Олмазор − обод ва фаровон маҳалла

Маҳалла — Ватан ичидаги кичик Ватан. У қанчалик обод бўлса, юртимиз шунчалик обод, халқимиз турмуши фаровон бўлади. Мамлакатимизда кенг кўламли ислоҳотлар, аввало, маҳаллаларда, ҳар бир инсон ҳаётида бўй кўрсатишини таъминлашга устувор аҳамият қаратилаётганининг сабаби ҳам шу.

Амударё телевидениеси таҳририяти маҳалла тизимида амалга оширилаётган ислоҳотларни, мана шу ислоҳотлар натижасида маҳаллаларда рўй бераётган ўзгариш ва янгиланишларни телеканалда кенг ёритиб келмоқда. Олий Мажлис ҳузуридаги Нодавлат нотижорат ташкилотларни ва фуқаролик жамиятининг бошқа институтларини қўллаб-қувватлаш Жамоат фонди томонидан молиялаштирилган “Юксак маънавиятли ва ахлоқли ёшлар – келажак пойдевори” номли грант лойиҳаси доирасида ҳам маънавий ва маърифий ишлар яхши йўлга қўйилган энг намунали маҳаллалар фаолияти ҳақида кўплаб кўрсатувлар тайёрланиб, эфирга узатилмоқда.

Телеканал ижодий гуруҳи грант лойиҳаси доирасида маҳаллалардаги намунали оилалар билан танишиш мақсадида Манғит шаҳрининг Олмазор маҳалласига ташриф буюрди.

Айтиш лозимки, Олмазор маҳалласи тумандаги энг намунали, обод ва фаровон маҳаллалардан бири ҳисобланади. Ушбу маҳаллада фаолият юритувчи маҳалла тизими ходимларининг, қолаверса, кўча бошчиларининг ўзаро ҳамкорлик ва ҳамжиҳатликда иш олиб боришлари туфайли жорий йилнинг ўтган 6 ойи мобайнида маҳаллада биронта ҳам ажрим ҳолати кузатилмади. Сабаби, маҳаллада узоқ йиллардан буён ҳамжиҳатликда яшаб келаётган оилаларнинг ёш оилаларга ҳар томонлама ўрнак бўлиб келаётгани, янги турмуш қурган оилаларнинг тинч- тотувликда, аҳил-иноқликда яшашларида муҳим аҳамиятга эга бўлмоқда.

Ёш оилаларга ҳар томонлама ўрнак бўлиб келаётган мана шундай оилалардан бири Рустам ака Юсуповнинг оиласидир. Рустам ака турмуш ўртоғи Роза опа билан узоқ йиллардан буён ўзаро оғизбирчиликда яшаб, икки қиз ва бир нафар ўғил фарзандни тарбиялаб вояга етказди. Фарзандларига ёшлик пайтидан тўғри тарбия бериб, ҳалол луқма едирди.

Ўзининг меҳнат фаолияти давомида ҳамкасбларига ҳурмат-иззатда бўлиб, элнинг дуосини олди. Шу сабабдан ҳамми, фарзандлар отанинг мукаммал тарбиясини олиб, нуфузли олийгоҳларда таълим-тарбия олдилар. Ўзлари танлаган касбнинг етук мутахассиси бўлиб етишдилар. Юлдузхон ва Наргизахон қизлари турмуш қургач, турмуш ўртоғининг хизмат вазифаси сабаб ота-онасидан олисроқда – Навоий ва Тошкент шаҳарларида яшашади. Аммо, суюкли онанинг берган оқилона тарбияси уларга ҳамиша ҳамроҳ.

Оиладаги соғлом маънавий муҳит, невараларга берилаётган эътибор туфайли оиланинг тўнғич невараси Расулбек рассомчиликка меҳр қўйди. 2-синфлик пайтидан “Ёш рассомлар” тўгарагига қатнашиб кўплаб танловларда ғолибликни қўлга киритди. Ёшгина бўлишига қарамасдан, набирасининг эришаётган ютуқ ва муваффақиятларидан бобоси ва бувиси ғурурланиб, унинг келажакда таниқли рассом бўлиб етишиши учун ҳамиша дуо қилади.

Жорий йилнинг ўтган 6 ойи давомида Олмазор маҳалла фуқаролар йиғини раиси Азат Мадраимов, ҳоким ёрдамчиси Ҳамро Йўлдашев, хотин-қизлар фаоли Ўрозгул Якубова, профилактика инспектори Муслимбек Жабборберганов, ёшлар етакчиси Алибек Собировларнинг ўзаро ҳамкорликда ва ҳамжиҳатликда фаолият юритишлари натижасида оилавий ажримлар, ёшлар ўртасидаги ҳуқуқбузарликлар, жиноятлар содир этилмади.

Маҳалла ходимлари, кўча бошчилари, “Оқила аёллар ҳаракати” аъзолари маҳалладаги ҳар бир оиланинг яшаш шароити, турмуш тарзидан доимий равишда бохабар бўлиб турадилар. Маҳалладаги мавжуд муаммоларни эса биргаликда бамаслаҳат ҳал қиладилар.

Рустам ака сингари кўпни кўрган, тажрибали эл оғаларининг ташаббускорлиги, маҳалла аҳолисини бирлаштира олишдек қобилиятлари туфайли маҳалла ҳудуди янада обод бўлиб бормоқда.

Шу ўринда айтиш лозимки, ҳар қандай мамлакат ва давлатнинг энг катта бойлиги, кучи қудрати бу унинг бағрида яшаётган оилалар ва аҳолидир. Юрт тинчлиги оилалар тинчлигидан, эл-юрт фаровонлиги оилалар фаровонлигидан пайдо бўлади.

Олмазор маҳалласида яшовчи Рустам ака ва Роза опанинг оиласи сингари бағри бутун, обод оилаларда мамлакатимиз келажаги бўлган маънавий баркамол авлод вояга етади, униб-ўсади. Мана шундай баркамол ёшларнинг эса Ватан тараққиёти ва юрт равнақига муносиб ҳисса қўшишлари шубҳасиз.

Фотима Эшимбетова.