Amudaryo tumanida tibbiyot xodimlari kuni keng nishonlandi

Yurtimizda har yili noyabr oyining ikkinchi yakshanbasi tibbiyot xodimlari kuni deb belgilanib, bayram sifatida nishonlanishi davlatimiz va jamiyatimizning salomatligimiz posbonlariga nisbatan yuksak eʼtibor va hurmatining yaqqol namunasidir. Amudaryo tumanida ham ushbu sana har yili keng tantana qilinadi, tibbiyot fidoyilari, tajribali shifokorlar, faxriylar uchun tadbirlar tashkillashtiriladi.

Anʼanaga muvofiq 11-noyabr kuni Mangʻit shahridagi fayzli “Xon” toʻyxonasida tadbir oʻtkazilib, bemorlar dardiga darmon boʻlguvchi sharafli kasb egalari – shifokor hamda hamshiralar uchun tuman hokimligi hamda tuman Tibbiyot birlashmasi tomonidan bayram dasturxoni yozildi.

Tantanali tadbirda tuman hokimi Sobir Xoʻjametov, sektorlar rahbarlari, xalq salomatligi yoʻlida, fidoyilik bilan mehnat qilayotgan tibbiyot xodimlari ishtirok etishdi.

Shifokorlar har davrning qahramonlari hisoblanadi. Dunyo yaralibdiki, ushbu sharafli kasb oʻz qadri va ahamiyatini yoʻqotmagan. Bugun ham tibbiyot xodimlari har qachongidan ham koʻproq, boshqa kasb egalaridan-da ziyoda eʼzozga, eʼtirofga sazovordir.

Tadbir avvalida tuman hokimi Sobir Xoʻjametov tumanimizdagi barcha tibbiyot xodimlarini 12-noyabr – tibbiyot xodimlari kuni munosabati bilan tabriklab, ularning sharafli ishlarida muvaffaqiyatlar tiladi hamda tibbiyot sohasida amalga oshirilayotgan islohotlar, erishilayotgan yutuqlarga ham toʻxtalib oʻtdi.

Bayram kechasida xalq salomatligi yoʻlida fidokorona mehnat qilayotgan bir guruh shifokor va hamshiralar tashakkurnomalar hamda esdalik sovgʻalari bilan taqdirlandi. Shuningdek, tibbiyot sohasida koʻp yillardan buyon samarali mehnat qilib kelayotgan soha vakillariga tuman hokimligi hamda Tibbiyot birlashmasi tomonidan faxriy yorliqlar topshirildi.

Aytish joizki, bugungi kunda tuman Tibbiyot birlashmasida 295 nafar shifokorlar faoliyat yuritib kelmoqda. Shundan 189 nafari toifaga ega shifokorlardir. Aholi salomatligini mustahkamlash yoʻlida Tibbiyot birlashmasi tarkibida 415-oʻrinli Markaziy shifoxona, 36-oʻrinli xoʻjalik hisobidagi Reabilitatsiya boʻlimi, 14ta ambulatoriya-poliklinika muassasalari, jumladan, 1ta koʻp tarmoqli Markaziy poliklinika, 9ta Oilaviy poliklinika va 4ta Oilaviy shifokorlik punktlari xizmat koʻrsatib kelmoqda.

Tuman hududidagi ovul va qishloqlar aholisiga oilaviy poliklinikalar va shifokorlik punktlari orqali tibbiy xizmat koʻrsatish yoʻlga qoʻyilgan. Ushbu tibbiyot muassasalariga 24 ming 293 ta xonadondagi 134 ming 733 nafar aholi biriktirilgan. Muassasalarda 91 nafar umumiy amaliyot shifokorlari, 328 nafar oʻrta tibbiyot xodimlari, shundan 212 nafar patronaj hamshiralari malakali tibbiy xizmat koʻrsatadi.

Mangʻit shahri hududidagi 12 ming 669ta xonadonda yashovchi 70 ming 111 nafar aholi esa koʻp tarmoqli Markaziy poliklinikada yoʻlga qoʻyilgan tibbiy xizmatdan foydalanadi. Poliklinikada 102 nafar shifokor, shundan 34 nafari umumiy amaliyot shifokori hamda 183 nafar oʻrta tibbiyot xodimi, shundan 68 nafari patronaj hamshiralari aholi salomatligini asrashda fidoyilik koʻrsatib kelmoqda.

Bayram tadbiri davomida soʻzga chiqqanlar tibbiyot xodimlari timsolida oʻz halovatidan kechib, kecha-yu kunduz xalq salomatligi yoʻlida fidoyilik bilan xizmat qiluvchi kasb egalari gavdalanishini taʼkidlab oʻtdilar. Inson salomatligi jamiyatning bebaho boyligi, shifokorlar esa ana shu boylikning fidoyi posbonlari ekanligi alohida qayd etildi. Bugungi kunda tibbiyot tizimida keng koʻlamli islohotlar izchil amalga oshirilayotgani, tibbiyot muassasalarining yangidan-yangi binolari qad rostlab, ularning moddiy-texnik bazalari mustahkamlanayotgani minnatdorchilik bilan eʼtirof etildi.

Tuman Madaniyat boʻlimi tomonidan namoyish etilgan katta musiqiy dastur tadbirga yanada fayz kiritdi va barchaga bayramona kayfiyat ulashdi. Tibbiyot xodimlar kuniga bagʻishlangan bayram tadbiri shoʻx kuy-qoʻshiqlar va dilrabo raqslar bilan davom etdi.

Chindan-da soʻnggi yillarda yurtimizda tibbiyot sohasi juda tez rivojlanmoqda. Aholiga birlamchi tibbiy xizmat koʻrsatuvchi qishloq vrachlik punktlari va oilaviy poliklinikalardan tortib tor doiraga ixtisoslashgan tibbiyot maskanlarigacha barchasi davlat byudjeti mablagʻlari hisobidan zamonaviy tarzda jihozlanmoqda. Xususiy tibbiy muassasalar ham aholi salomatligini mustahkamlash va kasalliklarni davolashda ilgʻor hamda zamonaviy tibbiy uskunalar, asbob-anjomlardan foydalanib, yuqori koʻrsatkichlarga erishmoqda. Natijada aholining oʻrtacha umr koʻrish koʻrsatkichi oshib, turli kasalliklarning oldi olinmoqda, minglab bemorlar fidoyi tibbiyot xodimlaridan shifo topmoqda. Bir soʻz bilan aytganda, tibbiyot xodimlari inson salomatligini asrash va mustahkamlashdek masʼuliyatli vazifani sharaf bilan ado etib kelmoqdalar.

Fursatdan foydalanib, yurtimizda faoliyat yuritayotgan barcha tibbiyot xodimlarini kasb bayramlari bilan tabriklab, kelgusi ishlariga omad vazafarlar tilaymiz!

Tuman hokimligi Axborot xizmati