Нима? Қачон? Қаерда? Биз борган навбатдаги манзил – 50-сонли мактаб бўлди

“Халқ учун нондан сўнг энг муҳими мактабдир” деган эди донолардан бири. Дарҳақиқат, мактабда олинган билим, савод инсоннинг ҳаётдаги ўрнини белгиловчи муҳим восита. Сабаби, мактабда ўтилаётган дарсларга бефарқ бўлмаган, илм олишга масъулият билан қараган инсон албатта эрта бир кун мустақил ҳаёт масъулиятига ҳам бефарқ бўлмайди.

Агар эътибор берган бўлсангиз, таълим- тарбия, маънавий-маърифий тарбия деган сўзлар доимо ёнма-ён юради. Гап шундаки, бу тушунчалар бир-бирини тўлдириб, бир-бирини тақозо этиб келади. Айтайлик, одам комилликка интилса ва унда кучли билим бўлса-ю, маънавий тарбия бўлмаса бундай шахсни комил инсон деб айта олмаймиз. Таълим-тарбия маскани бўлган мактабларимиз эса ўқувчиларга ҳам таълим, ҳам маънавий тарбия бериши баробарида уларни комилликка етаклайди. Маънавий бўшлиқларни тўлдиришга ҳаракат қилади.

Амударё тумани ММТБга қарашли 50-сонли умумий ўрта таълим мактаби аҳил жамоасининг мақсади ҳам айнан мана шундай: ҳар бир ўқувчининг ҳаётга етук инсон бўлиб кириб боришини таъминлаш.

Амударё телевидениеси таҳририятининг “Юксак маънавиятли ва ахлоқли ёшлар – келажак пойдевори” номли грант лойиҳаси эса бизни мана шу мактабнинг фаолияти билан яқиндан танишишга чорлади.

Туман ММТБга қарашли 50-сонли умумий ўрта таълим мактаби 1971 йилда фаолиятини бошлаган. Мактабга ҳозирги кунда Алишер Эшниёзов раҳбарлик қилиб келмоқда. Қуввати 220 ўринга мўлжалланган. Ҳозирги кунда масканда 402 нафар оқувчи 2 навбатда таълим ва тарбия олмоқда.

2018 йил маҳаллий бюджет ҳисобидан ажратилган 510 миллион сўм маблағ ҳисобидан мактаб биноси жорий таъмирланди. Ўқувчининг таълим олишида таълим берувчининг аҳамияти катта. Бугунги кунда мактабда 40 нафар олий маълумотли ва 1 нафар ўрта махсус маълумотли ўқитувчилар фаолият кўрсатиб келмоқда.

2022-2023-ўқув йилида ўқувчиларнинг олий таълимга ўқишга кириш кўрсаткичи ёмон бўлмади, таълим даргоҳи битирувчилари 19 нафарни ташкил қилган бўлса, шундан 15 нафари олий таълим муассасаларига ўқишга қабул қилинди. Яъни мазкур кўрсаткич 78,9 фоизни ташкил қилди. Мактаб бу борада яшил тоифадаги мактаблар қаторида.

Жорий “Инсонга эътибор ва сифатли таълим йили”да 1-синфга жами 34 нафар ўқувчи қабул қилиниб, Президент совғаси 12 номдаги ўқув қуроллари ва дарсликлар билан таъминланди. Ҳозирги кунда барча ўқувчилар ўқишни ёзишни қунт билан ўрганиб келмоқда. Уларга дарс бераётган устозлари мурғак қалбларга илмни чуқурроқ сингдириш, дарс жараёнларига қизиқтириш мақсадида дарсларни кўргазмали воситалар билан ўтишга ҳаракат қилади.

Ўқувчиларнинг дарсдан бўш вақтларини мазмунли ташкил этиш, уларни касб-ҳунар эгаллашига кўмак бериш, ўзи қизиққан соҳага йўналтириш мақсадида мактабда турли хил тўгараклар фаолият кўрсатиб келмоқда. Шулардан бири – “Китоб – бизнинг дўстимиз” тўгараги.

Тўгарак раҳбарлари мактабнинг она тили ва адабиёти фани ўқитувчиси Дилдора Давлатбаева, бошланғич таълим ўқитувчиси Гулноза Раҳимова ўқувчиларнинг китоблар оламига муҳаббат қўйишига астойдил ҳаракат қилиб келишмоқда. Тўгарак аъзолари 20 нафарни ташкил қилади.

Шунингдек, даргоҳда қизлар тарбиясига ҳам алоҳида эътибор қаратилиб, мактабнинг хотин қизлар ташкилоти раиси Адолат Абдуллаева бошчилигидаги “Қизларжон” клуби бугунги кунда 18 нафар ўқувчи қизларни ўз бағрига чорлаган.

