Жўқорғи Кенгес Раиси Амударё туманида кўча бошчилари билан учрашди

“Инсонларнинг дарду ташвишларини ўйлаб яшаш – одамийликнинг энг олий мезонидир. Халқимиз ўз ҳаётида ижобий ўзгаришларни эртага эмас, узоқ келажакда эмас, айнан бугун кўриши керак”. Президентимизнинг халқ қалбидан чуқур жой олган бу сўзлари бугун мамлакатимизда барча соҳа ва тармоқларда амалга оширилаётган туб ўзгаришлар, ислоҳотлар ва янгиланишларни ҳаракатлантирувчи қудратли кучга, унинг ғоявий ўзагига айланди. Халқимизнинг ҳаётий талаб ва эҳтиёжларини таъминлаш, одамларимизни рози қилиш йўлидаги залворли ишлар айнан ана шундай эзгу ва ҳаётбахш ғоялар асосида олиб борилиб, тобора янги маъно ва мазмун билан бойиб бормоқда.

Юртимизда бундай тарихий ўзгаришлар силсиласида халқ билан мулоқот қилиш, мурожаатлар билан ишлаш бўйича тамомила янги тизимга асос солингани ҳам айни ҳақиқат. Бунда айниқса, халқ билан юзма-юз мулоқот қилиш, муаммоларини тинглаш ва уларга ечим топиш мақсадида бўлиб ўтаётган учрашувлар, сайёр қабуллар, давра суҳбатлари муҳим аҳамият касб этмоқда.

17 апрель куни Қорақалпоғистон Республикаси Жўқорғи Кенгеси Раиси Аманбай Оринбаевнинг Амударё туманида маҳаллалардаги кўча бошчилари билан учрашуви бўлиб ўтди.

Учрашувда туман ҳокими Султонбой Йўлдашев, секторлар раҳбарлари, ҳоким ўринбосарлари, тегишли ташкилот мутасаддилари, маҳалла раислари, кўча бошчилари ҳамда оммавий ахборот воситалари вакиллари иштирок этишди.

Учрашувда Қорақалпоғистон Республикаси Жўқорғи Кенгеси Раиси Аманбай Оринбаев муҳтарам Президентимиз бошчилигида ҳудудларни ижтимоий-иқтисодий ривожлантириш бўйича амалга оширилаётган ислоҳотлар, кенг кўламли қурилиш ва ободонлаштириш ишлари ҳақида батафсил маълумот берди.

Шу билан бирга муҳтарам Президентимизнинг 30 март куни Қорақалпоғистон Республикасига қилган сафари давомида маҳаллалар инфратузилмасини янада яхшилаш, ишлаб чиқариш ва хизмат кўрсатишни ривожлантириш йўналишларида бажарилиши лозим бўлган муҳим топшириқлар хусусида сўз юритди.

Жўқорғи Кенгес Раиси кўча бошчиларига мурожаат қилар экан, уларнинг халқимиз ҳаётида муносиб ўринга эгалиги, ўзларининг ибратга тўла насиҳатлари билан оилалар турмуши фаровон бўлишига, ёшларнинг маънавиятли ва мърифатли бўлишига ўз ҳиссаларини қўшиб келаётганини айтиб ўтди. Шунингдек, маҳаллалардаги мавжуд энг долзарб муаммоларни шу маҳалла аҳолиси кўча бошчиси атрофида бирлашган ҳолда кўтариб чиқиши лозимлигини таъкидлади.

Президентимиз эндиликда маҳаллаларни ривожлантириш учун дастлаб ҳар бир маҳаллага 500 млн. сўм пул маблағи ажратилишини, кейинчалик эса унданда кўпроқ маблағ ажратилишини айтган эди. Президентмиз маҳалла аҳлининг ўзи тегишли маҳалладаги муаммоларни аниқлаши ва ушбу маблағларни мазкур муаммоларни ҳал қилишга ишлатиши лозимлигини ҳам таъкидладилар. Ушбу жараёнларда маҳалла аҳлининг бир-бири билан аҳиллиги, оғизбирчилиги муҳим аҳамиятга эга.

Дарҳақиқат, ёши улуғ нуронийлар, кўча бошчиларининг маҳалла аҳлини бирдамликка, оғизбирчиликка ўргатиш, оилалар тинчлиги, ёшлар тарбиясини мустаҳкамлашдаги роли жуда муҳимдир. Улар ўзларининг бой ҳаётий тажрибалари асосида ўз маҳалласининг маслаҳагўйи, суянчиғи бўлиб келган ва шундай бўлиб қолади.

Учрашувда кўча бошчилари томонидан маҳаллаларни обод қилиш ва халқимизга муносиб турмуш шароитини яратиш бўйича бир қанча мурожаат ва таклифлар илгари сурилди.

Жўқорғи Кенгес Раиси Аманбай Оринбаев ушбу мурожаат ва таклифлар тез орада ечим топишини билдириб ўтди.

Расмиятчиликдан ҳоли, самимий ва очиқ мулоқот тарзида бўлиб ўтган учрашув кўча бошчилари ўзларига билдирилган юксак эътироф ва ишончдан мамнун эканлигини изҳор қилдилар.

Туман ҳокимлигининг Ахборот хизмати.