Амударё туманида тиббиёт ходимлари куни кенг нишонланди
Юртимизда ҳар йили ноябрь ойининг иккинчи якшанбаси тиббиёт ходимлари куни деб белгиланиб, байрам сифатида нишонланиши давлатимиз ва жамиятимизнинг саломатлигимиз посбонларига нисбатан юксак эътибор ва ҳурматининг яққол намунасидир. Амударё туманида ҳам ушбу сана ҳар йили кенг тантана қилинади, тиббиёт фидойилари, тажрибали шифокорлар, фахрийлар учун тадбирлар ташкиллаштирилади.
Анъанага мувофиқ 11 ноябрь куни Манғит шаҳридаги файзли “Хон” тўйхонасида тадбир ўтказилиб, беморлар дардига дармон бўлгувчи шарафли касб эгалари – шифокор ҳамда ҳамширалар учун туман ҳокимлиги ҳамда туман Тиббиёт бирлашмаси томонидан байрам дастурхони ёзилди.
Тантанали тадбирда туман ҳокими Собир Хўжаметов, секторлар раҳбарлари, халқ саломатлиги йўлида, фидойилик билан меҳнат қилаётган тиббиёт ходимлари иштирок этишди.
Шифокорлар ҳар даврнинг қаҳрамонлари ҳисобланади. Дунё яралибдики, ушбу шарафли касб ўз қадри ва аҳамиятини йўқотмаган. Бугун ҳам тиббиёт ходимлари ҳар қачонгидан ҳам кўпроқ, бошқа касб эгаларидан-да зиёда эъзозга, эътирофга сазовордир.
Тадбир аввалида туман ҳокими Собир Хўжаметов туманимиздаги барча тиббиёт ходимларини 12 ноябрь – тиббиёт ходимлари куни муносабати билан табриклаб, уларнинг шарафли ишларида муваффақиятлар тилади ҳамда тиббиёт соҳасида амалга оширилаётган ислоҳотлар, эришилаётган ютуқларга ҳам тўхталиб ўтди.
Байрам кечасида халқ саломатлиги йўлида фидокорона меҳнат қилаётган бир гуруҳ шифокор ва ҳамширалар ташаккурномалар ҳамда эсдалик совғалари билан тақдирланди. Шунингдек, тиббиёт соҳасида кўп йиллардан буён самарали меҳнат қилиб келаётган соҳа вакилларига туман ҳокимлиги ҳамда Тиббиёт бирлашмаси томонидан фахрий ёрлиқлар топширилди.
Айтиш жоизки, бугунги кунда туман Тиббиёт бирлашмасида 295 нафар шифокорлар фаолият юритиб келмоқда. Шундан 189 нафари тоифага эга шифокорлардир. Аҳоли саломатлигини мустаҳкамлаш йўлида Тиббиёт бирлашмаси таркибида 415 ўринли Марказий шифохона, 36 ўринли хўжалик ҳисобидаги Реабилитация бўлими, 14та амбулатория-поликлиника муассасалари, жумладан, 1та кўп тармоқли Марказий поликлиника, 9та Оилавий поликлиника ва 4та Оилавий шифокорлик пунктлари хизмат кўрсатиб келмоқда.
Туман ҳудудидаги овул ва қишлоқлар аҳолисига оилавий поликлиникалар ва шифокорлик пунктлари орқали тиббий хизмат кўрсатиш йўлга қўйилган. Ушбу тиббиёт муассасаларига 24 минг 293 та хонадондаги 134 минг 733 нафар аҳоли бириктирилган. Муассасаларда 91 нафар умумий амалиёт шифокорлари, 328 нафар ўрта тиббиёт ходимлари, шундан 212 нафар патронаж ҳамширалари малакали тиббий хизмат кўрсатади.
Манғит шаҳри ҳудудидаги 12 минг 669та хонадонда яшовчи 70 минг 111 нафар аҳоли эса кўп тармоқли Марказий поликлиникада йўлга қўйилган тиббий хизматдан фойдаланади. Поликлиникада 102 нафар шифокор, шундан 34 нафари умумий амалиёт шифокори ҳамда 183 нафар ўрта тиббиёт ходими, шундан 68 нафари патронаж ҳамширалари аҳоли саломатлигини асрашда фидойилик кўрсатиб келмоқда.
Байрам тадбири давомида сўзга чиққанлар тиббиёт ходимлари тимсолида ўз ҳаловатидан кечиб, кеча-ю кундуз халқ саломатлиги йўлида фидойилик билан хизмат қилувчи касб эгалари гавдаланишини таъкидлаб ўтдилар. Инсон саломатлиги жамиятнинг бебаҳо бойлиги, шифокорлар эса ана шу бойликнинг фидойи посбонлари эканлиги алоҳида қайд этилди. Бугунги кунда тиббиёт тизимида кенг кўламли ислоҳотлар изчил амалга оширилаётгани, тиббиёт муассасаларининг янгидан-янги бинолари қад ростлаб, уларнинг моддий-техник базалари мустаҳкамланаётгани миннатдорчилик билан эътироф этилди.
Туман Маданият бўлими томонидан намойиш этилган катта мусиқий дастур тадбирга янада файз киритди ва барчага байрамона кайфият улашди. Тиббиёт ходимлар кунига бағишланган байрам тадбири шўх куй-қўшиқлар ва дилрабо рақслар билан давом этди.
Чиндан-да сўнгги йилларда юртимизда тиббиёт соҳаси жуда тез ривожланмоқда. Аҳолига бирламчи тиббий хизмат кўрсатувчи қишлоқ врачлик пунктлари ва оилавий поликлиникалардан тортиб тор доирага ихтисослашган тиббиёт масканларигача барчаси давлат бюджети маблағлари ҳисобидан замонавий тарзда жиҳозланмоқда. Хусусий тиббий муассасалар ҳам аҳоли саломатлигини мустаҳкамлаш ва касалликларни даволашда илғор ҳамда замонавий тиббий ускуналар, асбоб-анжомлардан фойдаланиб, юқори кўрсаткичларга эришмоқда. Натижада аҳолининг ўртача умр кўриш кўрсаткичи ошиб, турли касалликларнинг олди олинмоқда, минглаб беморлар фидойи тиббиёт ходимларидан шифо топмоқда. Бир сўз билан айтганда, тиббиёт ходимлари инсон саломатлигини асраш ва мустаҳкамлашдек масъулиятли вазифани шараф билан адо этиб келмоқдалар.
Фурсатдан фойдаланиб, юртимизда фаолият юритаётган барча тиббиёт ходимларини касб байрамлари билан табриклаб, келгуси ишларига омад вазафарлар тилаймиз!
Туман ҳокимлиги Ахборот хизмати
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
