MAHALLALARDA VA OILALARDA IJTIMOIY-MAʼNAVIY MUHIT BARQARORLIGINI ASRAShGA DOIR DAVRA SUHBATI OʻTKAZILDI

Mahallalardagi ijtimoiy-maʼnaviy muhitni yanada sogʻlomlashtirish, yurtdoshlarimizda yomon illatlarga nisbatan murosasizlikni shakllantirish kabilar yurtdagi tinchlik va osoyishtalikni taʼminlashda muhim ahamiyat kasb etadi. Bu borada, ayniqsa, davlat va jamoat tashkilotlari bilan hamkorlikda ish olib borilsa, mahallalar va oilalarda mehr-oqibat va hamjihatlikni mustahkamlash, turli illatlarga barham berish, oilaviy ajrashishlar va jinoyatchilikning oldini olish va boshqa dolzarb masalalarda samarali natijalarga erishilishi shubhasizdir.

28-iyul kuni Farovon mahallasida www.amunews.uz veb-saytining “Sogʻlom muhit – sogʻlom” loyihasi doirasida mahallalarda, oilalarda ijtimoiy-maʼnaviy muhit barqarorligiga salbiy taʼsir koʻrsatuvchi holatlar, oʻz joniga qasd qilish, giyohvandlik, erta nikohning oldini olish kabilar borasida amalga oshirilayotgan ishlar xususida fikr almashish maqsadida davra suhbati tashkil etildi. Ushbu tadbirda tuman ommaviy axborot vositalari xodimlari, Ichki ishlar boʻlimining Xotin-qizlar masalalari boʻyicha inspektori Inobat Oʻrozmatova, Ayollarni reabilitatsiya qilish va moslashtirish Qoraqalpogʻiston Respublikasi tumanlararo markazi direktori Gavhar Chimbaychiyeva, mahalladagi hokim yordamchisi Muqaddas Beknazarova hamda mahalladagi koʻchaboshchi va faol ayollar ishtirok etishdi.

Tadbirda dastlab “Sogʻlom muhit – sogʻlom” loyihasi doirasida amalga oshirilishi koʻzda tutilgan rejalar, oʻtkazilayotgan tadbirlar xususida maʼlumot berilib, ijtimoiy-maʼnaviy muhitga salbiy taʼsir koʻrsatuvchi illatlarga qarshi kurashishda turli tashkilotlar bilan hamkorlikda ish olib borilayotgani, samarali natijalarga erishilayotgani haqida soʻz yuritildi. Shuningdek, mahalladagi hokim yordamchisi Muqaddas Beknazarova bunday holatlarning oldini olish borasida mahallada olib borilayotgan ishlar haqida toʻxtaldi. Hududda bandlikni taʼminlash, jinoyatchiliklar va huquqbuzarliklar profilaktikasini samarali amalga oshirish, aholi, ayniqsa, yoshlar va xotin-qizlarni ijtimoiy qoʻllab-quvvatlashga qaratilgan qator ishlar olib borilayotganini qayd etib oʻtdi. Ichki ishlar boʻlimining Xotin-qizlar masalalari boʻyicha inspektori Inobat Oʻrozmatova ham ajralish yoqasida turgan oilalarni saqlab qolish, tazyiq va zoʻravonlikka uchragan xotin-qizlarga “himoya orderi”ni berish va ularning buzilgan huquqlarini tiklash, mahallalarda jinoyatchilikka qarshi kurashish va ularning barvaqt oldini olish, jinoyatdan holi muhitni shakllantirish, jinoyat sodir etilishiga yoʻl qoʻymaslik borasida Boʻlim tomonidan ham keng koʻlamli ishlar amalga oshirilayotganini alohida taʼkidladi.

Ayollarni reabilitatsiya qilish va moslashtirish Qoraqalpogʻiston Respublikasi tumanlararo markazi direktori Gavhar Chimbaychiyeva esa ogʻir ijtimoiy vaziyatga tushib qolgan notinch oilalarda ijtimoiy-maʼnaviy muhitni shakllantirish borasidagi chora-tadbirlar va erishilayotgan natijalar, shuningdek, bir qator yechimini kutayotgan muammolar va ularning yechimlari xususida oʻz takliflari, fikrlarini bayon etdi.

Undan tashqari, oilaviy ajralishlar, ishsizlik, notinch oilalar, ijtimoiy himoyaga muhtoj xotin-qizlar, kam taʼminlangan oilalar, uyushmagan yoshlar va tarbiyasi ogʻir voyaga yetmaganlar sonining oʻsish holatlari kamaymayotgani, sodir etilgan va oldi olinishi mumkin boʻlgan jinoyatlar, xotin-qizlar va yoshlar tomonidan qoʻl urilayotgan jinoyatlar mavjudligi achinish bilan tilga olindi. Aholining maʼnaviy tushunchalarini boyitish, milliy-axloqiy va huquqiy tarbiyasini, boy adabiy merosimizga boʻlgan mehrini shakllantirishda mahalla institutining rolini yanada oshirish, xususan, toʻy va boshqa oilaviy marosimlarni ixcham va kamxarj oʻtkazish masalalari ham keng muhokama qilindi. Bu borada mahallaning koʻchaboshchi va faol ayollarining taklif va mulohazalari tinglandi. Tashkilotlar masʼullari tomonidan ularni qiziqtirgan barcha savollarga batafsil javoblar ham berildi.

Grant loyihasi doirasida oʻtkazilgan davra suhbati nihoyatda qiziqarli oʻtdi va tashkilotlar masʼullari bilan bu kabi tadbirlarni boshqa hududlarda ham oʻtkazib borishga kelishib olindi.

O.Xudoyberganova.