AZIZA – ISTEʼDODLI IJODKOR, UMIDLI JURNALIST

Isteʼdod insonga beriladigan ilohiy inʼomdir. Bunday inʼom tuhfa etilgan ijodkor oʻz tiliga, uslubiga, qalamiga ega boʻladi. Uning har bir ijod mahsuli bilan tanishgan odam oʻz dardini, hayotini va hech kimga aytmagan sirini koʻradi. Haqiqiy isteʼdod egasi hammani qiziqtiradigan mavzuni topa biladi, hech kim koʻrmagan narsalarni ilgʻay oladi va barchasini tafakkuridan oʻtkazib, koʻngil bisotidagi bor boyligini qogʻozga toʻkib soladi. Zamonlar oʻtsa-da, bunday ijod mahsuli, hattoki, kichik bir sheʼr boʻlsa ham aslo eskirmaydi.

Yosh ijodkor, jurnalist, Amudaryo telekanali suxandoni Aziza Madrahimova bugungi kunda ana shunday isteʼdod egasi sifatida nafaqat tumanimizda, balki butun Qoraqalpogʻistonda tanilishga ulgurdi. Hali oʻquvchilik paytidan sheʼrlar va maqolalar yozib, ilgʻor fikrliligi bilan tengdoshlaridan ajralib turadigan qizaloq ulgʻayib, oʻz sheʼriy toʻplamini nashrdan chiqardi. “Bahordan daraklar” deb nomlangan ushbu ilk kitob, undagi ijod mahsullari Azizani isteʼdodli va oʻz aytar soʻziga ega ijodkor sifatida elga tanitdi.

Aziza Madrahimova 1997-yilda Amudaryo tumanida tugʻilgan. U kichikligidan onasi Sanamjon ayadan ertak, sheʼrlar eshitib ulgʻaydi va oʻzi bilmagan holda adabiyot dunyosiga kirib keldi. Mahallasidagi 55-sonli maktabda oʻqib yurgan davrida kutubxonadan turli kitoblarni olib oʻqish uning eng sevimli mashgʻuloti edi. Ijodga 6-sinf paytida kirib kelgan Aziza adabiyot fanini oʻzgacha mehr va ishtiyoq bilan oʻqir, gʻazallar yodlashni va sheʼrlar mutolaa qilishni yoqtirardi. Ilhomi kelgan paytlarda kichik maqolalar, sheʼrlar yozar, uni koʻrgan Sanamjon aya shu qizining kelgusida ijodkor boʻlishiga ishongisi kelardi. Uning maqolalari tuman gazetasida chop etilganida esa quvonchi koʻkka yetardi. Aziza maktabni tugatib, Mangʻit iqtisodiyot kasb-hunar kollejida kompyuter texnigi mutaxassisligi boʻyicha taʼlim olgan davrlarida ham namunali, tirishqoq va jamoat tadbirlarida faol boʻldi. Turli ijodiy tanlovlarda muvaffaqiyatli ishtirok etdi. Ayniqsa, tuman gazetasi tahririyati uning uchun eng sevimli maskan va u yerdagi ustoz jurnalistlar Oygul Rajabova, Robiya Yoʻldoshevalar esa ijod boʻyicha yoʻl-yoʻriq koʻrsatuvchi, samimiy va yaqin insonlariga aylanishdi.

Mustaqil hayot ostonasiga yetib kelganida Azizani bir olam orzular oʻz ogʻushiga oldi. Ota-onasi, opa-akalari bagʻrida iliq mehr taftida kechgan bolaligi ortda qolayotganini his qilib, oʻz yoʻlini tanlash fursati yetib kelganini angladi va biroz hayajonlanib, jurnalist boʻlishga qaror qilganini eng avval onajonisiga aytdi. Kollejni 2015-yilda tugatgach, Qoraqalpoq davlat universitetining jurnalistika fakultetiga hujjat topshirdi. Biroq shu yili omadi kelmadi, ammo u bundan afsuslanmadi va oʻz ustida koʻproq ishlashga, bilimini yana ham oshirishga qaror qildi. Shu yili ilk “Bahordan darak” sheʼriy toʻplamini nashrdan chiqarishga muvaffaq boʻldi. Bundan tashqari, uning sheʼrlari “Jayhun ilhomlari” nodavlat notijorat tashkiloti tomonidan chop etilgan bir qator sheʼriy toʻplamlardan ham joy oldi.

Aziza boʻsh vaqtlarida Oʻzbekiston Nogironlar jamiyati Amudaryo tuman boʻlinmasi tomonidan grant loyihasi doirasida tashkil etilgan toʻgarakda tikish-bichish va toʻqish hunarini ham oʻrgandi. Jamiyat tomonidan qoʻlga kiritilgan yana bir grant loyihasi doirasida ochilgan kutubxonaga kutubxonachi vazifasiga taklif qilishganida u bajonidil qabul qildi va u yerda ham ishladi. Ishlash bilan birga unga kutubxonada yanada koʻproq kitob oʻqishiga, bilimini oshirishiga ham imkoniyat yaratildi. Shu yili mehnatlari samara berib, oʻzi orzu qilgan Qoraqalpoq davlat universitetining jurnalistika fakultetiga oʻqishga kirishga muvaffaq boʻldi.

