“САЛОМАТЛИК САРИ 5000 ҚАДАМ” ОММАВИЙ СПОРТ МАШҚЛАРИ ЎТКАЗИЛДИ

Жисмоний фаоллик инсонга нафақат саломатлик бахш этади, балки кайфиятини яхшилайди, кун бўйи ишда ва ўқишда тетиклик билан ўз фаолиятини юритиш имконини беради. Шу боис, бутун мамлакатимиз бўйлаб, аҳоли ўртасида ҳафтанинг маълум бир кунида “Саломатлик кунлари”ни ўтказиш, ушбу тадбирга барча ёшдаги фуқароларни кенг қамраб олиш мақсадида “Соғлом ҳаёт сари 5000 қадам” пиёда юриш оммавий спорт машқлари ташкил этилмоқда. Шуниси эътиборлики, мазкур тадбир доирасида эрталабки бадантарбия машқлари ҳам бажарилаётгани иштирокчиларда қизиқиш уйғотиб, уларга кўтаринки кайфият бағишламоқда.

Жорий йилнинг 17 июль санасида Амударё туманининг Манғит шаҳри ҳудудидаги маҳаллалар аҳолиси иштирокида ҳам “Соғлом ҳаёт сари 5000 қадам” пиёда юриш оммавий спорт машқлари ташкил этилди.

Аҳолининг ихтиёрий равишда, жипслиги асосида ўтказилган мазкур тадбирда нафақат Манғит шаҳри, балки шаҳар атрофидаги овул ва маҳаллаларда яшовчи аҳоли вакиллари ва ёшлар ҳам иштирок этишди.

Оммавий машқларда туманнинг Амир Темур номли, Арна бўйи, Дўстлик, Беруний номли, Ойбек номли, Босув, Янгиобод овул ва маҳалла фуқаролар йиғинларида фаолият олиб борувчи ёшлар етакчилари бошчилигидаги мазкур овул ва маҳаллалар ёшлари фаоллик кўрсатдилар.

Тадбирда турли ёш тоифасидаги аёл-қизларнинг иштирокига алоҳида эътибор қаратилди. Хусусан, уларнинг бирданига ўта фаоллик билан тез ҳаракатланмасликлари, пиёда юришда аста-секинлик билан ҳаракат қилиш, енгил қадам ташлаш зарурлиги тушунтирилди. Шундан сўнг, Бўстон, Гулзор, Олмазор маҳаллаларининг кўча бошчи аёллари, барча ёш тоифасидаги хотин-қизлар ўз маҳаллаларида фаолият олиб бораётган хотин-қизлар фаоллари бошчилигида “Соғлом ҳаёт сари 5000 қадам” тадбирида қатнашдилар.

Амударё тумани Оила ва хотин-қизлар бўлими масъул мутахассислари, ёшлар ишлари агентлиги туман бўлими, Амударё туман спорт мактаби ишчи ходимлари ҳамда Амударё тумани Тиббиёт бирлашмаси мутахассис-ходимлари шафъелигида мароқли ўтган пиёда юриш спорт машқларида иштирокчилар марказий ўйингоҳдан туман тарихий-ўлкашунослик музейигача пиёдалар йўлакчасидан юриб бордилар.

Тадбир давомида музей олдидаги шинам, баҳаво майдончада спорт мактаби мутахассислари томонидан бадантарбия машқлари ўтказилди.

“Саломатлик сари 5000 қадам” пиёда юриш спорт машқларида жами 168 нафар киши иштирок этишди ва тадбир якунида уларнинг барчаси пиёда юриш орқали ўзларини тетик ва бардам ҳис қилаётганликларини айтишиб, пиёда юришни ҳар куни, ҳар ким ихтиёрий равишда амалга ошириши зарурлигини таъкидладилар.

Айниқса, эрталабки пиёда юриш ва бадантарбия машқлари инсоннинг ҳар томонлама фаоллашувига, турли хил касалликларга чалиниш хавфини камайтиришга, шунингдек, кекса ёшдаги кишиларнинг таянч, бўғим ҳаракатларидаги муаммоларни имкон қадар камайтиришига олиб келиши ҳақида туман Тиббиёт бирлашмаси ходимлари томонидан берилган зарур тавсиялардан мамнун бўлдилар.

Робия ЙЎЛДОШЕВА.