ИМКОНИЯТИ ЧЕКЛАНГАН, ЛЕКИН ИМКОНЛАРИ ЧЕКСИЗ ИНСОНЛАР ДОИМО ЭЪТИБОРИМИЗДА

Ўзбекистон Республикаси Ногиронлар жамияти Амударё туман бўлинмаси томонидан туманда истиқомат қилувчи имконияти чекланган, ногиронлиги бор бўлган инсонларга меҳр-мурувват кўрсатиш, улар ҳаётига оид муаммолар ечимини топишда кўмаклашиш мақсадида тез-тез хонадонларига бориб, ҳолидан хабар олинмоқда. Хусусан, Оқ-олтин ОФЙ ҳоким ёрдамчиси билан биргаликда овулда яшовчи фуқаро, 1-гуруҳ ногирони Ўринбой Шомуратов оиласига бориб, ҳомий тадбиркор Д.Хайтбаева томонидан тақдим қилинган озиқ-овқат маҳсулотлари етказиб берилди. Ў.Шомуратов оила аъзолари билан суҳбат ўтказилиб, уларнинг касб-ҳунарга қизиқиши ўрганиб чиқилди ва салоҳиятига яраша ҳунармандчилик билан шуғуланиш таклифлари берилди. Кўнгли кемтик, имконияти чекланган фуқароларнинг кайфиятини кўтариш мақсадида собиқ афғончи жангчилар иштирокида “Ватан севгиси - иймон белгиси” деб номланган тадбир ўтказилиб, унда 15 нафар имконияти чекланган ёшларимиз иштирок этишди.

Мазкур тадбирга Қорақалпоғистон Республикаси ногиронлар жамияти раиси П. Даулетярова, Нукус шаҳри ногиронлар жамияти раиси Г.Тошбоева, Қорақалпоғистон Республикаси ногиронлар жамияти мутахассиси Р.Шинибаева, Амударё туман оила ва хотин-қизлар бўлими раиси Г.Сабурова ва бошқа масъуллар иштирок этишди.

Тадбир давомида саховатпеша ҳомий тадбиркорлар Д.Ҳайтбоева ва Б.Халбаевалар томонидан файзли дастурхон ёзилди ва ширинликлар тортилиб, совғалар улашилди.

Жамиятимиз аъзолари учун 8 март – Халқаро хотин-қизлар куни, Наврўз – умумхалқ байрами ҳар йили янада завқли ва таассуротларга бой тарзда ўтади. Меҳр-оқибат, саховат ва мурувват байрамининг тотли таоми – сумалак пиширилиб, баҳорий таомлар тайёрланади. 2023 йилги баҳор байрамлари ҳам янада завқли таассуротларга бой, шодиёналик билан нишонланди.

Жамиятимиз аъзолари мамлакат ҳаётидаги муҳим сиёсий жараёнларда ҳам доимо фаол. Конститутциямизга ўзгартириш киритиш бўйича ўтказилган ижтимоий-сиёсий тадбирларда ва референдумда фаол иштирок этишди. Хусусан, 2023 йилнинг 30 апрель санасида Қорақалпоғистон Республикаси миқёсида ўтказилган “Конституция – келажагимиз кафили” деб номланган тадбирда жамиятимизнинг қўли гул чеварлари томонидан қўл меҳнати маҳсулотлари кўргазмаси ташкил этилди.

Жамиятимиз аъзоларини яхши кунларда эслаш доимо анъанага айланган. Турли байрам саналари муносабати билан Бештом МФЙ, Куюкўпир ОФЙ, Қипчоқ ШФЙ, Дурунки, Янгиобод, Ойбек номли, Бойовул МФЙ ларда яшовчи 15 нафар имконияти чекланган фуқаролар ҳолидан хабар олинди.

Шунингдек, Амударё туман ҳокимлиги, Мактабгача ва мактаб таълими бўлими билан биргаликда 1 июнь - Халқаро болаларни ҳимоя қилиш куни муносабати билан 30 нафар имконияти чекланган, ногиронлиги бор болажонлар ўртасида “Мафтункор ранглар жилоси” деб номланган расм чизиш бўйича кўрик-танлови бўлиб ўтди. Тадбир давомида тадбирнинг бош ҳомийси, Д.Хайтбаева ва саховатли инсонлардан И.Олимов, Э.Казаков, Д.Раҳимовлар, болажонларни совғалар, ширинликлар ва музқаймоқ билан сийладилар .

Тадбир якунида 1-ўрин 21-сонли ўрта таълим мактаби ўқувчиси Рухшона Файзуллаевага, 2-ўрин 28-сонли ўрта таълим мактаби ўқувчиси Беҳрузбек Юлдошбоевларга насиб этди ва улар 2023 йил 2 июнь санасида Нукус шаҳрида Адлия Вазирлиги билан биргаликда ўтказилган “Ранг-баранг буёқлар” деб номланган кўрик-танловида муваффақиятли иштирок этиб қайтдилар.

Жорий йилнинг 9 июль санасида эса жамиятимиз аъзолари Ўзбекистон Республикаси Президенти сайловида катта шодиёналик билан иштирок этдилар.

Имконияти чекланган, ногиронлиги бор болажонлар ўртасида спорт ўйинлари шашка-шахмат бўйича дўстона мусобақалар ҳам режа асосида ўтказиб борилади.

Шунингдек, саховатпеша инсонлар томонидан кундалик озиқ-овқат маҳсулотлари ёрдам пакетлари туманимизнинг барча ҳудудларидаги имконияти чекланган фуқароларга, ногиронлиги бўлган болажонларга мунтазам равишда етказиб берилади. Зеро, бир ғариб кўнгилни шод этиш, Каъбани обод қилмоқ билан баробар, дейдилар.

Бизнинг мақсадимиз ҳам ҳамиша эзгу, жамият аъзоларнинг ўз ҳаётларидан рози яшашларига кўмаклашишдир.

Н.Холбоева, Ўзбекистон Ногиронлар жамияти Амударё туман бўлинмаси раиси.