ISTEʼDODLI YoShLAR – YuRTIMIZ FAXRI

Mamlakatimizda aholi, ayniqsa olis hududlarda istiqomat qiladigan fuqarolarga madaniy dam olish xizmatlari koʻrsatish darajasini oshirish, barcha hududlarda teatr, tsirk va boshqa turdagi ommaviy-madaniy va kontsert tomosha tadbirlarini tizimli ravishda yoʻlga qoʻyish, madaniyat va sanʼat sohasida isteʼdodli yosh ijodkorlarni izlab topish va qoʻllab-quvvatlash, isteʼdodlarini namoyish etishlariga sharoit yaratish borasidagi amalga oshirilayotgan saʼy-harakatlar oʻzining ijobiy natijalarini berayotir. Xususan, chekka hududlarda faoliyat yuritayotgan Madaniyat markazlari toʻgaraklarida faol ishtirok etayotgan yoshlar orasidan turli nufuzli koʻrik-tanlovlar gʻoliblari yetishib chiqmoqda, toʻgaraklar aʼzolari tomonidan turli muhim sanalar, qutlugʻ bayramlar munosabati bilan oʻtkazilayotgan madaniy kontsert tomoshalari tobora keng aholini qamrab olmoqda.

Qangli ovulida joylashgan Qangli Madaniyat markazi xususida ham xuddi shunday fikrlarni bildirishimiz mumkin. Oʻtgan yillar mobaynida markaz toʻgaraklarining iqtidorli ishtirokchilaridan shakllantirilgan badiiy jamoa tumanimiz miqyosida oʻtkaziladigan turli bayram tadbirlarida. Koʻngilochar tomoshalarda ishtirok etishib, chiqishlari xalqimizga manzur boʻlmoqda.

Ayni kunda mazkur madaniyat markaziga Rajabboy Eshboyev rahbarlik qilmoqda. Muassasa oʻz faoliyatini hududdagi 67-, 29-, 39-, 61- va 74-sonli umumiy taʼlim maktablari bilan hamkorlikda tashkil etgan. Ushbu taʼlim maskanlarining oʻquvchi-yoshlari Madaniyat markazida faoliyat yuritayotgan rubob, baxshichilik toʻgaraklari, estrada xonandaligi va gitara toʻgaraklari mashgʻulotlariga faol qatnashib, musiqa va sanʼat sohasida maktablarida olgan bilimlarini mustahkamlab, iqtidorlarini yuksaltirmoqdalar. Olimboy Eshimbetov rahbarligidagi rubob, Davronbek Yendirboyev rahbarligidagi estrada xonandaligi, Alisher Xudoyberganov rahbarligidagi gitara cholgʻusi toʻgaraklarida musiqa va sanʼat sirlarini oʻrganayotgan 40 nafardan ziyod yoshlarning yilning har choragidagi hisobot kontsertiga soha xodimlaridan tashqari ovul aholisi ham ishtirok etadilar va kontsert dasturini tomosha qilib, madaniy hordiq chiqaradilar.

Samandar Abdullayev estrada xonandaligi toʻgaragi aʼzosi, qoʻshimcha rassomlik, baxshichilik toʻgaraklariga ham qatnashadi. 2004-yilda tugʻilgan bu isteʼdodli yigit ikkinchi guruh nogironi boʻlishiga qaramay, oʻz ustida tinmay ishlaydi, koʻp sheʼrlar oʻqiydi va oʻziga maʼqul boʻlganini tanlab, mustaqil kuy bastalab, oʻzi ijro etadi. Koʻnglidagi qoʻshiqqa sigʻdira olmagan his-tuygʻularini, olam rangini boʻyoqlarda aks ettirishga intiladi.

U oʻtgan yili nogironligi boʻlgan yoshlar oʻrtasida oʻtkazilgan “Vatan mening nigohimda” nomli rasmlar tanlovining Qoraqalpogʻiston Respublikasi bosqichi gʻolibi boʻldi. U asosan portret janrida ijod qiladi. Shuningdek tabiat manzaralarini chizishga ham qiziqadi.

Samandar Abdullayev Botir Zokirov nomidagi zamonaviy estrada qoʻshiqchilari tanlovi, “Yagonasan muqaddas Vatan!” qoʻshiqlar tanlovi tuman bosqichida ham muvaffaqiyatli qatnashdi va ijrosi tinglovchilarga maʼqul boʻldi.

U oʻtgan yili umumiy oʻrta taʼlim maktabini tugatdi, biroq oliygoh talabasi boʻlish nasib etmadi. Uning maqsadi sanʼat yoʻnalishida oliy taʼlim olib, yoshlarga oʻrgatishdir.

Uning qiziqishlarini dadasi Yoqubboy Abdullayev, akalari ham hurmat qilishadi. Boisi dadasining oʻzi sanʼat shinavandasi, doira, rubob chalishdan zavq oladi, farzandlarini ham sanʼatsevar qilib tarbiyalashga intilgan. Butun oila jam boʻlib oʻtirgan vaqtlarida rubob, doira “tilga” kirib, shoʻx qoʻshiqlar yangraydi, oʻzlari bundan cheksiz zavq olishadi. Samandar uchun esa buningday mashgʻulotlar shunchaki qiziqish emas, tanlagan ixtisosligi. Uning isteʼdodini imkon qadar yuksaltirishga intilayotgan Qangli Madaniyat markazi ijodiy xodimlari toʻgarak mashgʻulotlarini avj oldirishayapti.

- Sanʼatda oʻz sozi, ovoziga ega shunday yoshlar koʻpligi barcha uchun quvonarli, - deydi tuman Madaniyat boʻlimi mutaxassisi Nasiba Eshchonova.

Ha, chindanda iqtidorli, isteʼdodli yoshlar yurtimiz faxri. Samandar Abdullayevga esa ijodiy barkamollik tilab qolamiz.

Oygul RAJABOVA.