“SALOMATLIK SARI 5000 QADAM” OMMAVIY SPORT MAShQLARI OʻTKAZILDI

Jismoniy faollik insonga nafaqat salomatlik baxsh etadi, balki kayfiyatini yaxshilaydi, kun boʻyi ishda va oʻqishda tetiklik bilan oʻz faoliyatini yuritish imkonini beradi. Shu bois, butun mamlakatimiz boʻylab, aholi oʻrtasida haftaning maʼlum bir kunida “Salomatlik kunlari”ni oʻtkazish, ushbu tadbirga barcha yoshdagi fuqarolarni keng qamrab olish maqsadida “Sogʻlom hayot sari 5000 qadam” piyoda yurish ommaviy sport mashqlari tashkil etilmoqda. Shunisi eʼtiborliki, mazkur tadbir doirasida ertalabki badantarbiya mashqlari ham bajarilayotgani ishtirokchilarda qiziqish uygʻotib, ularga koʻtarinki kayfiyat bagʻishlamoqda.

Joriy yilning 17-iyul sanasida Amudaryo tumanining Mangʻit shahri hududidagi mahallalar aholisi ishtirokida ham “Sogʻlom hayot sari 5000 qadam” piyoda yurish ommaviy sport mashqlari tashkil etildi.

Aholining ixtiyoriy ravishda, jipsligi asosida oʻtkazilgan mazkur tadbirda nafaqat Mangʻit shahri, balki shahar atrofidagi ovul va mahallalarda yashovchi aholi vakillari va yoshlar ham ishtirok etishdi.

Ommaviy mashqlarda tumanning Amir Temur nomli, Arna boʻyi, Doʻstlik, Beruniy nomli, Oybek nomli, Bosuv, Yangiobod ovul va mahalla fuqarolar yigʻinlarida faoliyat olib boruvchi yoshlar yetakchilari boshchiligidagi mazkur ovul va mahallalar yoshlari faollik koʻrsatdilar.

Tadbirda turli yosh toifasidagi ayol-qizlarning ishtirokiga alohida eʼtibor qaratildi. Xususan, ularning birdaniga oʻta faollik bilan tez harakatlanmasliklari, piyoda yurishda asta-sekinlik bilan harakat qilish, yengil qadam tashlash zarurligi tushuntirildi. Shundan soʻng, Boʻston, Gulzor, Olmazor mahallalarining koʻcha boshchi ayollari, barcha yosh toifasidagi xotin-qizlar oʻz mahallalarida faoliyat olib borayotgan xotin-qizlar faollari boshchiligida “Sogʻlom hayot sari 5000 qadam” tadbirida qatnashdilar.

Amudaryo tumani Oila va xotin-qizlar boʻlimi masʼul mutaxassislari, yoshlar ishlari agentligi tuman boʻlimi, Amudaryo tuman sport maktabi ishchi xodimlari hamda Amudaryo tumani Tibbiyot birlashmasi mutaxassis-xodimlari shafʼeligida maroqli oʻtgan piyoda yurish sport mashqlarida ishtirokchilar markaziy oʻyingohdan tuman tarixiy-oʻlkashunoslik muzeyigacha piyodalar yoʻlakchasidan yurib bordilar.

Tadbir davomida muzey oldidagi shinam, bahavo maydonchada sport maktabi mutaxassislari tomonidan badantarbiya mashqlari oʻtkazildi.

“Salomatlik sari 5000 qadam” piyoda yurish sport mashqlarida jami 168 nafar kishi ishtirok etishdi va tadbir yakunida ularning barchasi piyoda yurish orqali oʻzlarini tetik va bardam his qilayotganliklarini aytishib, piyoda yurishni har kuni, har kim ixtiyoriy ravishda amalga oshirishi zarurligini taʼkidladilar.

Ayniqsa, ertalabki piyoda yurish va badantarbiya mashqlari insonning har tomonlama faollashuviga, turli xil kasalliklarga chalinish xavfini kamaytirishga, shuningdek, keksa yoshdagi kishilarning tayanch, boʻgʻim harakatlaridagi muammolarni imkon qadar kamaytirishiga olib kelishi haqida tuman Tibbiyot birlashmasi xodimlari tomonidan berilgan zarur tavsiyalardan mamnun boʻldilar.

Robiya YOʻLDOShEVA.