol, maqsadga intiluvchan va sergʻayrat yoshlarni tarbiyalash mamlakatni barqaror va ildam rivojlantirishning eng muhim shartidir. Mazkur ezgu maqsadni roʻyobga chiqarish, yoshlarning muammo va takliflarini oʻrganish maqsadida tashkil etilayotgan hokim va yoshlar uchrashuvlari yuqoridagi ustuvor vazifalarni amalga oshirishda muhim vosita boʻlib xizmat qilmoqda.

26-yanvar kuni Amudaryo tumanining Gulzor mahalla fuqarolar yigʻini binosida tuman hokimi, 1-sektor rahbari Sultonboy Yoʻldashevning sayyor qabuli va yoshlar bilan uchrashuvi boʻlib oʻtdi.

Unda tuman Xalq qabulxonasi boʻlimi mudiri Erkin Rajabov, tuman hokimi oʻrinbosari Mahmud Shermetov, Yoshlar ishlari agentligi tuman boʻlimi boshligʻi Sardor Ismailov hamda mahallaning faol yoshlari ishtirok etishdi.

Uchrashuvda tuman hokimi Sultonboy Yoʻldashev soʻnggi yillarda yoshlarning intellektual va ijodiy salohiyatini namoyon qilish, ularning fuqarolik javobgarligini va olib borilayotgan islohotlarga daxldorligini oshirish borasida ulkan ishlar amalga oshirilayotganini taʼkidladi. Shu bilan birga, joylarda yoshlarning ijtimoiy-iqtisodiy faolligini oshirishga, ularni tadbirkorlik faoliyatiga keng jalb qilishga, yosh tadbirkorlarning istiqbolli gʻoyalari va loyihalarini roʻyobga chiqarishga doir koʻplab saʼy-harakatlar amalga oshirilayotganini aytib oʻtdi.

Uchrashuvda yoshlar oʻz muammo va takliflari bilan tuman hokimiga murojaat qilishdi. Jumladan, mahallaning faol yoshlaridan Dinora Yangiboyeva oʻzining tadbirkorlik faoliyatini yoʻlga qoʻymoqchi ekanligini ammo, buning uchun boʻsh bino zarurligini aytib, tuman hokimiga murojaat qildi.

Shuningdek, yoshlardan Nilufar Tursinbayeva hamda Ozoda Berdiboyevalar oliy taʼlim muassasasida oʻqiyotganligini, ammo oilaviy sharoiti tufayli kontrakt toʻlovini toʻlash muammo boʻlayotganiligini bildirib, amaliy yordam soʻrashdi.

Mahalla yoshlaridan yana biri Dilshodbek Soatboyev esa tuman hokimiga oilaviy sharoitini, aytib haydovchilik guvohnomasini olish uchun badal pullarining qoplab berilishida amaliy yordam soʻradi.

Yoshlardan kelib tushgan murojaatlarning barchasi ijobiy hal etiladigan boʻldi. Bu boʻyicha Yoshlar ishlari agentligi tuman boʻlimi boshligʻi Sardor Ismailovga hamda Gulzor mahallasining hokim yordamchisi Akbar Rajabovga topshiriqlar berilib, ijrosi nazoratga olindi.

Yigʻilishda yoshlarning biznes tashabbuslari, Start-up gʻoyalari va loyihalarini roʻyobga chiqarishga koʻmaklashish hamda qoʻllab-quvvatlash, band boʻlmagan yoshlarni mehnat bozorida talab yuqori boʻlgan mutaxassisliklar va biznes yuritish koʻnikmalariga oʻqitish, umuman yoshlarning ijtimoiy-iqtisodiy faolligini oshirish orqali ularning bandligini taʼminlash muhim vazifalardan biri ekanligi va bu masalaga tuman hokimligi va sektor rahbariyati doimiy eʼtibor qaratishi taʼkidlandi.

Uchrashuvda tuman hokimi Sultonboy Yoʻldashev mamlakatimizda yaratilgan barcha sharoit va imkoniyatlar faqat yoshlar uchunligini taʼkidlab, ularning kelgusi ishlariga omad va zafarlar tiladi.

Tuman hokimligining Axborot xizmati