“Аҳмедов Ражаббой” фермер хўжалигида пахта йиғим-терими авжида

Айни кунларда барча жойларда бўлгани каби Амударё туманидаги пахта далаларида ҳам йил-ўн икки ой фидойилик билан қилинган меҳнатлар эвазига бунёдга келагн пахта ҳосилини йиғиб-териб олиш учун ҳаракат қилаётган фермер хўжаликлари хирмони кун сайин юксалмоқда.

Амударёлик пахтакорлар кузнинг қуёшли кунларини ғанимат билиб, далаларда оппоқ бўлиб очилиб турган ҳосилни тезроқ йиғиб-териб олиш мақсадида тинимсиз меҳнат қилмоқдалар. Уюшмаган ишсиз аҳоли ҳам пахта йиғим-терими мавсумида меҳнат қилишиб, яхшигина даромад олишмоқда.

“Аҳмедов Ражаббой” фермер хўжалиги аъзолари ҳам мавсумни уюшқоқлик билан ўтказмоқдалар. Фермер хўжалиги айни кунларда пахта топшириш бўйича йиллик контрактация шартномаси шартларини бажариш арафасида турибди.

Мазкур фермер хўжалигининг 81 гектар майдонига эрта баҳорда чигит экилган эди. Мазкур майдонларда бир текис униб чиққан ниҳоллар сифатли парвариш қилиниб, мўл ҳосил бунёдга келишига эришилди.

Шу кунгача хўжалик далаларидан 180 нафар пудратчилари кўмагида 250 тонна пахта териб олинди. Мазкур фермер хўжалиги масъулияти чекланган жамият шаклидаги “Amudaryotex” хорижий корхонаси пахта-тўқимачилик кластери билан жами 275 тонна пахта топшириш бўйича контрактация шартномасини тузган. Ушбу шартномага мувофиқ шу кунгача 250 тоннага яқин пахта хом ашёси етказиб берилди. Терим шу суръатда давом этса, шартнома шартлари яқин кунларда адо этилади. Шу сабабли айни кунларда фермер хўжалиги далаларида пахта йиғим-терими ишлари қизғин давом этмоқда.

Куз ­– деҳқонларнинг йил бўйи қилган меҳнатлари сарҳисобини қиладиган фасл ҳисобланади. Бу даврда етиштирилган ҳосил йиғиштириб олиниб, келгуси йил деҳқончилигига тайёргарлик кўрилади. Фермер-деҳқонларнинг йил бўйи қилган меҳнати бугун ўз самарасини бермоқда. Уларнинг машаққатли меҳнати эвазига етиштирилган пахтани теримчилар ёғин-сочинли кунларга қолдирмасдан териб олиш ҳамда оилаларига қўшимча даромад келтиришга астойдил ҳаракат қилишмоқда. Кунига 80-100 килограммгача пахта териб, туманимиз пахта хирмони юксалишига ўз ҳиссаларини қўшаётган теримчилар талайгина. Маълумот ўрнида айтиш керакки, жорий йилда амударёлик пахтакорлар ўз олдиларига улкан марраларни қўйган. Масъулияти чекланган жамият шаклидаги “Amudaryotex” хорижий корхонаси пахта-тўқимачилик кластери билан 348та пахтачилик фермер хўжаликлари ўртасида шартномалар тузилиб, жами 13 минг 900 гектар майдонга туманимиз иқлим шароитига мос серҳосил пахта навлари экилган эди.

Ғўза тарбияси билан боғлиқ барча ишлар агротехника қоидаларига мувофиқ ташкил этилгани, етиштирилган ҳосилни қисқа муддатларда йиғиб-териб олиш бўйича терим отрядлари ташкил қилиниб, уларга ёрдамчи-теримчилар бириктирилгани амударёликларнинг меҳнат зафарига замин яратмоқда.

Юртимизда пахта хирмонининг юксалишига ҳисса қўшиш оилага фойда, рўзғорга барака келтирадиган даромад манбаига айланиб бормоқда. Пахта йиғим-теримида фаол иштирок этиб, маблағ топиб, рўзғорига барака киритаётган теримчилар буни ўз ҳаётларида яққол ҳис этишмоқда.

Теримчи, ишчи ва ҳашарчиларга ҳар куни тушлик маҳали иссиқ овқат, чой берилади. Терим пулларининг ўз вақтида бериб борилаётгани, илғор теримчиларга рағбат сифатида тақдим этилаётган турли совғалар уларнинг ғайратига ғайрат қўшмоқда.  

Севара ИСМОИЛОВА