Янги таҳрирдаги Меҳнат кодекси батафсил тушунтирилди
Давлатимиз раҳбари томонидан 2022 йилнинг 28 октябрь куни имзоланган “Ўзбекистон Республикасининг Меҳнат кодексини тасдиқлаш тўғрисида”ги қонунга мувофиқ, жорий йилнинг 1 май санасидан янги таҳрирдаги Меҳнат кодекси кучга кирди.
30 май куни Амударё туманининг Олмазор маҳалласи ҳудудидаги 82-сонли мактабда умумтаълим мактаблари директорлари учун янгиланган Меҳнат Кодексининг мазмун-моҳияти, ундаги янгича тартиблар, интизомий қоидаларга бағишланган семинар ташкил этилди.
Семинар иштирокчиларига маъмурий ислоҳотлар жараёнида янги таҳрирдаги Кодекснинг кучга кириши билан меҳнат муносабатларини тўғри ташкил этиш, ходимлар, иш берувчилар ва давлат манфаатларининг мувозанатини таъминлаш кабилар бўйича тушунтириш берилди.
Маълумки, фуқаролик хизматида меҳнат муносабатлари муҳим ўрин тутади. Янги таҳрирдаги Меҳнат кодексида бир қатор ўзгаришлар ва қўшимчалар акс этган. Семинарда мазкур ўзгаришларнинг аксарияти атрофлича тушунтирилди.
Жумладан, қабул қилинган Меҳнат кодексида иш берувчиларнинг тоифалари янгиланган бўлиб, уларнинг доираси анча кенгайди. Масалан, эндиликда иш берувчи сифатида нафақат ташкилотлар, балки уларнинг алоҳида таркибий бўлинмалари ҳам иш берувчи ваколатига эга бўлади. Ундан ташқари, жисмоний шахслар ҳам иш берувчилар қаторига расман киритилди. Меҳнат шартномасини тузиш асослари амалдаги кодексда ҳам бор, лекин янги кодексда ҳар бир асосни тушунтирадиган алоҳида модда шаклланган. Умуман олганда, янги қабул қилинган Меҳнат кодексида бир нечта йирик гуруҳдаги меъёрлар мужассамланган.
Айтиб ўтиш лозимки, янги таҳрирдаги Меҳнат кодексида 1995 йилдаги биринчи таҳриридан фарқли равишда ижтимоий муносабатларни ҳуқуқий тартибга солишнинг асосий принциплари этиб меҳнат ҳуқуқларининг тенглиги, меҳнат ва машғулотлар соҳасида камситишни тақиқлаш, меҳнат эркинлиги, мажбурий меҳнатни тақиқлаш, меҳнат соҳасидаги ижтимоий шериклик, меҳнат ҳуқуқлари таъминланишининг ва меҳнат мажбуриятлари бажарилишининг кафолатланганлиги, ходимнинг ҳуқуқий ҳолати ёмонлашишига йўл қўйилмаслик каби қатъий нормалар белгиланди.
Шунингдек, янги таҳрирдаги Меҳнат кодексида меҳнат эркинлиги ҳар кимнинг меҳнат қилишга бўлган ўз қобилиятларини тасарруф этиш, уларни қонун билан тақиқланмаган ҳар қандай шаклда амалга ошириш, машғулот турини, касбни ва мутахассисликни, иш жойини ҳамда меҳнат шароитларини эркин танлаш ҳуқуқини англатади.
Семинар давомида ходимларга ижро-интизомига риоя қилиш, одоб-ахлоқ ва ички меҳнат-тартиб қоидаларига амал қилиши, мансаб ваколатини суиистеъмол қилиш ҳолатларига йўл қўймаслик, фуқаролар билан мулоқотда хушмуомала бўлиши каби масалалар бўйича огоҳлантирилди. Ходимларга иш вақтида хизмат интизомининг бузилиши, таъмагирлик ва бошқа коррупцион ҳолатларнинг ҳуқуқий оқибатлари ҳаётий мисоллар билан тушунтирилди.
Туман ҳокимлигининг Ахборот хизмати.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
