ISTEʼDODLI XONANDA RAHMATJON

Amudaryoda isteʼdodli yoshlar koʻp. Sport, sanʼat, sheʼriyat, ilm-fan va boshqa yoʻnalishlarda oʻz iqtidorini namoyon etib kelayotgan, elimiz faxriga aylangan qobiliyat egalari diyorimizni dunyoga tanitmoqda. Bugungi kunda biri chempion, biri shoira, biri sanʼatkor, yana biri bilimdon va zukko boʻlgan yoshlarga havas qilib, orzu-maqsadlari yoʻlida intilayotgan yigit-qizlar safi ortayotgani juda quvonarli.

Sanʼat olamiga endigina qadam qoʻygan, oʻzining muallifligidagi qoʻshiqlari bilan elimizda tanila boshlayotgan sozanda va xonanda Rahmatjon Oʻrozimbetov ham isteʼdodli yoshlardan. U ayni paytda Choykoʻl ovulidagi Madaniyat markazida estrada toʻgaragi rahbari boʻlib ishlaydi. Rahmatjon ijrosidagi xalqona qoʻshiqlar allaqachon oʻz muxlislarini topgan. Xushovoz xonandaning chiqishlari, nafaqat yoshlar, balki kattalarga ham juda manzur boʻlmoqda.

Rahmatjon 1995-yilda Qipchoq ovulida tavallud topgan. Uning sanʼatga, musiqaga qiziqishiga dadasi Ollambergan aka sababchi boʻldi. Koʻpincha oila davrasida oʻtirishganida Ollambergan aka doira chalar, bunday lahzalar ular uchun juda zavqli edi. Doirani yaxshigina chaladigan Ollambergan akani toʻy-hashamlarga xizmatga tez-tez chaqirib turishar, gohida katta farzand Rahmatjon ham unga ergashardi. Shundanmi, u kichikligidan soz chalishga havasmand boʻldi. Ovuldagi 18-sonli maktabda oʻqiy boshlagan Rahmatjonning eng sevimli darslari qatoriga musiqa darsi ham qoʻshildi. Musiqa oʻqituvchisi Erkaboy Xoʻjaniyozov undagi isteʼdodni payqab, alohida shugʻullana boshladi.

Rahmatjonning qoʻngʻiroqdek ovozi borligi uchun unga musiqaga moslab qoʻshiq kuylashni ham oʻrgata boshladi. Keyinchalik uning qoʻshiqlari maktabdagi tadbirlarda yangray boshladi. Ota-onasi ham farzandidagi qiziqishga qarab, uning ovuldagi 21-sonli Bolalar musiqa va sanʼat maktabiga toʻgarak mashgʻulotlariga qatnashishiga imkoniyat yaratishdi. Musiqa maktabiga 3-sinfligidan qatnay boshlagan isteʼdodli Rahmatjon 9-sinfga qadar ustozi Toʻliboy Hayitboyevdan doira, surnay va qoʻshnay chalishni mukammal oʻrganib oldi. Shu paytlarda turli koʻrik-tanlovlarda, tadbirlarda faol qatnashdi, sovrinli oʻrinlarni qoʻlga kiritib, barcha yaqinlarini yanada quvontirdi.

Rahmatjon uchun musiqa hayot mazmuniga aylandi. U 9-sinfni tugatganidan soʻng, Ellikqalʼa tumanidagi Otajon Xudoyshukurov nomli Sanʼat va pedagogika kollejida anʼanaviy cholgʻu ijrochiligi yoʻnalishida tahsil oldi. Ushbu maskanda bolomon va klarnetda ham kuy chalishni oʻrgandi. Mahoratli ustozlardan sanʼat olamining sir-asrorlarini toʻliq bilib olishga harakat qildi.

Maromiga yetkazib chalgan navolari, xush ovozda kuylagan qoʻshiqlari el nazariga tusha boshlagan Rahmatjon 2018-yilda tahsilni Ajiniyoz nomidagi Nukus Davlat pedagogika institutida musiqiy taʼlim yoʻnalishida davom ettirdi. Oʻqishni tugatgunicha sanʼat sohasida koʻzga koʻrinishga ulgurgan yosh isteʼdod egasi tumanga kelganidan soʻng, Choykoʻl madaniyat markazida ish boshladi. Oʻz ustida ishlashda davom etayotgan Rahmatjon oʻzining muallifligida qator qoʻshiqlar yaratdi. Ayniqsa, ellikqalʼalik shoir Xursand Karimov qalamiga mansub “Hayotimsan”, Yoqdi mani”, qoʻshiqlari, elimizdagi havaskor ijodkorlar sheʼrlaridan yaratgan “Amudaryo qizlari”, “Doʻstim” deb nomlangan qoʻshiqlari muxlislariga juda manzur boʻldi.

Hozirgi kunda estrada yoʻnalishida 20 nafarga yaqin yoshlarga musiqadan saboq berib kelayotgan yosh xonandaning kelgusidagi rejalari katta. U mutoz yoʻnalishda ham qoʻshiq kuylab, oʻz repertuarini yanada boyitish, xilma-xil mavzularda xalqning dilidan joy oladigan koʻplab qoʻshiqlar yaratish niyatida.

Mamlakatimizda yoshlar kamoloti yoʻlida yaratilayotgan cheksiz imkoniyatlardan unumli foydalanyotgan Rahmatjon singari yoshlar jamiyatda oʻz oʻrnini topishga, maqsadi sari intilib, xalqqa nafi tegadigan insonlar boʻlishga harakat qilishmoqda. Endigina elga tanilayotgan yosh xonanda yurt xizmatida boʻlib, xalqimiz eʼtirofiga sazovor boʻlishni eng katta baxt deb biladi.

Ozoda Xudoyberganova.