Халқ депутатлари Амударё туман Кенгашининг 58-сессияси тўғрисида ахборот

2023 йил 24 февраль куни Амударё тумани ҳокимлигининг мажлислар залида Халқ депутатлари туман Кенгашининг навбатдаги – 58-сессияси бўлиб ўтди.

Сессияни туман ҳокими — Кенгаш раиси Султонбой Йўлдашев очди ва олиб борди.

Сессияда депутатлар, сектор раҳбарлари, туман ҳокими ўринбосарлари, ҳокимлик масъул ходимлари, бўлимлар, ташкилотлар раҳбарлари ҳамда оммавий ахборот воситалари вакиллари иштирок этди.

Сессия котиблигига 3-Бойовул сайлов округидан депутат Айбек
Бегимов сайланди.

Депутатлар дастлаб Фуқаролик ишлари бўйича Амударё туман суди томонидан 2022 йил давомида одил судловни амалга ошириш борасида амалга оширилган ишлар юзасидан суд раиси Қайрулла Атамуратовнинг ахборотини тинглади.

Қайд этиб ўтилганидек, Фуқаролик ишлари бўйича Амударё тумани суди томонидан 2022 йил давомида 2788та иш кўриб тамомланган. Тамомланган ишларнинг 2122таси бўйича ҳал қилув қарорлари чиқарилган бўлиб, шундан 1988та иш бўйича даъво аризалар қаноатлантирилган ва 134та иш бўйича даъво аризалар рад этилган. 666та иш бўйича эса ажримлар чиқарилган бўлиб, 39та ҳолатда иш юритишдан тугатилган, 627та ариза кўрмасдан қолдирилган.

Сессияда Жиноят ишлари бўйича Амударё туман суди томонидан одил судловни амалга ошириш борасида амалга оширилган ишлар юзасидан ҳам суд раиси Асқар Сафаровнинг ахбороти тингланди.

Таъкидланганидек, суд томонидан жиноий ва маъмурий ишларни сифатли кўриб чиқиш ва аҳоли ўртасида ҳуқуқий тарғибот ишларини олиб бориш бўйича бир қанча ишлар амалга оширилган. Хусусан, 2022 йил давомида жами кўриб тамомланган 124 та жиноят ишидан 28 таси сайёр суд мажлисида кўрилган.

Сессия кун тартибида хатлов ўтказиш орқали аниқланган ижтимоий ҳимояга муҳтож аёлларни 4-босқич “Аёллар дафтари”га киритиш бўйича туман ҳокими ўринбосари, Оила ва хотин-қизлар бўлими бошлиғи Гўзал Сабурованинг ҳисоботи тингланди.

Ҳисоботда айтиб ўтилганидек, сектор раҳбарларининг таклифига кўра, 4-босқич “Аёллар дафтари”га жами 5 398 нафар хотин-қизлар киритилиши режалаштирилган.

Мазкур масала юзасидан Қорақалпоғистон Республикаси Вазирлар Кенгаши раиси ўринбосари, Оила ва хотин-қизлар қўмитаси бошлиғи Марям Ахмедова ўзининг таклиф ҳамда фикрларини билдирди. Таъкидланганидек, “Аёллар дафтари”га киритилган аёлларни ҳар томонлама қўллаб-қувватлаш, уларга ижтимоий, иқтисодий, психологик ёрдам кўрсатиш борасида тизимли ишлар амалга оширилиши зарур. Бунда тегишли корхона-ташкилотлар Аҳоли бандлигига кўмаклашиш маркази билан ҳамкорликда иш олиб бориб, ҳар ойда бўш иш ўринларини эълон қилиб бориши ва бунда албатта ушбу иш ўринларига “Аёллар дафтари”га киритилган аёллар жойлаштирилиши лозимлигини таъкидлади.

Сессия ишида маҳаллаларда тадбиркорликни ривожлантириш, аҳоли бандлигини таъминлаш ва камбағалликни қисқартириш бўйича келиб тушаётган мурожаатларни таҳлил қилган ҳолда ҳоким ёрдамчилари фаолиятининг натижадорлигини ўрганиш тўғрисида туман Халқ қабулхонаси бўлими мудири Эркин Ражабовнинг ахбороти тингланди.

Ахборотда келтирилишича, ҳоким ёрдамчилари томонидан 2023 йил учун режадаги 47 189та хонадондан 31 январга қадар 6 097та хонадонлар хатловдан ўтказилган.

Сессия давомида Экология ва атроф мухитни мухофаза қилиш бўлимининг биринчи даражали инспектори Ғайрат Искандаровнинг Амударё туманида экология ва атроф-муҳитни муҳофаза қилиш соҳасида 2022 йил давомида амалга оширилган ишлар юзасидан ҳисоботи тингланди.

 Келтириб ўтилганидек, 2022 йил давомида экологик назорат рейд тадбирлари давомида жами 200 та ҳуқуқбузарликлар аниқланиб, ҳуқуқбузарлик содир этган шахсларга 211,7 млн сўм миқдорда жарималар қўлланилган.

Сессия кун тартибида Амударё тумани махаллий бюджети маблағларининг 2022 йил давомида сарфланиши тўғрисида туман Молия бўлими мудири Улуғбек Бекниязовнинг ҳисоботи тингланди.

Таъкидланганидек, Амударё тумани маҳаллий бюджетнинг 2022 йил давомида даромадлар қисми режаси 81,5 млрд сўмга белгиланган бўлиб, хақиқатда 85,2 млрд сўмга, яъни 104,6 фоизга – режага нисбатан 3 млрд 718,8 минг сўмга ортиғи билан бажарилишига эришилган. Маҳаллий бюджет ва унинг ортиқча бажарилган қисми маблағлари белгиланган тартибларга асосан сарфланган.

Сессия кун тартибида “Ўзбекистон Республикаси Президентининг 2022 йил 10 сентябрдаги “Деҳқон хўжаликларини ташкил этишни қўллаб-қувватлаш орқали аҳоли даромадларини ошириш бўйича қўшимча чора-тадбирлар тўғрисида”ги қарорининг тумандаги ижроси юзасидан туман Фермер, деҳқон хўжаликлари ва томорқа ер эгалари Кенгаши раиси Илҳом Палвановнинг ҳисоботи тингланди.

Келтириб ўтилганидек, туман ҳокимлигининг захира ер фондидан умумий майдони 483,5 гектар, шундан экин майдонларини 452,6 гектар бўлган ерлар e-auksion электрон савдо плаформаси орқали аукционга қўйишга тайёрланган. Депутатлар мазкур экин майдонларини очиқ электрон танловга чиқариш бўйича тайёрланган лойиҳаларни кўриб чиқиб, тасдиқладилар.

Сессияда Кенгаш ваколатига кирувчи бошқа масалалар ҳам муҳокама қилинди. Барча масалалар атрофлича кўриб чиқилиб, туман Кенгашининг тегишли қарорлари қабул қилинди. Шунинг билан сессия ўз ишини якунлади.

Туман ҳокимлигининг Ахборот хизмати.