ТУМАНИМИЗНИНГ ТАНИҚЛИ БОКСЧИ ЎҒЛОНИ

Мамлакатимизда спорт ва жисмоний тарбияни ривожлантириш, оммавийлигини таъминлаш мақсадида амалга оширилаётган изчил чора-тадбирлар ўзининг ижобий самараларини бераётгани қувонарлидир. Ҳа, юртимиз спорт шарафини юқори кўтаришга эришаётган, халқаро миқёсда мусобақаларда ғолибликка эришаётган ёш иқтидорли спортчилар билан ҳақли равишда фахрланамиз.

Куни кечагина ниҳоясига етган катталар ўртасидаги бокс бўйича  Ўзбекистон чемпионатини ҳам юртдошларимиз завқ билан томоша қилишди ва юртимизда спортнинг бокс тури бўйича юксак иқтидорли спортчилар етишиб чиқаётганини эътироф этишди.

Эътиборлиси, ушбу мусобақада туманимизнинг Тўлқин овулида туғилган Сардор Шомуродов ҳам иштирок этиб, фахрли учинчи ўринни эгаллади ва бронза медали билан тақдирланди. Туманимиз чарм қўлқоп устаси мазкур чемпионатнинг илк жангида амалдаги Ўзбекистон чемпиони Баҳром Олимжоновни, чорак финалда икки карра Осиё чемпиони бухоролик Суҳроб Қаюмовни мағлубиятга учратди.

Сардор Шомуродов ярим финалда 2 карра жаҳон чемпионати совриндори, 2 карра Осиё чемпиони, халқаро тоифадаги спорт устаси Аълохон Абдуллаевга 3:2 ҳисобида имкониятни бой берган бўлса-да, спорт мутахассислари унинг маҳоратини юқори баҳолашди ва келажагига умид билдиришди.

Асли Тўлқин овулидаги бокс мактабида мураббий Азимжон Мухторовдан илк бокс сирларини ўрганиб, машқларда маҳоратини оширган Сардор Шомуродов кейинчалик Нукус шаҳридаги спорт мактабида ўқиб интилишларини давом эттирди. Бокс бўйича эришган ғалабалари туфайли Қорақалпоқ давлат университетига талабаликка имтиҳонсиз қабул қилинди ва олий таълим олди.

Кейинги йилларда Сардор туман спорт мактабида Жасур Нуримбетов раҳбарлигида маҳоратини оширмоқда ва ўзи ҳам бокс бўйича шуғулланаётган ўқувчиларга тренерлик қилаяпти. У туманимизда спортга улкан эътибор қаратилаётганидан айниқса, иқтидорли спортчилар қўллаб-қувватланаётганидан жуда хурсанд.

Туманимизнинг умидли боксчи ўғлони Сардор Шомуродовга доимо ғалабалар ёр бўлаверишини тилаб қоламиз.

Ойгул РАЖАБОВА.