Joʻqorgʻi Kenges Raisi Amudaryo tumanida koʻcha boshchilari bilan uchrashdi

“Insonlarning dardu tashvishlarini oʻylab yashash – odamiylikning eng oliy mezonidir. Xalqimiz oʻz hayotida ijobiy oʻzgarishlarni ertaga emas, uzoq kelajakda emas, aynan bugun koʻrishi kerak”. Prezidentimizning xalq qalbidan chuqur joy olgan bu soʻzlari bugun mamlakatimizda barcha soha va tarmoqlarda amalga oshirilayotgan tub oʻzgarishlar, islohotlar va yangilanishlarni harakatlantiruvchi qudratli kuchga, uning gʻoyaviy oʻzagiga aylandi. Xalqimizning hayotiy talab va ehtiyojlarini taʼminlash, odamlarimizni rozi qilish yoʻlidagi zalvorli ishlar aynan ana shunday ezgu va hayotbaxsh gʻoyalar asosida olib borilib, tobora yangi maʼno va mazmun bilan boyib bormoqda.

Yurtimizda bunday tarixiy oʻzgarishlar silsilasida xalq bilan muloqot qilish, murojaatlar bilan ishlash boʻyicha tamomila yangi tizimga asos solingani ham ayni haqiqat. Bunda ayniqsa, xalq bilan yuzma-yuz muloqot qilish, muammolarini tinglash va ularga yechim topish maqsadida boʻlib oʻtayotgan uchrashuvlar, sayyor qabullar, davra suhbatlari muhim ahamiyat kasb etmoqda.

17-aprel kuni Qoraqalpogʻiston Respublikasi Joʻqorgʻi Kengesi Raisi Amanbay Orinbayevning Amudaryo tumanida mahallalardagi koʻcha boshchilari bilan uchrashuvi boʻlib oʻtdi.

Uchrashuvda tuman hokimi Sultonboy Yoʻldashev, sektorlar rahbarlari, hokim oʻrinbosarlari, tegishli tashkilot mutasaddilari, mahalla raislari, koʻcha boshchilari hamda ommaviy axborot vositalari vakillari ishtirok etishdi.

Uchrashuvda Qoraqalpogʻiston Respublikasi Joʻqorgʻi Kengesi Raisi Amanbay Orinbayev muhtaram Prezidentimiz boshchiligida hududlarni ijtimoiy-iqtisodiy rivojlantirish boʻyicha amalga oshirilayotgan islohotlar, keng koʻlamli qurilish va obodonlashtirish ishlari haqida batafsil maʼlumot berdi.

Shu bilan birga muhtaram Prezidentimizning 30-mart kuni Qoraqalpogʻiston Respublikasiga qilgan safari davomida mahallalar infratuzilmasini yanada yaxshilash, ishlab chiqarish va xizmat koʻrsatishni rivojlantirish yoʻnalishlarida bajarilishi lozim boʻlgan muhim topshiriqlar xususida soʻz yuritdi.

Joʻqorgʻi Kenges Raisi koʻcha boshchilariga murojaat qilar ekan, ularning xalqimiz hayotida munosib oʻringa egaligi, oʻzlarining ibratga toʻla nasihatlari bilan oilalar turmushi farovon boʻlishiga, yoshlarning maʼnaviyatli va mʼrifatli boʻlishiga oʻz hissalarini qoʻshib kelayotganini aytib oʻtdi. Shuningdek, mahallalardagi mavjud eng dolzarb muammolarni shu mahalla aholisi koʻcha boshchisi atrofida birlashgan holda koʻtarib chiqishi lozimligini taʼkidladi.

Prezidentimiz endilikda mahallalarni rivojlantirish uchun dastlab har bir mahallaga 500 mln. soʻm pul mablagʻi ajratilishini, keyinchalik esa undanda koʻproq mablagʻ ajratilishini aytgan edi. Prezidentmiz mahalla ahlining oʻzi tegishli mahalladagi muammolarni aniqlashi va ushbu mablagʻlarni mazkur muammolarni hal qilishga ishlatishi lozimligini ham taʼkidladilar. Ushbu jarayonlarda mahalla ahlining bir-biri bilan ahilligi, ogʻizbirchiligi muhim ahamiyatga ega.

Darhaqiqat, yoshi ulugʻ nuroniylar, koʻcha boshchilarining mahalla ahlini birdamlikka, ogʻizbirchilikka oʻrgatish, oilalar tinchligi, yoshlar tarbiyasini mustahkamlashdagi roli juda muhimdir. Ular oʻzlarining boy hayotiy tajribalari asosida oʻz mahallasining maslahagoʻyi, suyanchigʻi boʻlib kelgan va shunday boʻlib qoladi.

Uchrashuvda koʻcha boshchilari tomonidan mahallalarni obod qilish va xalqimizga munosib turmush sharoitini yaratish boʻyicha bir qancha murojaat va takliflar ilgari surildi.

Joʻqorgʻi Kenges Raisi Amanbay Orinbayev ushbu murojaat va takliflar tez orada yechim topishini bildirib oʻtdi.

Rasmiyatchilikdan holi, samimiy va ochiq muloqot tarzida boʻlib oʻtgan uchrashuv koʻcha boshchilari oʻzlariga bildirilgan yuksak eʼtirof va ishonchdan mamnun ekanligini izhor qildilar.

Tuman hokimligining Axborot xizmati.