ЭҲТИЁЖМАНД ОИЛА ЯНГИ ЗАМОНАВИЙ УЙГА КЎЧИБ ЎТДИ

Ўзбекистон Республикаси Президентининг 2022 йил 1 ноябрдаги “Оролбўйи минтақасини барқарор ривожлантириш бўйича ишларнинг самарадорлигини ошириш чора-тадбирлари тўғрисида”ги Фармонига асосан Қорақалпоғистон Республикасида ўтказилган ўрганишлар натижасида аниқланган шароити оғир оилалар ва фуқароларни қўллаб-қувватлаш ҳамда овул ва маҳаллалар инфратузилмасини ривожлантиришга оид Вазирлар Маҳкамиси қарори қабул қилинган эди.

Мазкур қарорга мувофиқ Республикамиздаги барча овул ва қишлоқлардаги аҳоли турар жойлари ҳамда ички йўллар ҳолати бўйича ўтказилган хатловда оғир турмуш шароитидаги оилаларга тегишли 21 минг 94та уй-жойларнинг том қисмини таъмирлаш ҳамда 709та яшаш учун яроқсиз ва авария ҳолатидаги уй-жойларни янгидан қуриш, жанубий туманлардаги 2 минг километр тупроқ йўлларга қум-шағал ётқизиш белгиланган эди.

Шунингдек, Ўзбекистон Республикаси Вазирлар Маҳкамасининг 2022 йил 31 мартдаги “Хотин-қизлар муаммоларини ўрганиш ва ҳал этиш тизимини янада такомиллаштириш чора-тадбирлари тўғрисида”ги қарорида ижтимоий аҳволи ва турмуш шароити оғир, ишсиз ва ижтимоий фаол бўлмаган хотин-қизлар билан “Аёллар дафтари”ни юритиш орқали ишлаш тизимини янада такомиллаштириш, уларни ижтимоий-ҳуқуқий, психологик, тиббий ва моддий қўллаб-қувватлаш кўзда тутилган.

Юқоридаги ҳужжатларга асосан 2023 йилда Амударё туманидаги шароити оғир 1858та оиланинг яшаш уйининг том қисмини ёпиш, яроқсиз ҳолга келиб қолган авария ҳолатидаги 12та уйни эса янгидан қуриш режалаштирилган ва бу борадаги ишлар аллақачон бошлаб юборилган.

Тўлқин овулида истиқомат қилувчи Қутлимурат Айтаков ва Гулора Аҳмедовалар бир умр фермер хўжалигида меҳнат қилишди. Ҳалол меҳнатлари эвазига икки ўғилни оқ ювиб, оқ тараб вояга етказишди. Бироқ кейинги йилларда иккови ҳам сурункали касаликка чалиниб, даволаниш учун анча маблағ сарфлаб келишаётган эди. Оғир ишга ярамай уйда ўтириб қолган ота-онага тўнғич ўғил мавсумий ишларда ишлаб суянч бўлаётган бўлсада, турмуши оғирлигича қолаётганди.

Давлатимизнинг инсонпарварлик сиёсати уларнинг ҳаётига ҳам улкан қувонч олиб кириб, эртанги кунига умид бағишлади. Жорий йил бошиданоқ мазкур оилага 222 миллион 600 сўм маблағ эвазига уч хонали янги уй қуриб беришга киришилди.

Қурилиш ишлари “Манғит қурилиш инвест” масъулияти чекланган жамияти томонидан қисқа муддатларда сифатли қилиб адо этилди.

2023 йилнинг 7 сентябрь куни уй-жой қурилиши тугалланиб, иморат тантанали равишда эгаларига топширилди.

Шу муносабат билан ташкил этилган тадбирда туман ҳокими ўринбосари, Оила ва хотин-қизлар бўлими бошлиғи Гўзал Собурова, Тўлқин овул фуқаролар йиғини раиси Рашид Абдугалиев, ҳоким ёрдамчиси Руслан Сағинбоев, хотин-қизлар фаоли Гавҳар Боботоева, ёшлар етакчиси Фозилбек Қурбонбоев, кўча бошчилари, овул имоми Бозорбой Собуров ва маҳалла фаоллари иштирок этдилар.

Туман ҳокими ўринбосари, Оила ва хотин-қизлар бўлими бошлиғи Гўзал Собурова, овул фуқаролар йиғини раиси Рашид Абдугалиевлар Қутлимурод Айтаков ва Гулора Аҳмедоваларни янги ҳовли-жой билан қутлаб, соғ-саломат яшашларини, узоқ йиллар умр кўришларини тиладилар.

Овулнинг Боғонали аҳоли пунктида, замонавий услубда янгидан шинам уй қурилиб, эҳтиёжманд оилага топширилганидан тадбир иштирокчиларининг барчаси мамнун бўлишди. Овул имоми ҳам Қутлимурод Айтаков ва Гулора Аҳмедоваларга янги ҳовли-жой хайрли бўлишини тилаб дуо қилди.

Турмушда қийналган оилага давлатимиз томонидан қуриб берилган ушбу кўркам ва ихчам ҳовли давлатимиз инсонпарварлигининг ёрқин тимсоли бўлди, дейиш мумкин.

Туман ҳокимлиги Ахборот хизмати