“Тўғри овқатланиш ва соғлом турмуш тарзи” умуммиллий ҳаракати доирасида тадбир ўтказилди

Аҳолининг узоқ умр кўриш давомийлигини таъминлаш долзарб масалалардан биридир. Зеро, ушбу кўрсаткич инсонларнинг соғлом турмуш тарзи ва фаровон ҳаёти ифодасидир.

Маълумки, Ўзбекистон Республикаси Президентининг Олий Мажлис ва Ўзбекистон халқига Мурожаатномасида 2023 йилда “Тўғри овқатланиш ва соғлом турмуш тарзи” умуммиллий ҳаракатини йўлга қўйиш вазифаси белгиланган эди. Бунда маҳаллий маҳсулотлар турларидан келиб чиқиб аҳолининг ёш гуруҳларига мос келадиган ва саломатлик ҳолатидан келиб чиқиб ҳар бир хавф гуруҳига алоҳида-алоҳида соғлом овқатланишга қаратилган тавсияларни бериш кўзда тутилган.

Бундан кўзланган мақсад − аҳолининг тўғри овқатланиш ҳарактерига эга бўлишига ва соғлом турмуш тарзида ҳаёт кечиришига ҳамда нотўғри овқатланиш билан боғлиқ касалликларнинг олдини олишга эришишдир.

Юртбошимиз ташаббусини амалга ошириш мақсадида тиббиёт ходимлари томонидан маҳалла гузарларида, аҳоли кўп тўпланадиган манзилларда соғлом овқатланиш ярмаркасини ўтказиш орқали аҳолига тўғри овқатланиш тамойиллари ҳақида маълумотлар бериб борилмоқда.

20 апрель куни Амударё тумани Тиббиёт бирлашмаси ходимлари томонидан Манғит шаҳридаги Навоий маҳалласида “Соғлом овқатланиш ярмаркаси” ташкил этилди.

Ушбу тадбирда аҳоли орасида уларни тўғри овқатланишга одатлантириш учун шартли равишда 3 хил рангдаги столлар ажратилиб, аҳолига озиқ-овқат маҳсулотлари тўғрисидаги маълумотлар кўргазмали намойиш этилди.

Бунда қизил стол устидаги маҳсулотлар истеъмолга тавсия этилмайдиган, сариқ столдаги эса чекланган миқдорда истеъмол қилиш мумкин бўладиган, яшил столдагилар эса истеъмол қилиш мумкин бўлган маҳсулотлардир.

Тадбир давомида тиббиёт ходимлари томонидан ҳар бир столдаги озиқ-овқат маҳсулотларининг аҳамияти уларнинг организмга фойдали ва зарарли таъсирлари ҳақида батафсил маълумот берилди.

Ундан ташқари, аҳолининг соғлом турмуш тарзини қўллаб-қувватлаш ва жисмоний фаоллигини ошириш бўлими шифокорлари юқумли касалликларнинг олдини олиш, соғлом турмуш тарзини шакиллантириш мақсадида, кун тартибига риоя қилиш, соғлом овқатланиш, жисмоний фаоллик, зарарли одатлар − кашандалик, ичкиликбозлик, гиёҳвандлик, токсикоманиядан сақланиш, руҳий саломатликни сақлаш, атроф-муҳитнинг муҳофазаси ва тиббий кўрикдан ўтишнинг моҳияти тўғрисида кенг кўламли тушунтиришлар берилди.

Шунингдек, тадбир давомида шифокорлар аҳолига зарарли одатлардан воз кечиб, оммавий спорт билан доимий шуғулланиш лозимлиги, тўғри овқатланиш тамойилларига риоя қилишлари, хусусан, таркибида туз, қанд ва ёғ миқдори кўп бўлган ҳамда хамирли таом ва ширинликларни, нон маҳсулотларини меъёридан ортиқ истеъмол қилмаслик лозимлиги ҳақида тарғибот олиб бордилар.

Шу ўринда айтиш керакки, соғлом турмуш тарзи — инсоннинг кун тартибига риоя этиши, фаол ҳаракат асосида организмини чиниқтириши, спорт билан шуғулланиши, тўла ва сифатли овқатланиши, гигиеник қоидаларга амал килиши, зарарли одатлардан ўзни тута билишидир.

Серҳаракатлилик ва тўғри овқатланиш организмни табиий равишда рағбатлантириб туради. Шунинг учун серғайрат, тиниб-тинчимайдиган одамлар доимо тетик, бардам, кексайганларида ҳам бақувват ва шижоатли бўлади.

Шундай экан, ҳурматли юртдошлар, ҳаёт деб аталмий бебаҳо неъматнинг қадрига етган ҳолда тўғри овқатланиш қоидаларига ва соғлом турмуш тарзига риоя қилайлик!

Туман ҳокимлигининг Ахборот хизмати.