МАҲАЛЛАЛАРДА ВА ОИЛАЛАРДА ИЖТИМОИЙ-МАЪНАВИЙ МУҲИТ БАРҚАРОРЛИГИНИ АСРАШГА ДОИР ДАВРА СУҲБАТИ ЎТКАЗИЛДИ
Маҳаллалардаги ижтимоий-маънавий муҳитни янада соғломлаштириш, юртдошларимизда ёмон иллатларга нисбатан муросасизликни шакллантириш кабилар юртдаги тинчлик ва осойишталикни таъминлашда муҳим аҳамият касб этади. Бу борада, айниқса, давлат ва жамоат ташкилотлари билан ҳамкорликда иш олиб борилса, маҳаллалар ва оилаларда меҳр-оқибат ва ҳамжиҳатликни мустаҳкамлаш, турли иллатларга барҳам бериш, оилавий ажрашишлар ва жиноятчиликнинг олдини олиш ва бошқа долзарб масалаларда самарали натижаларга эришилиши шубҳасиздир.
28 июль куни Фаровон маҳалласида www.amunews.uz веб-сайтининг “Соғлом муҳит – соғлом” лойиҳаси доирасида маҳаллаларда, оилаларда ижтимоий-маънавий муҳит барқарорлигига салбий таъсир кўрсатувчи ҳолатлар, ўз жонига қасд қилиш, гиёҳвандлик, эрта никоҳнинг олдини олиш кабилар борасида амалга оширилаётган ишлар хусусида фикр алмашиш мақсадида давра суҳбати ташкил этилди. Ушбу тадбирда туман оммавий ахборот воситалари ходимлари, Ички ишлар бўлимининг Хотин-қизлар масалалари бўйича инспектори Инобат Ўрозматова, Аёлларни реабилитация қилиш ва мослаштириш Қорақалпоғистон Республикаси туманлараро маркази директори Гавҳар Чимбайчиева, маҳалладаги ҳоким ёрдамчиси Муқаддас Бекназарова ҳамда маҳалладаги кўчабошчи ва фаол аёллар иштирок этишди.
Тадбирда дастлаб “Соғлом муҳит – соғлом” лойиҳаси доирасида амалга оширилиши кўзда тутилган режалар, ўтказилаётган тадбирлар хусусида маълумот берилиб, ижтимоий-маънавий муҳитга салбий таъсир кўрсатувчи иллатларга қарши курашишда турли ташкилотлар билан ҳамкорликда иш олиб борилаётгани, самарали натижаларга эришилаётгани ҳақида сўз юритилди. Шунингдек, маҳалладаги ҳоким ёрдамчиси Муқаддас Бекназарова бундай ҳолатларнинг олдини олиш борасида маҳаллада олиб борилаётган ишлар ҳақида тўхталди. Ҳудудда бандликни таъминлаш, жиноятчиликлар ва ҳуқуқбузарликлар профилактикасини самарали амалга ошириш, аҳоли, айниқса, ёшлар ва хотин-қизларни ижтимоий қўллаб-қувватлашга қаратилган қатор ишлар олиб борилаётганини қайд этиб ўтди. Ички ишлар бўлимининг Хотин-қизлар масалалари бўйича инспектори Инобат Ўрозматова ҳам ажралиш ёқасида турган оилаларни сақлаб қолиш, тазйиқ ва зўравонликка учраган хотин-қизларга “ҳимоя ордери”ни бериш ва уларнинг бузилган ҳуқуқларини тиклаш, маҳаллаларда жиноятчиликка қарши курашиш ва уларнинг барвақт олдини олиш, жиноятдан ҳоли муҳитни шакллантириш, жиноят содир этилишига йўл қўймаслик борасида Бўлим томонидан ҳам кенг кўламли ишлар амалга оширилаётганини алоҳида таъкидлади.
Аёлларни реабилитация қилиш ва мослаштириш Қорақалпоғистон Республикаси туманлараро маркази директори Гавҳар Чимбайчиева эса оғир ижтимоий вазиятга тушиб қолган нотинч оилаларда ижтимоий-маънавий муҳитни шакллантириш борасидаги чора-тадбирлар ва эришилаётган натижалар, шунингдек, бир қатор ечимини кутаётган муаммолар ва уларнинг ечимлари хусусида ўз таклифлари, фикрларини баён этди.
Ундан ташқари, оилавий ажралишлар, ишсизлик, нотинч оилалар, ижтимоий ҳимояга муҳтож хотин-қизлар, кам таъминланган оилалар, уюшмаган ёшлар ва тарбияси оғир вояга етмаганлар сонининг ўсиш ҳолатлари камаймаётгани, содир этилган ва олди олиниши мумкин бўлган жиноятлар, хотин-қизлар ва ёшлар томонидан қўл урилаётган жиноятлар мавжудлиги ачиниш билан тилга олинди. Аҳолининг маънавий тушунчаларини бойитиш, миллий-ахлоқий ва ҳуқуқий тарбиясини, бой адабий меросимизга бўлган меҳрини шакллантиришда маҳалла институтининг ролини янада ошириш, хусусан, тўй ва бошқа оилавий маросимларни ихчам ва камхарж ўтказиш масалалари ҳам кенг муҳокама қилинди. Бу борада маҳалланинг кўчабошчи ва фаол аёлларининг таклиф ва мулоҳазалари тингланди. Ташкилотлар масъуллари томонидан уларни қизиқтирган барча саволларга батафсил жавоблар ҳам берилди.
Грант лойиҳаси доирасида ўтказилган давра суҳбати ниҳоятда қизиқарли ўтди ва ташкилотлар масъуллари билан бу каби тадбирларни бошқа ҳудудларда ҳам ўтказиб боришга келишиб олинди.
О.Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
