Ойбек номли маҳаллада туман ҳокимининг ёшлар билан навбатдаги учрашуви ва сайёр қабули бўлиб ўтди

Мамлакат тараққиёти, жадал ривожланиши, муайян ютуқларга эришиши, халқнинг фаровон бўлиши шу давлат томонидан ёшлар таълим-тарбияси ва келажагига бериладиган эътиборга боғлиқ. Шунга кўра Ўзбекистонда ёшлар масаласи давлат сиёсатининг энг устувор йўналишларидан бирига айлантирилди. Бу борада мунтазам равишда ўтказилиб келинаётган ҳоким ва ёшлар учрашувлари ҳам муҳим восита бўлиб хизмат қилмоқда.

14 апрель куни Амударё тумани ҳокими, 1-сектор раҳбари Султонбой Йўлдашевнинг ёшлар билан учрашуви ва сайёр қабули бўлиб ўтди.

Ойбек маҳалласи ҳудудида жойлашган Ахборот-кутубхона марказида бўлиб ўтган учрашувда туман ҳокими Султонбой Йўлдашев, ҳоким ўринбосари Маҳмуд Шерметов, Ёшлар ишлари агентлиги туман бўлими бошлиғи Сардор Исмаиловлар ҳамда маҳалладаги 30 нафарга яқин фаол ёшлар иштирок этишди.

Йиғилишни туман ҳокими Султонбой Йўлдашев очди, ёшларни йиғилиш кун тартибидаги масала билан таништирди ва туманимизда ёшларнинг ўз иқтидорларини намойиш этишлари, ўқиб, илм олиб, мутахассислик ва касб-ҳунар эгаллашлари, юксак ахлоқий фазилатлар ва чуқур билим билан қуролланиб, юртимиз фаровонлиги йўлида меҳнат қилишлари учун яратилган имкониятлардан унумли фойдаланиб, ҳаётда ўз ўрнини топишга даъват этди. Туман ҳокими юрт корига ярайдиган, Ватани ва оиласини қадрлайдиган ёшлардан ота-онаси ҳам, Ватан ҳам рози бўлишини таъкидлади.

Расмиятчиликдан ҳоли, самимий ва очиқ руҳда кечган учрашув жараёнида ёшларга оид муҳим масалалар муҳокама қилинди.

Туман ҳокими ўринбосари Маҳмуд Шерметов ўз нутқида олдимизда турган муҳим сиёсий жараён, яъни саноқли кунлардан сўнг бўлиб ўтадиган Ўзбекистон Республикаси умумхалқ Референдуми тўғрисида батафсил маълумот бериб, барча ёшларни Референдумда ўз овози билан фаол иштирок этишга чақирди.

Шундан сўнг, ёшларнинг таклифлари, муаммолари тингланди. Ёшлар асосан ҳайдовчилик гувоҳномаси олиш учун ўқиш тўлови, фуқаролик паспорт олиш, соғлигини тиклаш бўича амалий ёрдам бериш каби масалаларда мурожаат қилишди.

Соғлиғини тиклаш учун ҳаражат пулларининг қоплаб берилиши бўйича қилинган мурожаат шу ернинг ўзида ижобий ҳал этилди.

Учрашувда ёшлар томонидан билдирилган таклиф ва мурожаатларни ижобий ҳал қилиш юзасидан тегишли идора ва ташкилотлар раҳбарларига топшириқлар берилди.

“Ҳоким ва ёшлар” учрашув йиғилишида иштирок этган ёшлар ўзларига қаратилаётган эътибордан мамнун эканликларини баён этдилар.

Туман ҳокимлигининг Ахборот хизмати.