TUMANIMIZNING TANIQLI BOKSChI OʻGʻLONI
Mamlakatimizda sport va jismoniy tarbiyani rivojlantirish, ommaviyligini taʼminlash maqsadida amalga oshirilayotgan izchil chora-tadbirlar oʻzining ijobiy samaralarini berayotgani quvonarlidir. Ha, yurtimiz sport sharafini yuqori koʻtarishga erishayotgan, xalqaro miqyosda musobaqalarda gʻoliblikka erishayotgan yosh iqtidorli sportchilar bilan haqli ravishda faxrlanamiz.
Kuni kechagina nihoyasiga yetgan kattalar oʻrtasidagi boks boʻyicha Oʻzbekiston chempionatini ham yurtdoshlarimiz zavq bilan tomosha qilishdi va yurtimizda sportning boks turi boʻyicha yuksak iqtidorli sportchilar yetishib chiqayotganini eʼtirof etishdi.
Eʼtiborlisi, ushbu musobaqada tumanimizning Toʻlqin ovulida tugʻilgan Sardor Shomurodov ham ishtirok etib, faxrli uchinchi oʻrinni egalladi va bronza medali bilan taqdirlandi. Tumanimiz charm qoʻlqop ustasi mazkur chempionatning ilk jangida amaldagi Oʻzbekiston chempioni Bahrom Olimjonovni, chorak finalda ikki karra Osiyo chempioni buxorolik Suhrob Qayumovni magʻlubiyatga uchratdi.
Sardor Shomurodov yarim finalda 2 karra jahon chempionati sovrindori, 2 karra Osiyo chempioni, xalqaro toifadagi sport ustasi Aʼloxon Abdullayevga 3:2 hisobida imkoniyatni boy bergan boʻlsa-da, sport mutaxassislari uning mahoratini yuqori baholashdi va kelajagiga umid bildirishdi.
Asli Toʻlqin ovulidagi boks maktabida murabbiy Azimjon Muxtorovdan ilk boks sirlarini oʻrganib, mashqlarda mahoratini oshirgan Sardor Shomurodov keyinchalik Nukus shahridagi sport maktabida oʻqib intilishlarini davom ettirdi. Boks boʻyicha erishgan gʻalabalari tufayli Qoraqalpoq davlat universitetiga talabalikka imtihonsiz qabul qilindi va oliy taʼlim oldi.
Keyingi yillarda Sardor tuman sport maktabida Jasur Nurimbetov rahbarligida mahoratini oshirmoqda va oʻzi ham boks boʻyicha shugʻullanayotgan oʻquvchilarga trenerlik qilayapti. U tumanimizda sportga ulkan eʼtibor qaratilayotganidan ayniqsa, iqtidorli sportchilar qoʻllab-quvvatlanayotganidan juda xursand.
Tumanimizning umidli bokschi oʻgʻloni Sardor Shomurodovga doimo gʻalabalar yor boʻlaverishini tilab qolamiz.
Oygul RAJABOVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