Talabalik davrlarida oliy taʼlim maskanida oʻtilgan ijodiy va amaliy darslar, tajribali ustozlarning mahorat darslari Azizaning koʻproq maqolalar yozishiga, publitsistika, ocherk, reportaj kabi turli janrlarda ijodini davom ettirishiga turtki boʻldi. U tuman matbuotidan uzoqlashmagan holda markaziy nashrlarda ham oʻz maqolalarini chop ettirdi. Borgan sari qalami oʻtkirlashib, fikrlari teranlashdi. Izlanishdan toʻxtamay, telejurnalistika, radiojurnalistika va sohadagi yangi yoʻnalishlardan boʻlgan internet jurnalistikasi sirlarini nazariy oʻrganish bilan birga amaliyotda ham oʻrganib, salohiyatini oshirishga harakat qildi.

Bilimlilar va iqtidorlilar har joyda kerak boʻladi. Oliy taʼlimni tugatganidan soʻng, Azizani Amudaryo telekanali tahririyatiga kelganida darhol ishga qabul qilishdi. Hali talabalik paytidanoq ijodiy, adabiy koʻrsatuvlar, telelavhalar tayyorlab, ustozlar va muxlislar nazariga tushgan isteʼdodli ijodkor suxandon vazifasida ish boshladi.

Ayni paytda telejurnalistika sohasida tajriba oʻrganib, oʻz mahoratini oshirib borayotgan yosh jurnalist nutqining sof oʻzbek adabiy tilida, ravonligi bilan muxlislar eʼtiborini qozonmoqda. Ish faoliyati davomida u televideniye yoʻnalishi boʻyicha ustozi jurnalist Gʻulomjon Yeshniyozovdan ham tajriba, yoʻl-yoʻriq oʻrganmoqda. Ustozdan oʻrgangan tajribalari va oʻz bilimlari asosida “Dilimdagi gaplar”, “Salomatlik darslari”, “Inson huquqlari” kabi koʻrsatuvlar va axboriy dasturlariga ham boshlovchilik qilib, mahoratini koʻrsatmoqda. Undan tashqari, tanqidiy-tahliliy ruhdagi maqolalar tayyorlab, intervyu, hikoya, esse kabi janrlarda ham ijod qilmoqda va ularni tuman gazetasi sahifalarida yoritmoqda.

Aziza badiiy ijod yoʻnalishida qalam tebratishni koʻproq yaxshi koʻradi. U iloji boricha turmushdagi kichik boʻlsa ham katta saboq olsa arziydigan hodisalarni, hayotiy mavzularni qalamga olib, mushtariylarni mulohaza qilishga chorlaydi. Sheʼrlarida ham kamtarinlik, qanoatlilik, mehnatsevarlik, ona yurtga cheksiz mehr-muhabbati, shu Vatan farzandi ekanligidan faxru-iftixor tuygʻulari aks etib turadi.

Yosh jurnalist yaqinda Toshkent viloyatining Boʻstonliq tumanida Oʻzbekiston Milliy media birlashmasi tomonidan “Ugam” yozgi media-oromgohda oʻtkazilgan “Media camp – 2023” seminar-treningida faol ishtirok etib keldi. Tadbirga tashrif buyurgan Frantsiya, Turkiya va Oʻzbekistonlik mahoratli jurnalistlar, media-trenerlardan tajriba oʻrganib, katta taassurotlar bilan qaytdi.

Aziza oilada toʻrtinchisi, kenja farzand. Uning otasi Saʼdulla Madrahimov hunarmand-usta boʻlgan va hozirda nafaqada. Onasi Sanamjon Rahimova esa zavodda ishchi boʻlib mehnat qilib, nafaqaga chiqqan. Akalari ham hunarmand, qurilish sohasida ishlashadi. Bugungi kunda ularning oilasi, farzandlari va oʻz hayot yoʻli bor. Saʼdulla aka va Sanamjon opalar farzandlar tarbiyasiga alohida eʼtibor berib, hunarli, odob-axloqli, solih insonlar qilib voyaga yetkazishgani uchun el rahmatiga sazovor boʻlishgan. Aziza ham yaqinda oilali boʻldi, umr yoʻldoshi Nodirbek Shomurodov Andijon Mashinasozlik instituti talabasi. Uning erkin ijod qilib, ishlashiga bu oilada ham imkoniyat yaratib berishgan.

Ijodkorning yonida uni tushunadigan, toʻgʻri yoʻl koʻrsatadigan, yangi-yangi yaratuvchanliklarga undaydigan insonlar boʻlsa ilhom beradi. Iqtidorini, isteʼdodini yanada rivojlantirib, oʻzini mukammallashtiradi, ijodi bilan adabiyot va maʼnaviyatni boyitadi. Yosh jurnalist Aziza Madrahimova ham kelajakda iqtidorli jurnalist boʻlib yetishib, barchaga manzur boʻladigan, dolzarb mavzulardagi maqola, publitsistikalari, koʻrsatuvlari va badiiy ijodi bilan xalqqa yanada yaqinroq tanilishiga, jamiyat taraqqiyotiga va oʻzbek jurnalistikasi rivojiga munosib hissa qoʻshishiga ishongimiz keladi.

Ozoda Xudoyberganova.