Шу билан бирга, технология фани ўқитувчиси Озода Болтабаева раҳбарлигидаги “Моҳир қўллар” тўгараги аъзолари бўлган 12 нафар ўқувчилар бугунги кунда устозидан амалий санъатнинг сир асрорларини қунт билан ўрганиб келмоқда.

Ҳа, мактабда ҳар бир ўқитувчининг ўзига хос дарс ўтиш услуби бор. Улар ўқувчиларни фанларга қизиқтириш бўйича тинмай ўз устида ишлайди. Фақатгина дарсни ўтиш билангина чекланиб қолмасдан, дарсдан бўш пайтлари турли хил тўгаракларни йўлга қўйишган.

Мисол қилиб айтадиган бўлсак, мусиқа фани ўқитувчиси Ислом Юсупов раҳбарлигида 15 нафар ўқувчини ўз ичига олган мусиқа тўгараги, 24 нафар ўқувчини қамраб олган, Анвар Шамшатов бошчилигидаги шахмат-шашка тўгараги, мактабнинг тасвирий санъат фани ўқитувчиси Роза Кужанова раҳбарлигидаги “Ёш рассомлар” тўгараги шулар жумласидандир. Ушбу тўгаракда бугунги кунда 12 нафар ўқувчи тасвирий санъат сирларини ўрганиб келмоқда. Тўгарак аъзолари асосан табиат манзаралари, эртак қаҳрамонлари, йил фасллари каби мавзуларда расмлар чизишни ёқтирадилар.

Таълим муассасасида 4-синф ўқувчилари учун дарс жараёнлари биринчи тоифали бошланғич синф ўқитувчилари Маҳфарат Ярманова, Хосият Аҳмедовалар бошчилигида интерфаол услубларни қўллаган ҳолда олиб борилади. Шу сабаб ўқувчилар ўтилаётган дарсларни тушуниб олишда қийналишмайди.

Дарҳақиқат, ўқувчиларнинг билим даражаси, муайян фанга бўлган меҳр-муҳаббати ўша фан ўқитувчисининг салоҳиятига боғлиқ. Ўқитувчиларнинг билимини баҳолашда эса бугунги кунда муайян тил сертификати учун ўтказилаётган онлайн тест жараёнлари ҳам озми-кўпми ёрдам бермоқда.

Яқиндагина мактабнинг инглиз тили фани ўқитувчиси Жавлонбек Ўразбаев мана шундай тест синови жараёнида ўз билимини синовдан ўтказиб, C1 даражали халқаро сертификат соҳиби бўлди. “Устоздан ўтмаган шогирд – шогирд эмас” деган нақл бор. 50-сонли мактаб ўқувчилари ҳам ана шу нақлга амал қилган ҳолда бугунги кунда бир қатор ютуқларга эришиб келмоқда.

Ана шундай интилувчан ўқувчилардан бири мактабнинг 10-синф ўқувчиси Жасур Матқурбоновдир. У дарсдан бўш пайтлари IT соҳаси билан шуғулланади. Болалигидан компьютер, дастурлаш, информатика оламига қизиқиб келади. Ва ана шу қизиқишлари, меҳнатлари бесамар кетмай, IT соҳаси бўйича Coursera сертификати соҳиби бўлди. Мактабнинг Севара Ражабова, Шаҳзода Тажибаева каби ижодкор ўқувчиларининг ҳам келажакдаги олдига қўйган мақсадлари катта.

Файзли уйларнинг остонасидан ҳатлашинг билан дилинг ёришиб кетади инсон, агар сени эшикда очиқ юзли, самимий мезбон кулиб қарши олса-ку, кўнглинг тоғдай юксалади. Аслида мактаб деб аталмиш муқаддас даргоҳ ҳам бир оила демакдир.

Туман мактабгача ва мактаб таълими бўлимига қарашли 50-сонли мактабга ташриф буюрар эканмиз, бўсағасидан ҳатлашимиз билан ана шу файзни, чеҳраси кулиб турган маънавиятли инсонларни кўриб бизнинг ҳам дилимиз ёришиб кетди. Тўғри, мактаб биноси бироз кичик. Коридори салгина тор. Лекин ҳар куни у ердан кўнгли кенг, мақсадлари катта инсонлар юриб ўтади...

Биз эса ижодий жамоамиз билан мактаб жамоасининг, ўқувчиларининг келгусидаги ўқиш-ишларига омад тилаб, хайрлашдик.

Азиза Мадраҳимова