“ҲАМШИРА - 2023” ТАНЛОВИНИНГ ТУМАН БОСҚИЧИ ЎТКАЗИЛДИ

Юртимизда аҳоли соғлиғини сақлаш борасидаги устувор вазифаларни амалга ошириш борасида қатор ислоҳотлар жорий этилмоқда. Давлатимиз раҳбарининг “Соғлиқни сақлаш тизимида олиб борилаётган ислоҳотларни изчил давом эттириш ва тиббиёт ходимларининг салоҳиятини ошириш учун зарур шарт-шароитлар яратиш тўғрисида”ги Фармони бу борада амалга оширилаётган ишларни янги босқичга кўтаришга асос бўлаётир.

Фармонга мувофиқ оилавий шифокор пунктлари ва оилавий поликлиникаларда “Тиббиёт бригадалари” фаолияти йўлга қўйилди. Чекка ҳудудлар аҳолисига ҳам сифатли тиббий хизмат кўрсатиш қамровини ошириш учун “Тиббиёт бригадалари”даги бир нафар шифокор ва малакали ўрта тиббиёт ходимлари зиммасига муаяйн мажбуриятларни ҳам юклайди.

Умуман, ҳамширалик иши аҳолига малакали ва сифатли тиббий хизмат кўрсатилишида муҳим ўрин тутади. Боиси, нафақат муолажаси, балки маданиятли муомаласи, ширин сўзи билан ҳам беморлар кўнглида соғайишига умид уйғотиб, далда бўлувчи касб эгалари ҳамширалардир. Шунинг учун ҳам уларнинг касбий маҳоратини, тиббий билимларини ошириб боришига рағбатлантириш мақсадида ҳар йили ҳамширалар танловини ўтказиш анъанага айланган.

19 апрель куни Амударё тумани Тиббиёт бирлашмаси кўптармоқли марказий поликлиникаси мажлислар залида “Ҳамшира – 2023” кўрик-танловининг туман босқичи бўлиб ўтди.

Қорақалпоғистон Республикаси Соғлиқни сақлаш вазирлиги, Ўзбекистон Республикаси Соғлиқни сақлаш ходимлари касаба уюшмаси Қорақалпоғистон Республикаси Кенгаши қарорига асосан барча туманларда ўтказилаётган бунингдек тадбирлар тиббиёт бирлашмаларида, даволаш-профилактика муассасаларида меҳнат қилаётган ўрта таббиёт ва фармацевтика ходимларининг ўз касбий малака ва билимларини намоён этадиган минбари бўлмоқда, дейиш мумкин. Шунингдек, улар орасида ўзаро дўстлик алоқаларини мустаҳкамлаш, ўз касбига масъулиятини ошириш, улар орасида соғлом рақобат муҳити шаклланишига ҳам ижобий таъсир кўрсатади.

Кўрик-танловда туман Тиббиёт бирлашмаси ва унга қарашли тиббий муассасаларда фаолият юритаётган 5 нафар иқтидорли ва тажрибали ҳамширалар иштирок этдилар. Уларнинг касбий фаолиятига доир билими ва маҳорати тажрибали шикофорлар томонидан ҳаққоний баҳолаб борилди.

Туман Тиббиёт бирлашмасининг Реанимация бўлими ҳамшираси Муҳайё Жумамуродова танловнинг туман босқичи ғолиби деб топилди ва “Ҳамшира – 2023” кўрик-танловининг Қорақалпоғистон Республикаси босқичида иштирок этиш ҳуқуқини қўлга киритди.

Барча иштирокчилар – Комила Ҳайитбоева, Нодира Солиева, Муҳайё Жумамуродова, Шаҳноза Жумабоева, Динора Йўлдошеваларнинг танловдаги иштироки юқори баҳоланди ва рағбатлантирилди.

Туманимизда беморлар дардига малҳам бўлишдек машаққатли касбда меҳнат қилаётган 1463 нафар ўрта тиббиёт ходимлари туман Тиббиёт бирлашмаси, марказий шифохона, кўп тармоқли марказий поликлиника ҳамда 9 та оилавий поликлиника, 4 та оилавий шифокорлик пунктлари ходимларидир. Уларнинг 156 нафари олий, 212 нафари биринчи, 375 нафари эса иккинчи тоифали ҳамширалардир.

Ўтказилган танлов уларни ўз касбида сидқидилдан меҳнат қилишга, ўқиб-изланишга ва касбий маҳоратини ошириб боришга рағбатлантирди.

Ойгул РАЖАБОВА.