Olmazor − obod va farovon mahalla

Mahalla — Vatan ichidagi kichik Vatan. U qanchalik obod boʻlsa, yurtimiz shunchalik obod, xalqimiz turmushi farovon boʻladi. Mamlakatimizda keng koʻlamli islohotlar, avvalo, mahallalarda, har bir inson hayotida boʻy koʻrsatishini taʼminlashga ustuvor ahamiyat qaratilayotganining sababi ham shu.

Amudaryo televideniyesi tahririyati mahalla tizimida amalga oshirilayotgan islohotlarni, mana shu islohotlar natijasida mahallalarda roʻy berayotgan oʻzgarish va yangilanishlarni telekanalda keng yoritib kelmoqda. Oliy Majlis huzuridagi Nodavlat notijorat tashkilotlarni va fuqarolik jamiyatining boshqa institutlarini qoʻllab-quvvatlash Jamoat fondi tomonidan moliyalashtirilgan “Yuksak maʼnaviyatli va axloqli yoshlar – kelajak poydevori” nomli grant loyihasi doirasida ham maʼnaviy va maʼrifiy ishlar yaxshi yoʻlga qoʻyilgan eng namunali mahallalar faoliyati haqida koʻplab koʻrsatuvlar tayyorlanib, efirga uzatilmoqda.

Telekanal ijodiy guruhi grant loyihasi doirasida mahallalardagi namunali oilalar bilan tanishish maqsadida Mangʻit shahrining Olmazor mahallasiga tashrif buyurdi.

Aytish lozimki, Olmazor mahallasi tumandagi eng namunali, obod va farovon mahallalardan biri hisoblanadi. Ushbu mahallada faoliyat yurituvchi mahalla tizimi xodimlarining, qolaversa, koʻcha boshchilarining oʻzaro hamkorlik va hamjihatlikda ish olib borishlari tufayli joriy yilning oʻtgan 6 oyi mobaynida mahallada bironta ham ajrim holati kuzatilmadi. Sababi, mahallada uzoq yillardan buyon hamjihatlikda yashab kelayotgan oilalarning yosh oilalarga har tomonlama oʻrnak boʻlib kelayotgani, yangi turmush qurgan oilalarning tinch- totuvlikda, ahil-inoqlikda yashashlarida muhim ahamiyatga ega boʻlmoqda.

Yosh oilalarga har tomonlama oʻrnak boʻlib kelayotgan mana shunday oilalardan biri Rustam aka Yusupovning oilasidir. Rustam aka turmush oʻrtogʻi Roza opa bilan uzoq yillardan buyon oʻzaro ogʻizbirchilikda yashab, ikki qiz va bir nafar oʻgʻil farzandni tarbiyalab voyaga yetkazdi. Farzandlariga yoshlik paytidan toʻgʻri tarbiya berib, halol luqma yedirdi.

Oʻzining mehnat faoliyati davomida hamkasblariga hurmat-izzatda boʻlib, elning duosini oldi. Shu sababdan hammi, farzandlar otaning mukammal tarbiyasini olib, nufuzli oliygohlarda taʼlim-tarbiya oldilar. Oʻzlari tanlagan kasbning yetuk mutaxassisi boʻlib yetishdilar. Yulduzxon va Nargizaxon qizlari turmush qurgach, turmush oʻrtogʻining xizmat vazifasi sabab ota-onasidan olisroqda – Navoiy va Toshkent shaharlarida yashashadi. Ammo, suyukli onaning bergan oqilona tarbiyasi ularga hamisha hamroh.

Oiladagi sogʻlom maʼnaviy muhit, nevaralarga berilayotgan eʼtibor tufayli oilaning toʻngʻich nevarasi Rasulbek rassomchilikka mehr qoʻydi. 2-sinflik paytidan “Yosh rassomlar” toʻgaragiga qatnashib koʻplab tanlovlarda gʻoliblikni qoʻlga kiritdi. Yoshgina boʻlishiga qaramasdan, nabirasining erishayotgan yutuq va muvaffaqiyatlaridan bobosi va buvisi gʻururlanib, uning kelajakda taniqli rassom boʻlib yetishishi uchun hamisha duo qiladi.

Joriy yilning oʻtgan 6 oyi davomida Olmazor mahalla fuqarolar yigʻini raisi Azat Madraimov, hokim yordamchisi Hamro Yoʻldashev, xotin-qizlar faoli Oʻrozgul Yakubova, profilaktika inspektori Muslimbek Jabborberganov, yoshlar yetakchisi Alibek Sobirovlarning oʻzaro hamkorlikda va hamjihatlikda faoliyat yuritishlari natijasida oilaviy ajrimlar, yoshlar oʻrtasidagi huquqbuzarliklar, jinoyatlar sodir etilmadi.

Mahalla xodimlari, koʻcha boshchilari, “Oqila ayollar harakati” aʼzolari mahalladagi har bir oilaning yashash sharoiti, turmush tarzidan doimiy ravishda boxabar boʻlib turadilar. Mahalladagi mavjud muammolarni esa birgalikda bamaslahat hal qiladilar.

Rustam aka singari koʻpni koʻrgan, tajribali el ogʻalarining tashabbuskorligi, mahalla aholisini birlashtira olishdek qobiliyatlari tufayli mahalla hududi yanada obod boʻlib bormoqda.

Shu oʻrinda aytish lozimki, har qanday mamlakat va davlatning eng katta boyligi, kuchi qudrati bu uning bagʻrida yashayotgan oilalar va aholidir. Yurt tinchligi oilalar tinchligidan, el-yurt farovonligi oilalar farovonligidan paydo boʻladi.

Olmazor mahallasida yashovchi Rustam aka va Roza opaning oilasi singari bagʻri butun, obod oilalarda mamlakatimiz kelajagi boʻlgan maʼnaviy barkamol avlod voyaga yetadi, unib-oʻsadi. Mana shunday barkamol yoshlarning esa Vatan taraqqiyoti va yurt ravnaqiga munosib hissa qoʻshishlari shubhasiz.

Fotima Eshimbetova.