ХАЛҚ СОҒЛОМ БЎЛСАГИНА ЖАМИЯТДА ЮКСАК ТАРАҚҚИЁТГА ЭРИШИЛАДИ
Ҳар ким соғлигини сақлаш ва малакали тиббий хизматдан фойдаланиш ҳуқуқига эга.
Конституциянинг 48-моддасидан.
Мамлакатимизда тиббий хизматлар сифати ва қамровини кенгайтиришга қаратилган комплекс чора-тадбирлар амалга оширилмоқда. Бу борада Амударё туманида амалга оширилаётган ишлар ҳам эътиборга молик.
Ҳозирги кунда туманимизда 1та КТМП, 9та оилавий поликлиника, 4та оилавий шифокорлик пунктлари томонидан аҳолига малакали тиббий хизмат кўрсатиб келинмоқда, шу билан бирга аҳолига тиббий хизмат кўрсатишни яқинлаштириш мақсадида 2022 йилдан 11та маҳалла тиббиёт пункти фаолияти ҳам йўлга қўйилди.
Сир эмас, авваллари бирламчи тиббий-санитария муассасаларида оилавий шифокор қабулига келган аксарият фуқароларга дори-дармонлар рецепти ёзиб берилар, бу ҳолат сурункали касаллиги бор ва шошилинч тиббий ёрдамга муҳтож беморларга, моддий имконияти чекланган оилаларга қийинчилик туғдирарди. Эндиликда Соғликни сақлаш вазирлигининг тегишли буйруғига мувофиқ, оилавий шифокорлик пунктлари, оилавий поликлиникалар, кўп тармоқли марказий поликлиникалар, туман (шаҳар) марказий шифохоналарида ва туғуруқхоналарда кўрсатиладиган тиббий ёрдамнинг кафолатланган ҳажмлари рўйхати белгиланди.
Ҳар бир фуқаро электрон дастур орқали оилавий шифокорга бириктирилади ва доимий мулоқотда бўлиш учун имконият яратилади; Давлат томонидан бепул тақдим этиладиган тиббий хизматдан фойдаланади; Асоссиз дори воситаларини тавсия этиш ва стационарга ётишга чек қўйилади. Натижада тиббий хизматлар учун норасмий тўловлар бартараф этилиб, фуқаролар соғломлаштириш дастурлари билан тўлиқ қамраб олинади.
Президентимизнинг 2020 йил 10 ноябрдаги “Аҳолининг соғлом овқатланишини таъминлаш бўйича қўшимча чора-тадбирлар тўғрисида”ги Қарорига мувофиқ туман Тиббиёт бирлашмаси мутахассислари томонидан тумандаги 49 ОФЙ ва МФЙларда, мактабларда, мактабгача таълим ташкилотлари, корхона ва ташкилотларда ҳафтанинг душанба кунлари “Стрессга қарши кураш куни” деб белгиланиб, стресс келтириб чиқарадиган касалликлар пролфилактикаси, сешанба – “Туз ва шакарни чеклаш куни”да қандли диабетдан сақланиш, чоршанба – “Тамакисиз кун”да чекишдан воз кечишнинг афзалликлари, пайшанба – “Соғлом овқатланиш куни”да соғлом овқатланиш тамойиллари тўғрисида “Саломатлик сабоқлари” тарзидаги суҳбатлар ўтказилаётгани ўзининг ижобий натижасини бермоқда.
Ҳафтанинг жума ва шанба кунлари эса шифокорлар доимо халқ билан бирга пиёда юриш ва “Саломатлик учун минг қадам” тадбирларида иштирок этишади.
Жисмоний фаолликнинг инсон саломатлигига ижобий таъсири, гиподинамия оқибатида келиб чиқадиган касалликлар профилактикаси, аҳолининг кенг қатламлари, айниқса, ёшлар ўртасида спорт, нафас машқлари техникаси, фаол юришнинг ва жисмоний машқларнинг касалликларнинг олдини олишдаги аҳамияти, аёл-қизлар саломатлиги каби мавзуларда тиббиёт бирлашмаси, ОП, ОШПлар майдончаларида, 30-сонли мактаб спорт залида, ОФЙ, МФЙлар аҳолиси, муассаса, ташкилотлар ходимлари, мактаб ва мактабгача таълим ташкилотлари ўқитувчи, ўқувчи ва тарбияланувчилари учун гимнастрада, фаол ва спортча юриш, спорт мусобақалари ташкил қилиниб, иштирокчиларга тегишли маслаҳатлар берилади.
Шуниси эътиборлики, тиббий муолажаларни спорт-соғломлаштириш машқлари билан биргаликда олиб бориш халқимизга руҳий тетиклик, кўтаринки кайфият бахш этиб, уларнинг саломатлиги мустаҳкамланишини таъминламоқда. ТТБда эса айнан шу йўналишда муолажа чораларини қўллаш учун барча шароитларга эга физиотерапия анжомлари, тренажёр зали, марказий шифохона ҳудудида спорт машғулотлари олиб бориш учун мўлжалланган махсус майдонча мавжуд.
Янгиланган Конституциямизнинг 48-моддасида белгилаб қўйилганидек, “Ҳар ким соғлигини сақлаш ва малакали тиббий хизматдан фойдаланиш ҳуқуқига эга”. Бу борада аҳоли ўртасида соғлом турмуш тарзини шакллантириш учун барча шарт-шароитлар яратиб берилган. Зеро, инсон, халқ соғлом бўлсагина жамиятда юксак тараққиётга эришилади.
Ж.ЯВКАШЕВ,
ТТБ ташкилий-услубий бўлими мудири.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
