Амударё туманида 9 май − Хотира ва қадрлаш куни муносабати билан тадбир ўтказилди
8 май куни Манғит шаҳридаги Хотира майдонида 9 май – Хотира ва қадрлаш куни муносабати билан байрам тадбири ўтказилди.
Тадбирда туман ҳокими Султонбой Йўлдашев, секторлар раҳбарлари, ҳуқуқни муҳофаза қилиш органлари вакиллари, фронт орти меҳнат фахрийлари, депутатлар, муассаса, корхона ва ташкилотлар раҳбарлари, маҳалла фаоллари ва кенг жамоатчилик вакиллари иштирок этдилар.
Тадбир аввалида Ўзбекистон ва Қорақалпоғистон Республикаларининг давлат мадҳиялари янгради.
Шундан сўнг туман ҳокими Султонбой Йўлдашев сўзга чиқиб, мамлакатимизда 9 май – Хотира ва қадрлаш кунини кенг нишонлаш, Иккинчи жаҳон урушида ҳалок бўлган аждодларимиз хотирасига чуқур ҳурмат бажо келтириш, фашизмга қарши жангларда, меҳнат фронтида жонбозлик кўрсатган фахрийларимизга эътибор ва эҳтиром кўрсатиш, ёшларни маънавий-ахлоқий жиҳатдан тарбиялашга ҳисса қўшаётган фахрийларни эъзозлаш борасида қилинаётган ишлар ҳақида тўхталиб ўтди.
Таъкидланганидек, орамизда бўлган уруш ва меҳнат фронти фахрийлари давлатимиз ва жамиятимизнинг доимо эъзозида бўлиб, уларнинг инсониятни фашизм балосидан қутқариш йўлида қилган фидоийликлари келгуси авлодларимиз учун ибрат мактабидир.
Тадбирда “Нуронийлар” жамоатчилик Кенгаши раиси ўринбосари Бекмон ота Аллаберганов фашизм устидан қозонилган Ғалабага муносиб ҳисса қўшган ҳар бир юртдошимизнинг хотираси келгуси авлодларимиз қалбида мангу яшашини, уруш йилларида фронт ортида мардонавор меҳнат қилиб, халқ хўжалигининг тикланишига муносиб ҳисса қўшган меҳнат фахрийлари авлодлар учун матонат ва фидойлик тимсоли эканлигини таъкидлади.
Шундан сўнг, марҳумлар руҳига Қуръон тиловат қилиниб, ҳарбий оркестр мусиқаси остида Мотамсаро она ҳайкали пойига гулчамбарлар қўйилди.
Сўнгра тадбирнинг Маданият бўлими томонидан тайёрланган бадиий-мусиқий қисми бошланди. Истеъдодли ёшлар Иккинчи жаҳон уруши йилларида юртдошларимиз чеккан азоб-уқубатларни моҳирлик билан саҳна кўринишлари орқали гавдалантириб бердилар.
Тадбирда туманимизнинг таниқли хонандалари Ватан, тинчлик ва осудалик, бугунги фаровон ва гўзал ҳаётни тараннум этувчи куй-қўшиқлар ижро этишди.
Тадбир тугагач, меҳмонлар Хотира майдони ёнида қад ростлаган туман тарихи музейида бўлиб, тарих саҳифаларини ўзида акс эттирувчи эксонатлар билан танишдилар. Сўнгра тадбир иштирокчилари Хотира майдонидаги рамзий китоб саҳифаларини варақлаб, урушда шаҳид кетган аждодларимиз номларини, уларнинг жасоратларини ёдга олишди. Қонли жанггоҳлардан омон қайтган, меҳнат фронтида фидойилик намуналарини кўрсатиб, халқ хўжалигининг қайта тикланишига ҳисса қўшган юртдошларимиз номларини ифтиҳор билан тилга олишди.
Сўнгра туман ҳокими, секторлар раҳбарлари ва бошқа масъуллар Иккинчи жаҳон уруши ва урушдан кейинги тикланиш йилларида халқ хўжалигининг турли жабҳаларида меҳнат қилиб, фидойилик намуналари кўрсатган фрон орти меҳнат фахрийлари хонадонида бўлишди. Меҳнат фахрийларига совғалар топширилиб, уларнинг яшаш шароитлари, оилавий аҳволидан хабар олинди.
Хотир ва қадрлаш куни шу юртда яшаётган ҳар қайси оила, ҳар қайси хонадон учун бевосита дахлдор, ҳар бир юртдошимиз ҳаётида ўзига яраша из қолдирган тарихий санадир. Сабаби, Иккинчи жаҳон уруши миллионлаб инсонлар қатори кимнингдир бобоси ёки бувиси, яна кимнингдир ота-онаси ёки яқинларининг бевақт ўлимига сабаб бўлди. Оловли жангларда ҳалок бўлган аждодларимизнинг табаррук қони, ўз жонини хатарга қўйиб юртини асраган ота-боболаримизнинг матонати, туну-кун ормидан кечиб, фронт ортида заҳмат чеккан юртдошларимизнинг пешона тери эвазига қўлга киритилган Ғалаба барчамиз учун қадрлидир. Бу йўлда ҳалок бўлганларнинг хотираси қалбимизда абадий, шу кунларга етган табаррук бобо ва момоларимизнинг қадри эса ҳамма нарсадан улуғдир!
Туман ҳокимлигининг Ахборот хизмати
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
