Nima? Qachon? Qayerda? Biz borgan navbatdagi manzil – 50-sonli maktab boʻldi

“Xalq uchun nondan soʻng eng muhimi maktabdir” degan edi donolardan biri. Darhaqiqat, maktabda olingan bilim, savod insonning hayotdagi oʻrnini belgilovchi muhim vosita. Sababi, maktabda oʻtilayotgan darslarga befarq boʻlmagan, ilm olishga masʼuliyat bilan qaragan inson albatta erta bir kun mustaqil hayot masʼuliyatiga ham befarq boʻlmaydi.

Agar eʼtibor bergan boʻlsangiz, taʼlim- tarbiya, maʼnaviy-maʼrifiy tarbiya degan soʻzlar doimo yonma-yon yuradi. Gap shundaki, bu tushunchalar bir-birini toʻldirib, bir-birini taqozo etib keladi. Aytaylik, odam komillikka intilsa va unda kuchli bilim boʻlsa-yu, maʼnaviy tarbiya boʻlmasa bunday shaxsni komil inson deb ayta olmaymiz. Taʼlim-tarbiya maskani boʻlgan maktablarimiz esa oʻquvchilarga ham taʼlim, ham maʼnaviy tarbiya berishi barobarida ularni komillikka yetaklaydi. Maʼnaviy boʻshliqlarni toʻldirishga harakat qiladi.

Amudaryo tumani MMTBga qarashli 50-sonli umumiy oʻrta taʼlim maktabi ahil jamoasining maqsadi ham aynan mana shunday: har bir oʻquvchining hayotga yetuk inson boʻlib kirib borishini taʼminlash.

Amudaryo televideniyesi tahririyatining “Yuksak maʼnaviyatli va axloqli yoshlar – kelajak poydevori” nomli grant loyihasi esa bizni mana shu maktabning faoliyati bilan yaqindan tanishishga chorladi.

Tuman MMTBga qarashli 50-sonli umumiy oʻrta taʼlim maktabi 1971-yilda faoliyatini boshlagan. Maktabga hozirgi kunda Alisher Eshniyozov rahbarlik qilib kelmoqda. Quvvati 220-oʻringa moʻljallangan. Hozirgi kunda maskanda 402 nafar oquvchi 2 navbatda taʼlim va tarbiya olmoqda.

2018-yil mahalliy byudjet hisobidan ajratilgan 510 million soʻm mablagʻ hisobidan maktab binosi joriy taʼmirlandi. Oʻquvchining taʼlim olishida taʼlim beruvchining ahamiyati katta. Bugungi kunda maktabda 40 nafar oliy maʼlumotli va 1 nafar oʻrta maxsus maʼlumotli oʻqituvchilar faoliyat koʻrsatib kelmoqda.

2022-2023-oʻquv yilida oʻquvchilarning oliy taʼlimga oʻqishga kirish koʻrsatkichi yomon boʻlmadi, taʼlim dargohi bitiruvchilari 19 nafarni tashkil qilgan boʻlsa, shundan 15 nafari oliy taʼlim muassasalariga oʻqishga qabul qilindi. Yaʼni mazkur koʻrsatkich 78,9 foizni tashkil qildi. Maktab bu borada yashil toifadagi maktablar qatorida.

Joriy “Insonga eʼtibor va sifatli taʼlim yili”da 1-sinfga jami 34 nafar oʻquvchi qabul qilinib, Prezident sovgʻasi 12 nomdagi oʻquv qurollari va darsliklar bilan taʼminlandi. Hozirgi kunda barcha oʻquvchilar oʻqishni yozishni qunt bilan oʻrganib kelmoqda. Ularga dars berayotgan ustozlari murgʻak qalblarga ilmni chuqurroq singdirish, dars jarayonlariga qiziqtirish maqsadida darslarni koʻrgazmali vositalar bilan oʻtishga harakat qiladi.

Oʻquvchilarning darsdan boʻsh vaqtlarini mazmunli tashkil etish, ularni kasb-hunar egallashiga koʻmak berish, oʻzi qiziqqan sohaga yoʻnaltirish maqsadida maktabda turli xil toʻgaraklar faoliyat koʻrsatib kelmoqda. Shulardan biri – “Kitob – bizning doʻstimiz” toʻgaragi.

Toʻgarak rahbarlari maktabning ona tili va adabiyoti fani oʻqituvchisi Dildora Davlatbayeva, boshlangʻich taʼlim oʻqituvchisi Gulnoza Rahimova oʻquvchilarning kitoblar olamiga muhabbat qoʻyishiga astoydil harakat qilib kelishmoqda. Toʻgarak aʼzolari 20 nafarni tashkil qiladi.

