Amudaryo tumanida 9-may − Xotira va qadrlash kuni munosabati bilan tadbir oʻtkazildi
8-may kuni Mangʻit shahridagi Xotira maydonida 9-may – Xotira va qadrlash kuni munosabati bilan bayram tadbiri oʻtkazildi.
Tadbirda tuman hokimi Sultonboy Yoʻldashev, sektorlar rahbarlari, huquqni muhofaza qilish organlari vakillari, front orti mehnat faxriylari, deputatlar, muassasa, korxona va tashkilotlar rahbarlari, mahalla faollari va keng jamoatchilik vakillari ishtirok etdilar.
Tadbir avvalida Oʻzbekiston va Qoraqalpogʻiston Respublikalarining davlat madhiyalari yangradi.
Shundan soʻng tuman hokimi Sultonboy Yoʻldashev soʻzga chiqib, mamlakatimizda 9-may – Xotira va qadrlash kunini keng nishonlash, Ikkinchi jahon urushida halok boʻlgan ajdodlarimiz xotirasiga chuqur hurmat bajo keltirish, fashizmga qarshi janglarda, mehnat frontida jonbozlik koʻrsatgan faxriylarimizga eʼtibor va ehtirom koʻrsatish, yoshlarni maʼnaviy-axloqiy jihatdan tarbiyalashga hissa qoʻshayotgan faxriylarni eʼzozlash borasida qilinayotgan ishlar haqida toʻxtalib oʻtdi.
Taʼkidlanganidek, oramizda boʻlgan urush va mehnat fronti faxriylari davlatimiz va jamiyatimizning doimo eʼzozida boʻlib, ularning insoniyatni fashizm balosidan qutqarish yoʻlida qilgan fidoiyliklari kelgusi avlodlarimiz uchun ibrat maktabidir.
Tadbirda “Nuroniylar” jamoatchilik Kengashi raisi oʻrinbosari Bekmon ota Allaberganov fashizm ustidan qozonilgan Gʻalabaga munosib hissa qoʻshgan har bir yurtdoshimizning xotirasi kelgusi avlodlarimiz qalbida mangu yashashini, urush yillarida front ortida mardonavor mehnat qilib, xalq xoʻjaligining tiklanishiga munosib hissa qoʻshgan mehnat faxriylari avlodlar uchun matonat va fidoylik timsoli ekanligini taʼkidladi.
Shundan soʻng, marhumlar ruhiga Qurʼon tilovat qilinib, harbiy orkestr musiqasi ostida Motamsaro ona haykali poyiga gulchambarlar qoʻyildi.
Soʻngra tadbirning Madaniyat boʻlimi tomonidan tayyorlangan badiiy-musiqiy qismi boshlandi. Isteʼdodli yoshlar Ikkinchi jahon urushi yillarida yurtdoshlarimiz chekkan azob-uqubatlarni mohirlik bilan sahna koʻrinishlari orqali gavdalantirib berdilar.
Tadbirda tumanimizning taniqli xonandalari Vatan, tinchlik va osudalik, bugungi farovon va goʻzal hayotni tarannum etuvchi kuy-qoʻshiqlar ijro etishdi.
Tadbir tugagach, mehmonlar Xotira maydoni yonida qad rostlagan tuman tarixi muzeyida boʻlib, tarix sahifalarini oʻzida aks ettiruvchi eksonatlar bilan tanishdilar. Soʻngra tadbir ishtirokchilari Xotira maydonidagi ramziy kitob sahifalarini varaqlab, urushda shahid ketgan ajdodlarimiz nomlarini, ularning jasoratlarini yodga olishdi. Qonli janggohlardan omon qaytgan, mehnat frontida fidoyilik namunalarini koʻrsatib, xalq xoʻjaligining qayta tiklanishiga hissa qoʻshgan yurtdoshlarimiz nomlarini iftihor bilan tilga olishdi.
Soʻngra tuman hokimi, sektorlar rahbarlari va boshqa masʼullar Ikkinchi jahon urushi va urushdan keyingi tiklanish yillarida xalq xoʻjaligining turli jabhalarida mehnat qilib, fidoyilik namunalari koʻrsatgan fron orti mehnat faxriylari xonadonida boʻlishdi. Mehnat faxriylariga sovgʻalar topshirilib, ularning yashash sharoitlari, oilaviy ahvolidan xabar olindi.
Xotir va qadrlash kuni shu yurtda yashayotgan har qaysi oila, har qaysi xonadon uchun bevosita daxldor, har bir yurtdoshimiz hayotida oʻziga yarasha iz qoldirgan tarixiy sanadir. Sababi, Ikkinchi jahon urushi millionlab insonlar qatori kimningdir bobosi yoki buvisi, yana kimningdir ota-onasi yoki yaqinlarining bevaqt oʻlimiga sabab boʻldi. Olovli janglarda halok boʻlgan ajdodlarimizning tabarruk qoni, oʻz jonini xatarga qoʻyib yurtini asragan ota-bobolarimizning matonati, tunu-kun ormidan kechib, front ortida zahmat chekkan yurtdoshlarimizning peshona teri evaziga qoʻlga kiritilgan Gʻalaba barchamiz uchun qadrlidir. Bu yoʻlda halok boʻlganlarning xotirasi qalbimizda abadiy, shu kunlarga yetgan tabarruk bobo va momolarimizning qadri esa hamma narsadan ulugʻdir!
Tuman hokimligining Axborot xizmati
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
