ИСТЕЪДОДЛИ ХОНАНДА РАҲМАТЖОН

Амударёда истеъдодли ёшлар кўп. Спорт, санъат, шеърият, илм-фан ва бошқа йўналишларда ўз иқтидорини намоён этиб келаётган, элимиз фахрига айланган қобилият эгалари диёримизни дунёга танитмоқда. Бугунги кунда бири чемпион, бири шоира, бири санъаткор, яна бири билимдон ва зукко бўлган ёшларга ҳавас қилиб, орзу-мақсадлари йўлида интилаётган йигит-қизлар сафи ортаётгани жуда қувонарли.

Санъат оламига эндигина қадам қўйган, ўзининг муаллифлигидаги қўшиқлари билан элимизда танила бошлаётган созанда ва хонанда Раҳматжон Ўрозимбетов ҳам истеъдодли ёшлардан. У айни пайтда Чойкўл овулидаги Маданият марказида эстрада тўгараги раҳбари бўлиб ишлайди. Раҳматжон ижросидаги халқона қўшиқлар аллақачон ўз мухлисларини топган. Хушовоз хонанданинг чиқишлари, нафақат ёшлар, балки катталарга ҳам жуда манзур бўлмоқда.

Раҳматжон 1995 йилда Қипчоқ овулида таваллуд топган. Унинг санъатга, мусиқага қизиқишига дадаси Олламберган ака сабабчи бўлди. Кўпинча оила даврасида ўтиришганида Олламберган ака доира чалар, бундай лаҳзалар улар учун жуда завқли эди. Доирани яхшигина чаладиган Олламберган акани тўй-ҳашамларга хизматга тез-тез чақириб туришар, гоҳида катта фарзанд Раҳматжон ҳам унга эргашарди. Шунданми, у кичиклигидан соз чалишга ҳавасманд бўлди. Овулдаги 18-сонли мактабда ўқий бошлаган Раҳматжоннинг энг севимли дарслари қаторига мусиқа дарси ҳам қўшилди. Мусиқа ўқитувчиси Эркабой Хўжаниёзов ундаги истеъдодни пайқаб, алоҳида шуғуллана бошлади.

Раҳматжоннинг қўнғироқдек овози борлиги учун унга мусиқага мослаб қўшиқ куйлашни ҳам ўргата бошлади. Кейинчалик унинг қўшиқлари мактабдаги тадбирларда янграй бошлади. Ота-онаси ҳам фарзандидаги қизиқишга қараб, унинг овулдаги 21-сонли Болалар мусиқа ва санъат мактабига тўгарак машғулотларига қатнашишига имконият яратишди. Мусиқа мактабига 3-синфлигидан қатнай бошлаган истеъдодли Раҳматжон 9-синфга қадар устози Тўлибой Ҳайитбоевдан доира, сурнай ва қўшнай чалишни мукаммал ўрганиб олди. Шу пайтларда турли кўрик-танловларда, тадбирларда фаол қатнашди, совринли ўринларни қўлга киритиб, барча яқинларини янада қувонтирди.

Раҳматжон учун мусиқа ҳаёт мазмунига айланди. У 9-синфни тугатганидан сўнг, Элликқалъа туманидаги Отажон Худойшукуров номли Санъат ва педагогика коллежида анъанавий чолғу ижрочилиги йўналишида таҳсил олди. Ушбу масканда боломон ва кларнетда ҳам куй чалишни ўрганди. Маҳоратли устозлардан санъат оламининг сир-асрорларини тўлиқ билиб олишга ҳаракат қилди.

Маромига етказиб чалган наволари, хуш овозда куйлаган қўшиқлари эл назарига туша бошлаган Раҳматжон 2018 йилда таҳсилни Ажиниёз номидаги Нукус Давлат педагогика институтида мусиқий таълим йўналишида давом эттирди. Ўқишни тугатгунича санъат соҳасида кўзга кўринишга улгурган ёш истеъдод эгаси туманга келганидан сўнг, Чойкўл маданият марказида иш бошлади. Ўз устида ишлашда давом этаётган Раҳматжон ўзининг муаллифлигида қатор қўшиқлар яратди. Айниқса, элликқалъалик шоир Хурсанд Каримов қаламига мансуб “Ҳаётимсан”, Ёқди мани”, қўшиқлари, элимиздаги ҳаваскор ижодкорлар шеърларидан яратган “Амударё қизлари”, “Дўстим” деб номланган қўшиқлари мухлисларига жуда манзур бўлди.

Ҳозирги кунда эстрада йўналишида 20 нафарга яқин ёшларга мусиқадан сабоқ бериб келаётган ёш хонанданинг келгусидаги режалари катта. У мутоз йўналишда ҳам қўшиқ куйлаб, ўз репертуарини янада бойитиш, хилма-хил мавзуларда халқнинг дилидан жой оладиган кўплаб қўшиқлар яратиш ниятида.

Мамлакатимизда ёшлар камолоти йўлида яратилаётган чексиз имкониятлардан унумли фойдаланётган Раҳматжон сингари ёшлар жамиятда ўз ўрнини топишга, мақсади сари интилиб, халққа нафи тегадиган инсонлар бўлишга ҳаракат қилишмоқда. Эндигина элга танилаётган ёш хонанда юрт хизматида бўлиб, халқимиз эътирофига сазовор бўлишни энг катта бахт деб билади.

Озода Худойберганова.