ИСТЕЪДОДЛИ ЁШЛАР – ЮРТИМИЗ ФАХРИ

Мамлакатимизда аҳоли, айниқса олис ҳудудларда истиқомат қиладиган фуқароларга маданий дам олиш хизматлари кўрсатиш даражасини ошириш, барча ҳудудларда театр, цирк ва бошқа турдаги оммавий-маданий ва концерт томоша тадбирларини тизимли равишда йўлга қўйиш, маданият ва санъат соҳасида истеъдодли ёш ижодкорларни излаб топиш ва қўллаб-қувватлаш, истеъдодларини намойиш этишларига шароит яратиш борасидаги амалга оширилаётган саъй-ҳаракатлар ўзининг ижобий натижаларини бераётир. Хусусан, чекка ҳудудларда фаолият юритаётган Маданият марказлари тўгаракларида фаол иштирок этаётган ёшлар орасидан турли нуфузли кўрик-танловлар ғолиблари етишиб чиқмоқда, тўгараклар аъзолари томонидан турли муҳим саналар, қутлуғ байрамлар муносабати билан ўтказилаётган маданий концерт томошалари тобора кенг аҳолини қамраб олмоқда.

Қангли овулида жойлашган Қангли Маданият маркази хусусида ҳам худди шундай фикрларни билдиришимиз мумкин. Ўтган йиллар мобайнида марказ тўгаракларининг иқтидорли иштирокчиларидан шакллантирилган бадиий жамоа туманимиз миқёсида ўтказиладиган турли байрам тадбирларида. Кўнгилочар томошаларда иштирок этишиб, чиқишлари халқимизга манзур бўлмоқда.

Айни кунда мазкур маданият марказига Ражаббой Эшбоев раҳбарлик қилмоқда. Муассаса ўз фаолиятини ҳудуддаги 67-, 29-, 39-, 61- ва 74-сонли умумий таълим мактаблари билан ҳамкорликда ташкил этган. Ушбу таълим масканларининг ўқувчи-ёшлари Маданият марказида фаолият юритаётган рубоб, бахшичилик тўгараклари, эстрада хонандалиги ва гитара тўгараклари машғулотларига фаол қатнашиб, мусиқа ва санъат соҳасида мактабларида олган билимларини мустаҳкамлаб, иқтидорларини юксалтирмоқдалар. Олимбой Эшимбетов раҳбарлигидаги рубоб, Давронбек Ендирбоев раҳбарлигидаги эстрада хонандалиги, Алишер Худойберганов раҳбарлигидаги гитара чолғуси тўгаракларида мусиқа ва санъат сирларини ўрганаётган 40 нафардан зиёд ёшларнинг йилнинг ҳар чорагидаги ҳисобот концертига соҳа ходимларидан ташқари овул аҳолиси ҳам иштирок этадилар ва концерт дастурини томоша қилиб, маданий ҳордиқ чиқарадилар.

Самандар Абдуллаев эстрада хонандалиги тўгараги аъзоси, қўшимча рассомлик, бахшичилик тўгаракларига ҳам қатнашади. 2004 йилда туғилган бу истеъдодли йигит иккинчи гуруҳ ногирони бўлишига қарамай, ўз устида тинмай ишлайди, кўп шеърлар ўқийди ва ўзига маъқул бўлганини танлаб, мустақил куй басталаб, ўзи ижро этади. Кўнглидаги қўшиққа сиғдира олмаган ҳис-туйғуларини, олам рангини бўёқларда акс эттиришга интилади.

У ўтган йили ногиронлиги бўлган ёшлар ўртасида ўтказилган “Ватан менинг нигоҳимда” номли расмлар танловининг Қорақалпоғистон Республикаси босқичи ғолиби бўлди. У асосан портрет жанрида ижод қилади. Шунингдек табиат манзараларини чизишга ҳам қизиқади.

Самандар Абдуллаев Ботир Зокиров номидаги замонавий эстрада қўшиқчилари танлови, “Ягонасан муқаддас Ватан!” қўшиқлар танлови туман босқичида ҳам муваффақиятли қатнашди ва ижроси тингловчиларга маъқул бўлди.

У ўтган йили умумий ўрта таълим мактабини тугатди, бироқ олийгоҳ талабаси бўлиш насиб этмади. Унинг мақсади санъат йўналишида олий таълим олиб, ёшларга ўргатишдир.

Унинг қизиқишларини дадаси Ёқуббой Абдуллаев, акалари ҳам ҳурмат қилишади. Боиси дадасининг ўзи санъат шинавандаси, доира, рубоб чалишдан завқ олади, фарзандларини ҳам санъатсевар қилиб тарбиялашга интилган. Бутун оила жам бўлиб ўтирган вақтларида рубоб, доира “тилга” кириб, шўх қўшиқлар янграйди, ўзлари бундан чексиз завқ олишади. Самандар учун эса бунингдай машғулотлар шунчаки қизиқиш эмас, танлаган ихтисослиги. Унинг истеъдодини имкон қадар юксалтиришга интилаётган Қангли Маданият маркази ижодий ходимлари тўгарак машғулотларини авж олдиришаяпти.

- Санъатда ўз сози, овозига эга шундай ёшлар кўплиги барча учун қувонарли, - дейди туман Маданият бўлими мутахассиси Насиба Эшчонова.

Ҳа, чинданда иқтидорли, истеъдодли ёшлар юртимиз фахри. Самандар Абдуллаевга эса ижодий баркамоллик тилаб қоламиз.

Ойгул РАЖАБОВА.