“Ўзбекистон – ёшлар мамлакати” шиори остида ёшлар сайли бўлиб ўтди

9 апрель куни Амударё тумани Маданият бўлими биносида “Ўзбекистон – ёшлар мамлакати” шиори остида ёшлар сайли бўлиб ўтди. Унда туманнинг овул ва маҳаллаларида истиқомат қилувчи 200 нафардан зиёд ёшлар иштирок этди. Ёшлар сайли давомида стол тенниси, шахмат-шашка каби спорт турлари доирасида мусобақалар ташкил этилди.

Шундан сўнг, соат 19:00 да туман Маданият бўлимининг томошалар залида  Ўзбекистон Республикаси Референдуми тарғиботига бағишланган йиғилиш ўтказилди ва концерт дастури намойиш этилди.

Саҳнада ўрнатилган катта экранда мамлакатимизда, хусусан Қорақалпоғистонда турли соҳаларда эришилаётган ютуқлар акс этган видеороликлар намойиш этилди. Тадбир иштирокчилари кўз ўнгида юртимизда амалга оширилаётган ислоҳотлар, улкан ўзгаришлар, ёшларнинг билим олиши, аҳолининг фаровон турмуш кечириши учун яратилаётган шароит ва имкониятлар намоён бўлди.

Тадбирда Ёшлар ишлари агентлиги Қорақалпоғистон Республикаси бошқармаси бошлиғи Полат Махсетбаев, туман ҳокими ўринбосари Маҳмуд Шерметовлар ҳам иштирок этишди.

Маълумки, шу йилнинг 18-23 март кунлари оралиғида тумандаги спортчи ёшлар ўртасида спортнинг кураш, енгил атлетика, мини футбол турлари бўйича “Наврўз кубоги” мусобақалари бўлиб ўтган эди. Тадбир давомида ушбу мусобақаларда ғолибликни қўлга киритган 41 нафар спортчи ёшларга пул мукофотлари тантанали тарзда топширилди.

Тақдирлаш маросимида Полат Махсетбаев ёшларни қўлга киритган муваффақиятлари билан самимий табриклади, уларнинг бундан кейинги фаолиятларига улкан зафарлар тилади.

Ҳоким ўринбосари Маҳмуд Шерметов ёшлар учун яратилган имкониятлардан унумли фойдаланиб юқори чўққиларни забт этаётган ёшлар туманимизнинг фахри ва ғурури эканлигини, бошқалар ҳам мазкур тенгдошларидан ўрнак олиб, бунданда юксак марраларни эгаллаши кераклигини таъкидлади.

Шундан сўнг, республикамиздаги ва тумандаги таниқли эстрада юлдузлари томонидан Ватан, она, дўстлик, севги-муҳаббатни тараннум этувчи гўзал қўшиқлар ижро этилди.

Тадбир давомида Халқ депутатлари туман Кенгаши депутати Ойбек Бегимов Конституциямизга киритилаётган янгилик ва ўзгаришлар моҳиятини шарҳлаб берди. Айниқса, Конституциявий қонун лойиҳаси юзасидан 220 мингдан ортиқ таклифлар берилган бўлса, шундан 60 фоиздан ортиғи бевосита ёшлар томонидан билдирилгани Ўзбекистонни том маънода ёшлар мамлакати дейишга асос бўлишини айтиб ўтди ва барча ёшларни умумхалқ референдумида фаол иштирок этишга чақирди.

Тадбирда “Зулфия” номидаги Давлат мукофоти соҳибаси Барно Самандарова эришган муваффақиятлари ҳақида ёшларга тўлқинланиб гапирди. Эндигина 11-синфни битказаётган Барно Самандарованинг жамият ҳаётига, юртимизда рўй бераётган ижтимоий-сиёсий жараёнларга бефарқ эмаслиги, Конституциявий қонун лойиҳаси юзасидан билдирган фикрлари унинг референдумга чорловида тўла акс этди.

Тадбир давомида ҳушовоз хонандалар томонидан ижро этилган гўзал куй-қўшиқларга ёшлар рақсга тушишди. Бир бири билан нотаниш бўлган ёшларнинг ўртасида меҳр-муҳаббат, дўстлик, она Ватанга даҳлдорлик туйғулари мана шу тадбир орқали яна мустаҳкамланди.

Тадбирда сўз олган илғор ёшлардан Қудрат Матсафоев Конституциявий қонун лойиҳаси билан илк маротаба узлуксиз таълим тизими, унинг ҳар хил турлари ва шакллари таърифланиб, давлат ва нодавлат таълим ташкилотлари ривожини таъминлаш давлатнинг вазифалари қаторидан жой олаётганини таъкидлади. У ҳам 30 апрель куни бўлиб ўтадиган референдумда барча фаол иштирок этиши лозимлигини, ҳар ким ўз келажаги учун ўзи шахсан овоз бериши лозимлигини айтиб ўтди.

Тадбирда “Ёш китобхон оила” танловининг республика босқичи ғолиблари Умидбек Ўринбоев ва Муҳаббат Давлатовалар мамлакатимизда ёшларнинг сифатли таълим олиши учун барча шароитлар яратилганини янги таҳрирдаги Конституциянинг 79-моддасида бу янада мустаҳкамлаб қўйилаётгани ёшлар учун муҳим ижобий янгилик эканлигини эътироф этишди. Яъни ушбу моддада “Давлат ёшларнинг шахсий, сиёсий, иқтисодий, ижтимоий, маданий, экологик ҳуқуқлари ҳимоя қилинишини таъминлайди, уларнинг жамият ва давлат ҳаётида фаол иштирок этишини рағбатлантиради. Давлат ёшларнинг маънавий, интеллектуал, ижодий, жисмоний ва ахлоқий жиҳатдан шаклланиши ҳамда ривожланиши учун, уларнинг таълим олишга, соғлиғини сақлашга, уй-жойга, ишга жойлашишга, бандлик ва дам олишга бўлган ҳуқуқларини амалга ошириш учун шарт-шароитлар яратади” деб белгилаб қўйилгани ёшларнинг ижтимоий-сиёсий ҳаётида муҳим аҳамият касб этади. 

Дарҳақиқат, Янгиланаётган Конституция жамиятимиз ҳаётининг барча йўналишларини комплекс тартибга солиш ҳамда мамлакатимизни демократик ривожлантириш йўлида энг муҳим ҳуқуқий пойдевор бўлиб хизмат қилади.

Туман Маданият бўлимида бўлиб ўтган ушбу тадбир ёшлар қалбида она Ватанга даҳлдорлик, ватанпарварлик, ўз оиласига, маҳалласига бўлган меҳр-муҳаббат туйғуларини мустаҳкамлагани билан янада аҳамиятли бўлди.

Туман ҳокимлигининг Ахборот хизмати.