Shuningdek, dargohda qizlar tarbiyasiga ham alohida eʼtibor qaratilib, maktabning xotin qizlar tashkiloti raisi Adolat Abdullayeva boshchiligidagi “Qizlarjon” klubi bugungi kunda 18 nafar oʻquvchi qizlarni oʻz bagʻriga chorlagan.

Shu bilan birga, texnologiya fani oʻqituvchisi Ozoda Boltabayeva rahbarligidagi “Mohir qoʻllar” toʻgaragi aʼzolari boʻlgan 12 nafar oʻquvchilar bugungi kunda ustozidan amaliy sanʼatning sir asrorlarini qunt bilan oʻrganib kelmoqda.

Ha, maktabda har bir oʻqituvchining oʻziga xos dars oʻtish uslubi bor. Ular oʻquvchilarni fanlarga qiziqtirish boʻyicha tinmay oʻz ustida ishlaydi. Faqatgina darsni oʻtish bilangina cheklanib qolmasdan, darsdan boʻsh paytlari turli xil toʻgaraklarni yoʻlga qoʻyishgan.

Misol qilib aytadigan boʻlsak, musiqa fani oʻqituvchisi Islom Yusupov rahbarligida 15 nafar oʻquvchini oʻz ichiga olgan musiqa toʻgaragi, 24 nafar oʻquvchini qamrab olgan, Anvar Shamshatov boshchiligidagi shaxmat-shashka toʻgaragi, maktabning tasviriy sanʼat fani oʻqituvchisi Roza Kujanova rahbarligidagi “Yosh rassomlar” toʻgaragi shular jumlasidandir. Ushbu toʻgarakda bugungi kunda 12 nafar oʻquvchi tasviriy sanʼat sirlarini oʻrganib kelmoqda. Toʻgarak aʼzolari asosan tabiat manzaralari, ertak qahramonlari, yil fasllari kabi mavzularda rasmlar chizishni yoqtiradilar.

Taʼlim muassasasida 4-sinf oʻquvchilari uchun dars jarayonlari birinchi toifali boshlangʻich sinf oʻqituvchilari Mahfarat Yarmanova, Xosiyat Ahmedovalar boshchiligida interfaol uslublarni qoʻllagan holda olib boriladi. Shu sabab oʻquvchilar oʻtilayotgan darslarni tushunib olishda qiynalishmaydi.

Darhaqiqat, oʻquvchilarning bilim darajasi, muayyan fanga boʻlgan mehr-muhabbati oʻsha fan oʻqituvchisining salohiyatiga bogʻliq. Oʻqituvchilarning bilimini baholashda esa bugungi kunda muayyan til sertifikati uchun oʻtkazilayotgan onlayn test jarayonlari ham ozmi-koʻpmi yordam bermoqda.

Yaqindagina maktabning ingliz tili fani oʻqituvchisi Javlonbek Oʻrazbayev mana shunday test sinovi jarayonida oʻz bilimini sinovdan oʻtkazib, C1 darajali xalqaro sertifikat sohibi boʻldi. “Ustozdan oʻtmagan shogird – shogird emas” degan naql bor. 50-sonli maktab oʻquvchilari ham ana shu naqlga amal qilgan holda bugungi kunda bir qator yutuqlarga erishib kelmoqda.

Ana shunday intiluvchan oʻquvchilardan biri maktabning 10-sinf oʻquvchisi Jasur Matqurbonovdir. U darsdan boʻsh paytlari IT sohasi bilan shugʻullanadi. Bolaligidan kompyuter, dasturlash, informatika olamiga qiziqib keladi. Va ana shu qiziqishlari, mehnatlari besamar ketmay, IT sohasi boʻyicha Coursera sertifikati sohibi boʻldi. Maktabning Sevara Rajabova, Shahzoda Tajibayeva kabi ijodkor oʻquvchilarining ham kelajakdagi oldiga qoʻygan maqsadlari katta.

Fayzli uylarning ostonasidan hatlashing bilan diling yorishib ketadi inson, agar seni eshikda ochiq yuzli, samimiy mezbon kulib qarshi olsa-ku, koʻngling togʻday yuksaladi. Aslida maktab deb atalmish muqaddas dargoh ham bir oila demakdir.

Tuman maktabgacha va maktab taʼlimi boʻlimiga qarashli 50-sonli maktabga tashrif buyurar ekanmiz, boʻsagʻasidan hatlashimiz bilan ana shu fayzni, chehrasi kulib turgan maʼnaviyatli insonlarni koʻrib bizning ham dilimiz yorishib ketdi. Toʻgʻri, maktab binosi biroz kichik. Koridori salgina tor. Lekin har kuni u yerdan koʻngli keng, maqsadlari katta insonlar yurib oʻtadi...

Biz esa ijodiy jamoamiz bilan maktab jamoasining, oʻquvchilarining kelgusidagi oʻqish-ishlariga omad tilab, xayrlashdik.

Aziza Madrahimova