Халқ депутатлари Амударё туман Кенгашининг 60-сессияси тўғрисида ахборот

2023 йил 25 апрель куни Халқ депутатлари Амударё туман Кенгашининг 60-сессияси бўлиб ўтди.

Сессия ишида туман Кенгаши депутатлари, секторлар раҳбарлари, ҳоким ўринбосарлари, ҳокимлик масъул ходимлари, ҳуқуқ-тартибот органлари, бўлимлар, жамоат ташкилотлари раҳбарлари ҳамда оммавий ахборот воситалари вакиллари иштирок этди. Сессияни туман ҳокими – Халқ депутатлари туман Кенгаши раиси Султонбой Йўлдашев очди ва олиб борди. Сессия котиблигига 7-Ойбек сайлов округидан депутат Саъдулла Содиков сайланди.

Сессияда дастлаб Фуқаролик ишлари бўйича Амударё туман суди томонидан 2023 йилнинг дастлабки 3 ойи давомида амалга оширилган ишлар юзасидан суд раиси Қайрулла Атамуратовнинг ахбороти тингланди. Ахборотда келтириб ўтилганидек, мазкур давр мобайнида суд томонидан 1393та иш кўриб тамомланган. Шунингдек, буйруқ тартибида жами 884 аризалар бўйича суд буйруғи чиқарилган.

Шундан кейин Жиноят ишлари бўйича Амударё туман суди томонидан 2023 йилнинг1-чораги давомида амалга оширилган ишлар юзасидан суд раиси Асқар Сафаров ахборот берди. Ахборотда 3 ой мобайнида 29та иш бўйича 39 нафар шахсга нисбатан жиноят иши бўйича айблов ҳукми чиқарилиб, 13 та иш бўйича 13 нафар шахсга нисбатан жиноят иши харакатдан тугатилгани, 3та иш бўйича 4 нафар шахсга нисбатан оқлов ҳуқми чиқарилгани қайд этилди.

Сессия ишида Ўзбекистон Республикаси Президентининг “Ҳудудларни комплекс ижтимоий-иқтисодий ривожлантириш бўйича секторлар фаолиятини янада такомиллаштиришга доир қўшимча чора-тадбирлар тўғрисида”ги қарорининг тумандаги ижроси юзасидан сектор раҳбарларининг ҳисоботлари тингланди.

Кун тартибидаги масала юзасидан туман ҳокими – 1-сектор раҳбари Султонбой Йўлдашевнинг ҳисоботида таъкидланганидек, жорий йилнинг 3 ойи мобайнида сектор ҳудудини ижтимоий-иқтисодий ривожлантириш дастури доирасида 30,7 млрд. сўмлик 26та лойиҳалар ишга туширилиб, 132та янги иш ўринлари яратилган.

3-сектор раҳбари – туман Ички ишлар бўлими бошлиғи Жамаладдин Юсупов ўз ҳисоботида жорий йилнинг 3 ойи давомида “Бандлик” дастурига мувофиқ Аҳоли бандлигига кўмаклашиш маркази томонидан 138 нафар фуқаролар ишга жойлаштирилганини, ижтимоий ҳимояга муҳтож 25 нафар фуқаро эса реаблитация-техник воситалари ва кресло-аравачалар билан таъминланганини айтиб ўтди.

4-сектор раҳбари – туман ДСИ бошлиғи Айдос Сейитов ҳисоботида қайд этиб ўтилганидек, сектор ҳудудида яшовчи 40 нафар ишсиз фуқаролар касбга ўқитилган, 112 нафар фуқароларга оилавий тадбиркорликини бошлашлари учун 1 млрд 904 млн. сўмлик кредитлар ажратилган.

Сессия ишида туман Халқ қабулхонаси, секторлар ва ҳудуддаги ташкилотлар раҳбарларининг аҳоли мурожаатлари ва муаммолари билан ишлаш ҳолати юзасидан туман Халқ қабулхонаси бўлими мудири Эркин Ражабовнинг ахбороти тингланди. Ахборотда қайд этилганидек, 2023 йилнинг 1-чораги давомида туман аҳолиси томонидан йўлланган мурожаатларнинг аксарияти болалар нафақасини тайинлаш, алимент ундириш, иш билан таъминлаш, моддий ёрдам, соғлиқни сақлаш ва табиий газ билан боғлиқ муаммолар ҳақида бўлган.

Сессия кун тартибидаги навбатдаги масала юзасидан туман ички ишлар бўлими бошлиғи, подполковник Жамаладдин Юсуповнинг ҳисоботи тингланди. Ҳисоботда таъкидланганидек, туманда олиб борилган профилактик тадбирлар натижасида ўтган 3 ойда қайд этилган жами жиноятлар ўтган йилнинг шу даврига нисбатан 45 тадан 40 га яъни 5 тага камайишига эришилган.

Сессия давомида туман Адлия бўлими томонидан 2023 йилнинг дастлабки 3 ойи давомида амалга оширилган ишлар юзасидан Адлия бўлими бошлиғи Мансур Садиковнинг ҳисоботи тингланди. Ҳисоботда айтиб ўтилганидек, бўлим томонидан 3 ой давомида жами 43 та давлат органлари ва ташкилотларига 179 та қонун ва қонуности актлари етказилган.

Сессия ишида “Ташаббусли бюджет” лойиҳасининг 1-мавсуми доирасида 2 мингдан ортиқ овоз тўплаб, қўшимча тарзда ғолиб бўлган 9 та ташаббуслар лойиҳасини ғолиблар қаторига қўшиш бўйича туман ҳокимининг биринчи ўринбосари Рашид Салаев томонидан таклиф берилди. Таклиф депутатлар томонидан бир овоздан маъқулланди.

Сессия кун тартибида Амударё тумани ҳокимлиги Болаларни ҳимоя қилиш шўъбасининг жорий йилнинг 1-чораги давомидаги фаолияти юзасидан шўъба мудири Жаҳонгир Холмуродовнинг ахбороти тингланди. Таъкидлаб ўтилганидек, вояга етмаганлар ўртасида жиноятчилик ва ҳуқуқбузарликнинг олдини олиш мақсадида ҳамкор ташкилотлар билан биргаликда ҳозирги кунга қадар 78 та “Ўқувчи”, “Тунги рейд”, “Тиғ” ва ”Давомат” тадбирлари ўтказилган.

Сессия ишида Ўзбекистон Республикаси Президентининг “Деҳқон хўжаликлари ташкил этишни қўллаб-қувватлаш орқали аҳоли даромадларини ошириш бўйича қўшимча чора-тадбирлар тўғрисида”ги қарори ижроси юзасидан туман Фермер, деҳқон хўжаликлари ва томорқа ер эгалари Кенгаши раиси Илҳом Палвонов ҳисобот берди. Ҳисоботда деҳқон хўжаликларини ташкил этиш, чорвачилик, пахта-ғаллачиликни ривожлантириш мақсадида заҳира ер майдонларини очиқ электрон танловга қўйиш бўйича таклиф берилди. Таклиф депутатлар томонидан бир овоздан маъқулланди.

Сессия ишида кун тартибига киритилган барча масалалар атрофлича кўриб чиқилиб, туман Кенгашининг тегишли қарорлари қабул қилинди. Шунинг билан сессия ўз ишини якунлади.

Туман ҳокимлигининг Ахборот хизмати.