ЯНГИ ЎҚУВ-ҚЎЛЛАНМАЛАР ТАҚДИМОТИ ЎТКАЗИЛДИ

Ўзбекистон Республикаси Президентининг 2022 йил 2 февралда қабул қилган “Маданият ва санъат соҳасини янада ривожлантиришга доир қўшимча чора-тадбирлар тўғрисида”ги қарори аҳолига маданий дам олиш хизматларини кўрсатиш даражасини ошириш, республиканинг барча ҳудудларида театр, цирк ва бошқа турдаги оммавий-маданий ва концерт томоша тадбирларини тизимли равишда йўлга қўйиш, маданият ва санъат соҳасидаги истеъдодли ёш ижодкорларни излаб топиш ва қўллаб-қувватлаш, таълим муассасаларини миллий чолғулар, мусиқа дарсликлари, ноталар тўпламлари ва ўқув-методик адабиётлар билан таъминланишини яхшилашда муҳим асос бўлиб хизмат қилмоқда.

Қарор ижроси юзасидан олиб борилаётган саъй-ҳаракатлар Амударё туманидаги 9-сонли Болалар мусиқа ва санъат мактабида ҳам ўқув машғулотлари самарадорлиги ошишига замин яратмоқда.

Шу йилнинг 1 март куни мазкур муассасада яна бир қувончли воқеа бўлди. Юқорида қайд этилган қарорга асосан Ўзбекистон Республикаси Маданият ва туризм вазирлиги томонидан мактабга 400 донадан ортиқ янги ўқув қўлланмалар берилди. Бу ўқув қўлланмалари фойдаланишдаги аввалги ўқув қўлланмаларидан афзаллик жиҳатлари билан эътиборга сазовордир. Яъни ушбу ўқув қўлланмадан ҳар бир куй ва қўшиқни ўқувчи ўқибгина қолмай, китобда кўрсатилган штрих код орқали тинглаши ҳам мумкин. Бу ўқувчиларнинг берилган куй ва қўшиқларни яхши ўзлаштиришларига имкон беради ва айни пайтда ўқитувчи меҳнатини ҳам енгиллаштиради, дарслар самарадорлигига ижобий таъсир кўрсатади.

Шу боисдан ҳам янги китобларнинг мактабга тақдим этилиши ўқитувчилар учун ҳам, ўқувчилар учун ҳам қувонарли воқеа бўлди. Мактаб директори Йўлдошбой Абдалов барчани янги ўқув қўлланмалари билан қутлади ва ёш авлодга санъат сирларини қунт билан ўргатаётнинг устоз-мураббийлар фаолиятига муваффақиятлар тилади. Директор ўринбосари Нигора Усмонова ўқув-қўлланмаларни кутубхоначи Шаҳноза Йўлдошевага топширар экан, уларнинг муассасада таълим олаётган ўқувчиларнинг мусиқий билим ва кўникмаларини оширишда, уларнинг қалбида миллий санъатимизни ўрганишга бўлган интилиш ва иштиёқни оширишга замин бўлишини таъкидлади.

Маълумот учун: ушбу муассасада бугунги кунда 262 нафар ўқувчилар мусиқа ва санъат йўналишида 12 та йўналишида таълим олишади. Уларга 41 нафар малакали педагоглар сабоқ беришаяпти.

Шуниси эътиборлики, мазкур мактаб ўқувчилари республикадаги мусиқа ва санъат мактаблари ўқувчилари орасида ўтказилаётган турли кўрик-танловларда нуфузли ўринларни эгаллаб келишмоқда.

Янги ўқув-қўлланмалар ўқувчиларнинг мусиқий маданияти ва саводхонлигини юксалтиришда, эстетик диди ва дунёқарашини кенгайтиришга, санъатга бўлган ҳурматини оширишга хизмат қилиши шубҳасиз. Туманимиз мусиқа ва санъати ғунчалари тарбияланаётган масканда келгусида ҳам юқорида қайд этилган қарор мувофиқ ҳали кўпгина ижобий ўзгаришларга эришилади.

Ойгул РАЖАБОВА.