“Oʻzbekiston – yoshlar mamlakati” shiori ostida yoshlar sayli boʻlib oʻtdi

9-aprel kuni Amudaryo tumani Madaniyat boʻlimi binosida “Oʻzbekiston – yoshlar mamlakati” shiori ostida yoshlar sayli boʻlib oʻtdi. Unda tumanning ovul va mahallalarida istiqomat qiluvchi 200 nafardan ziyod yoshlar ishtirok etdi. Yoshlar sayli davomida stol tennisi, shaxmat-shashka kabi sport turlari doirasida musobaqalar tashkil etildi.

Shundan soʻng, soat 19:00 da tuman Madaniyat boʻlimining tomoshalar zalida  Oʻzbekiston Respublikasi Referendumi targʻibotiga bagʻishlangan yigʻilish oʻtkazildi va kontsert dasturi namoyish etildi.

Sahnada oʻrnatilgan katta ekranda mamlakatimizda, xususan Qoraqalpogʻistonda turli sohalarda erishilayotgan yutuqlar aks etgan videoroliklar namoyish etildi. Tadbir ishtirokchilari koʻz oʻngida yurtimizda amalga oshirilayotgan islohotlar, ulkan oʻzgarishlar, yoshlarning bilim olishi, aholining farovon turmush kechirishi uchun yaratilayotgan sharoit va imkoniyatlar namoyon boʻldi.

Tadbirda Yoshlar ishlari agentligi Qoraqalpogʻiston Respublikasi boshqarmasi boshligʻi Polat Maxsetbayev, tuman hokimi oʻrinbosari Mahmud Shermetovlar ham ishtirok etishdi.

Maʼlumki, shu yilning 18-23-mart kunlari oraligʻida tumandagi sportchi yoshlar oʻrtasida sportning kurash, yengil atletika, mini futbol turlari boʻyicha “Navroʻz kubogi” musobaqalari boʻlib oʻtgan edi. Tadbir davomida ushbu musobaqalarda gʻoliblikni qoʻlga kiritgan 41 nafar sportchi yoshlarga pul mukofotlari tantanali tarzda topshirildi.

Taqdirlash marosimida Polat Maxsetbayev yoshlarni qoʻlga kiritgan muvaffaqiyatlari bilan samimiy tabrikladi, ularning bundan keyingi faoliyatlariga ulkan zafarlar tiladi.

Hokim oʻrinbosari Mahmud Shermetov yoshlar uchun yaratilgan imkoniyatlardan unumli foydalanib yuqori choʻqqilarni zabt etayotgan yoshlar tumanimizning faxri va gʻururi ekanligini, boshqalar ham mazkur tengdoshlaridan oʻrnak olib, bundanda yuksak marralarni egallashi kerakligini taʼkidladi.

Shundan soʻng, respublikamizdagi va tumandagi taniqli estrada yulduzlari tomonidan Vatan, ona, doʻstlik, sevgi-muhabbatni tarannum etuvchi goʻzal qoʻshiqlar ijro etildi.

Tadbir davomida Xalq deputatlari tuman Kengashi deputati Oybek Begimov Konstitutsiyamizga kiritilayotgan yangilik va oʻzgarishlar mohiyatini sharhlab berdi. Ayniqsa, Konstitutsiyaviy qonun loyihasi yuzasidan 220 mingdan ortiq takliflar berilgan boʻlsa, shundan 60 foizdan ortigʻi bevosita yoshlar tomonidan bildirilgani Oʻzbekistonni tom maʼnoda yoshlar mamlakati deyishga asos boʻlishini aytib oʻtdi va barcha yoshlarni umumxalq referendumida faol ishtirok etishga chaqirdi.

Tadbirda “Zulfiya” nomidagi Davlat mukofoti sohibasi Barno Samandarova erishgan muvaffaqiyatlari haqida yoshlarga toʻlqinlanib gapirdi. Endigina 11-sinfni bitkazayotgan Barno Samandarovaning jamiyat hayotiga, yurtimizda roʻy berayotgan ijtimoiy-siyosiy jarayonlarga befarq emasligi, Konstitutsiyaviy qonun loyihasi yuzasidan bildirgan fikrlari uning referendumga chorlovida toʻla aks etdi.

Tadbir davomida hushovoz xonandalar tomonidan ijro etilgan goʻzal kuy-qoʻshiqlarga yoshlar raqsga tushishdi. Bir biri bilan notanish boʻlgan yoshlarning oʻrtasida mehr-muhabbat, doʻstlik, ona Vatanga dahldorlik tuygʻulari mana shu tadbir orqali yana mustahkamlandi.

Tadbirda soʻz olgan ilgʻor yoshlardan Qudrat Matsafoyev Konstitutsiyaviy qonun loyihasi bilan ilk marotaba uzluksiz taʼlim tizimi, uning har xil turlari va shakllari taʼriflanib, davlat va nodavlat taʼlim tashkilotlari rivojini taʼminlash davlatning vazifalari qatoridan joy olayotganini taʼkidladi. U ham 30-aprel kuni boʻlib oʻtadigan referendumda barcha faol ishtirok etishi lozimligini, har kim oʻz kelajagi uchun oʻzi shaxsan ovoz berishi lozimligini aytib oʻtdi.

Tadbirda “Yosh kitobxon oila” tanlovining respublika bosqichi gʻoliblari Umidbek Oʻrinboyev va Muhabbat Davlatovalar mamlakatimizda yoshlarning sifatli taʼlim olishi uchun barcha sharoitlar yaratilganini yangi tahrirdagi Konstitutsiyaning 79-moddasida bu yanada mustahkamlab qoʻyilayotgani yoshlar uchun muhim ijobiy yangilik ekanligini eʼtirof etishdi. Yaʼni ushbu moddada “Davlat yoshlarning shaxsiy, siyosiy, iqtisodiy, ijtimoiy, madaniy, ekologik huquqlari himoya qilinishini taʼminlaydi, ularning jamiyat va davlat hayotida faol ishtirok etishini ragʻbatlantiradi. Davlat yoshlarning maʼnaviy, intellektual, ijodiy, jismoniy va axloqiy jihatdan shakllanishi hamda rivojlanishi uchun, ularning taʼlim olishga, sogʻligʻini saqlashga, uy-joyga, ishga joylashishga, bandlik va dam olishga boʻlgan huquqlarini amalga oshirish uchun shart-sharoitlar yaratadi” deb belgilab qoʻyilgani yoshlarning ijtimoiy-siyosiy hayotida muhim ahamiyat kasb etadi. 

Darhaqiqat, Yangilanayotgan Konstitutsiya jamiyatimiz hayotining barcha yoʻnalishlarini kompleks tartibga solish hamda mamlakatimizni demokratik rivojlantirish yoʻlida eng muhim huquqiy poydevor boʻlib xizmat qiladi.

Tuman Madaniyat boʻlimida boʻlib oʻtgan ushbu tadbir yoshlar qalbida ona Vatanga dahldorlik, vatanparvarlik, oʻz oilasiga, mahallasiga boʻlgan mehr-muhabbat tuygʻularini mustahkamlagani bilan yanada ahamiyatli boʻldi.

Tuman hokimligining Axborot xizmati.