“ХАЛҚ КОНСТИТУЦИЯСИ БИЛАН ХАЛҚЧИЛ ДАВЛАТ САРИ!” ШИОРИ ОСТИДА ТАРҒИБОТ ТАДБИРИ ЎТКАЗИЛДИ

Амударё туманида Республика тарғиботчилар гуруҳи иштирокида референдумда фаол бўлишга чорловчи “Халқ Конституцияси билан халқчил давлат сари!” шиори остида маънавий-маърифий тарғибот тадбирлари ташкил этилди.

18 апрель куни Республика Маънавият ва маърифат маркази томонидан ташкил қилинган ушбу тадбир дастлаб Дарёбўйи маҳалласидаги 21-сонли Болалар мусиқа ва санъат мактабида ўтказилди. “Инсон қадри устувор бўлган юртда ривожланиш бўлади” номли мусиқий-бадиий тадбирда 140 нафардан зиёд амударёликлар иштирок этишди. Улар Республикадан ташриф буюрган санъаткорлар ижросидаги Ватан, тинчлик ҳақидаги куй-қўшиқларни тинглаб, томоша қилишди. Элимиз суйган санъаткорларнинг чиқишлари тадбир иштирокчиларига жуда катта завқ бағишлади.

Тадбир давомида Республикадан ташриф буюрган тарғиботчилар гуруҳи Дарё бўйи маҳалласида яшовчи боқувчисини йўқотган Фазилат Матёқубова хонадонига ташриф буюриб, оила ҳолидан хабар олишди ва уларга ҳомийлик ёрдамларини кўрсатишди.

Куннинг иккинчи ярмида тадбирлар туман Маданият бўлимининг концертлар залида давом эттирилди. Унда Республика тарғиботчилар гуруҳи “Халқ Конституцияси билан халқчил давлат сари!” мавзусида янги қабул қилиниши режалаштирилган Конституция маъно-мазмуни, хотин қизлар, ёшлар ва аҳолини қўллаб-қувватлаш бўйича киритилаётган ўзгаришлар, янги нормалар билан таништиришди.

Ҳар бир мамлакат Конституцияси унинг сиёсий-ҳуқуқий тафаккурининг юксак намунаси эканлигини айтиб, сўнгги йилларда мамлакатимизда Янги Ўзбекистонни қуриш йўлида салмоқли ютуқларга эришилгани, Конституцияга ўзгартишлар киритиш бўйича бўлиб ўтадиган референдум мамлакатимизнинг замонавий тарихида муҳим сиёсий воқеа эканини алоҳида эътироф этишди.

Тадбирда Асосий қонун лойиҳасини тайёрлаш жараёнида фуқароларнинг фаол иштирок этгани ва Бош қонунимиз мамлакат ҳаётининг барча жабҳаларида кечаётган туб ўзгаришларнинг узвий қисми эканлиги, уларнинг мустаҳкам ҳуқуқий асосини яратиши ҳамда жамиятдаги бугунги реал воқеликка ва шиддатли ислоҳотларга мослаштирилгани тўғрисида батафсил тушунчалар, маълумотлар берилди.

Янги таҳрирдаги Конституция чинакам халқпарвар давлатчилик асосларини яратиши, аҳоли фаровонлигини ошириши, инсон ҳуқуқ ва манфаатлари, қадр-қимматини янада юксалтириши ҳамда жамият ҳаётининг барча соҳаларида муҳим омил бўлиши, асосийси Янги Ўзбекистон тараққиётида янги даврни бошлаб бериши алоҳида таъкидланди.

Зулфия номли Давлат мукофоти совриндори, амударёлик Барно Самандарова ҳам Конституциявий қонун лойиҳасида ёшларга оид янги нормалар белгиланаётганидан янда руҳлангани ҳақида сўзлади. Шунингдек, янги таҳрирдаги Конституцияда давлат ёшларнинг шахсий, сиёсий, иқтисодий, ижтимоий, маданий, экологик ҳуқуқлари ҳимоя қилинишини таъминлаши, уларнинг жамият ва давлат ҳаётида фаол иштирок этишини рағбатлантириши ҳақидаги нормалар киритилганини айтиб ўтди. Республиканинг энг чекка ҳудудидан бўлишига қарамасдан, ушбу мукофотни олишга муваффақ бўлгани ёшларга қаратилган эътиборни ёрқин далили эканлигини фахр билан эътироф этди.

 Тадбирда Республикадан ташриф буюрган таниқли санъаткорлар ва туман Маданият бўлими хонандалари томонидан мусиқий дастур намойиш этилиб, иштирокчиларга байрамона кайфият улашилди.

О.Худойберганова.