30 июнь – Ёшлар куни муносабати билан Амударё тумани ҳокими Султонбой Йўлдашевнинг амударёлик ёшларга байрам табриги

Азиз ёшлар, қадрли юртдошлар!

Авваламбор, Сиз азизларни, Сизнинг тимсолингизда туманимизнинг барча ёшларини “Янги Ўзбекистон ёшлари – бирлашайлик!” шиори остида нишонланаётган Ёшлар куни байрами билан чин дилдан муборакбод этаман! 

Ҳурматли Президентимизнинг, давлатимиз ва ҳукуматимизнинг беқиёс ғамхўрлиги, эътибори туфайли кейинги йилларда мамлакатимизда Ёшларга оид давлат сиёсатининг янги босқичи бошланиб, бугун Ўзбекистон ёшлари ҳаётидаги туб бурилишлар даври келди, десам асло муболаға бўлмайди.

Президентимиз ташаббуслари билан 2017 йилда 30 июнь санаси Ёшлар куни байрами сифатида белгиланиб, мустақил ватанимиз солномасидан муносиб ўрин эгаллагани нафақат ёшларимиз, балки бутун халқимиз ҳаётида тарихий воқеа бўлган эди.

Бугун ҳаётимизнинг қайси соҳа ва тармоғини олмайлик, ёшларга эътибор ва ғамхўрлик асосий ўринга кўтарилиб, уларга зарур шароит ва имкониятлар яратиб берилмоқда.

Бу йил туманимизда 2 704 нафар ўқувчи ёшлар мактабларнинг 11-синфларини, 361 нафар ёшлар касб ҳунар мактабларини, 56 нафар мухандистлик техникуминиларини тамомламоқда. Ҳеч шубҳасиз, ўз билим ва истеъдодини юртимиз ва халқимизга муносиб фарзанд бўлишдек олижаноб мақсадларга сарфлашга чоғланиб турган сиздек тиришқоқ ва интилувчан фарзандларимиз бизнинг таянчимиз ва суянчимиз, Янги Ўзбекистоннинг бебаҳо хазинасидир.

Бугун мактабни тамомлаётган ҳар бир ўқувчи учун ҳаётидаги яна бир муҳим эшиклардан бири очилмоқда. Бу – катта ҳаётга йўл демакдир! Ушбу йўлда тўғри танлов қилиб, ўзингиз учун севимли ва керакли касбни эгаллашингизга, барча муваффақиятсизлик, тўсиқларни четлаб ўтиб, юксак марраларни забт этишингизга тилакдошмиз!

2022-2023 ўқув йили якуни бўйича мана шундай тиришқоқ ва иқтидорли ўқувчи ёшларимизнинг 36 нафари умумтаълим мактабларида фанларни аъло баҳоларга ўзлаштириб, олтин медаль, 11 нафари эса кумуш медаль соҳиб ва соҳибалари бўлишди. Бундан ташқари 49 нафар ёшларимиз инглиз тили бўйича халқаро В2 ва 5 нафар С1 сертификатини қўлга киритган.

3 нафар битрувчи ёшларимиз муддатидан олдин олий таълим муассасаларига имтиҳонларсиз кириш бўйича сертификат билан тақдирланиб, талабалар қаторидан жой олишди.

Қадрли ёшлар!

Хабарингиз бор, кейинги пайтларда келажагимиз эгалари бўлган ўғил-қизларимиз билан ишлашнинг мутлақо янги тизими – “Ёшлар дафтари” ва “Ёшлар дастури” ҳамда Ёшлар платформаси ҳаётга кенг татбиқ этилди.

Олиб борилган амалий ишлар натижасида ўтган 6 ой мобайнида “Ёшлар дафтари”га кирган 805 нафар йигит-қизларнинг муаммоларини ҳал этиш учун “Ёшлар жамғармаси” 1 млрд 557,6 млн сўм маблағ ажратилди. Ушбу маблағлар ҳисобидан “Темир дафтар”даги оилалар фарзандлари бўлган 244 нафар талабаларнинг 560,8 млн сўмлик контракт пули тўлаб берилди. Тадбиркорлик билан шуғулланмоқчи ёки ўзини ўзи банд қилиш фаолиятини бошламоқчи бўлган 140 нафар ёшларга жами 565 млн сўмлик асбоб-ускуналар олиб берилди. 208 нафар ёшларимизга 235 млн сўмлик турли хил ижтимоий-иқтисодий ёрдамлар турлари кўрсатилди.

Бундан ташқари, 581 нафар ёшларимиз тижорат банклари томонидан 8 млрд 325 млн сўм имтиёзли кредит маблағлари ажратиш орқали, 357 нафар ёшларимиз 30 йил муддатга 285,6 га ер майдонларини ижарага олиш орқали, 157 нафар ёшларимиз эса корхона ва ташкилотларга доимий ишларга жойлашиш орқали доимий даромад манбаига эга бўлдилар.

Ҳурматли юртдошлар, азиз ёшлар!

Ёшлар билан ишлашни самарали ташкил этиш, уларнинг маданият, санъат, адабиёт, спорт, ахборот технологиялари, китоб ўқишга қизиқишини ошириш бўйича Президентимизнинг 5 та муҳим ташаббуси орзу ва интилишларингизга чинакам қанот бўлмоқда десак, асло муболаға бўлмайди.

Бу борада туманимиз ёшларининг бўш вақтларини мазмунли ўтказиш ҳамда соғлом турмуш тарзини тарғиб қилиш, келажагимиз эгалари булмиш ёшларнинг ижтимоий фаоллигини ошириш мақсадида “маҳалла-сектор-туман” йўналиши бўйича “Беш ташаббус олимпиадаси” тадбирлари ўтказилди.

2022-2023 йилларда “Беш ташаббус олимпиадаси”нинг Ўзбекистон Республикаси босқичида 17 нафар туманимиз ёшлари ғолибликни қўлга киритган бўлиб, улардан 6 нафари 1- ўрин, 6 нафари 2-ўрин ва 5 нафари 3-ўринларни эгаллашди. Ғолиб бўлган спортчиларимизнинг маҳалласига спорт майдончалари қуриб берилади.

Шунингдек, “Ёш китобхон оила” йўналишида Республика босқичида Ўринбоевлар оиласи фахрли 1-ўринни эгаллаб, “Spark” автомобили соҳиби бўлишди.

Азиз ёшлар!

Туман раҳбари сифатида, туман ҳокимлиги Сизни ҳар доим қўллаб-қувватлашга тайёр эканини, ёшларнинг иқтидор ва салоҳиятларини юзага чиқаришга доир эзгу ишларимиз бундан кейин ҳам бардавом бўлишини алоҳида таъкидламоқчиман.

Ишонаманки, Сиздай шижоатли, ғайратли, ватанпарвар ёшларимиз бор экан, юкимиз ҳеч қачон ерда қолмайди. Кўзлаган юксак марраларимизни дадиллик билан забт этаверамиз!

Қадрли ёшлар!

Сизларни яна бир бор бугунги байрам – Ёшлик, Шижоат, Куч-қудрат ва Матонат айёми билан чин қалбимдан муборакбод этиб, ўқиш ва ишларингизда, оилавий ҳаётингизда улкан муваффақиятлар тилайман!

Яна бир бор байрамларингиз муборак бўлсин!