Халқ депутатлари Амударё туман Кенгашининг 69-сессияси тўғрисида ахборот

2024 йил 17 январь куни Амударё тумани ҳокимлигининг мажлислар залида Халқ депутатлари туман Кенгашининг навбатдаги – 69-сессияси бўлиб ўтди.

Сессияни Халқ депутатлари туман Кенгаши раисининг ўринбосари Ғуломжон Ешниёзов очди ва олиб борди. Сессия котиблигига 8-Бўстон сайлов округидан депутат Мақсуд Саъдуллаев сайланди.

Сессияда секторлар раҳбарлари, ҳокимлик масъул ходимлари, бўлимлар, овул ва маҳалла фуқаролар йиғинлари масъуллари ҳамда оммавий ахборот воситалари вакиллари иштирок этди.

Сессияда дастлаб қонунийлик ҳамда жиноятчиликка қарши курашнинг ҳолати тўғрисида туман прокурори Азиз Рўзметовнинг ахбороти тингланди.

Ахборотда туман прокуратураси томонидан 2023 йил давомида “Инсон қадри учун” деган эзгу ғояни тўлиқ рўёбга чиқариш, ҳудудда қонун устуворлигини таъминлаш, фуқароларнинг ҳуқуқ ва эркинликларини, жамият ва давлат манфаатларини ҳимоя қилиш, ҳуқуқбузарликларнинг олдини олиш ва профилактика қилиш борасида амалга оширилган ишлар ҳақида маълумот берилди.

Хусусан, 2023 йилда ўтказилган назорат тадбирлари давомида 525та прокурор назорати ҳужжати қўлланилган ҳамда мансабдор шахсларнинг ноқонуний буйруқ ва қарорларига 187та протестлар келтирилган, 60та тақдимномалар киритилган, 162 нафар шахслар интизомий ва маъмурий жавобгарликка тортилган.

Сессия ишида туманда жиноятчилик ва ҳуқуқбузарликларнинг олдини олиш ҳамда уларнинг профилактикасини ташкил этиш бўйича ўтган йил давомида амалга оширган ишлар юзасидан туман Ички ишлар бўлими бошлиғи Жамоладдин Юсупов ҳисобот берди.

Туманда умумий жиноятчилик таҳлил қилинганда, ўтган йилга нисбатан 275 дан 285 га, жиноят қидирув йўналишида 184 дан 189 га ҳамда бошқа соҳадаги жиноятлар эса 47 дан 52 га ошган. Ўтган йил давомида 1-сектор ҳудудида 87та, 2-сектор ҳудудида 85та, 3-сектор ҳудудида 40та, 4-сектор ҳудудида 73та жиноятлар содир этилган. Ҳисоботда жиноятчилик ва ҳуқуқбузарликларнинг олдини олиш бўйича амалга оширилаётган ишлар ҳақида ҳам батафсил маълумотлар берилди.

Сессияда туманда жисмоний ва юридик шахсларнинг қишлоқ хўжалигига мўлжалланмаган ерларига жорий йил учун ер солиғи ставкаларини белгилаш тўғрисида Давлат солиқ инспекцияси бошлиғининг ўринбосари Расул Ўразимбетов ҳисобот берди.

Ҳисоботда 2024 йил учун жисмоний шахсларнинг қишлоқ хўжалигига мўлжалланмаган ерлари бўйича ер солиғи ставкасини туман маркази, яъни Манғит шаҳри учун 1 квадрат метр ерга 210 сўм 24 тийин миқдорида, туманнинг қишлоқ жойлари учун эса 1 квадрат метр ерга 163 сўм 52 тийин миқдорида белгилаш таклиф қилинди.

2024 йил учун юридик шахсларнинг қишлоқ хўжалигига мўлжалланмаган ерлари бўйича ер солиғи ставкасини эса туман маркази, яъни Манғит шаҳри учун 1 гектар ерга 24 минг 97 сўм 50 тийин миқдорида, туманнинг қишлоқ жойлари учун эса 1 гектар ерга 19 минг 845 сўм миқдорида белгилаш таклиф қилинди.

Шундан сўнг сессияда туман Тиббиёт бирлашмаси бошлиғи Фахриддин Абдуллаевнинг “Аҳолига сифатли тиббий хизмат кўрсатилишини таъминлаш ва такомиллаштиришнинг чора-тадбирлари тўғрисида”ги масала юзасидан ҳисоботи тингланди.

Ҳисоботда таъкидланганидек, бугунги кунда туманимизда 415 ўринли марказий шифохона, 1та кўп тармоқли марказий поликлиника, 9та оилавий поликлиника ва 4та оилавий шифокорлик пункти фаолият юритмоқда. Бугунги кунга қадар туманда жами 91 нафар шифокор, 328 нафар ўрта тиббиёт ходимларидан иборат 91та тиббиёт бригадалари ташкил этилган.

2023 йил давомида туман бўйича 74 минг 309 нафар аҳоли профилактик кўриклардан ўтказилган. Кўрик натижаси бўйича уларнинг 6 минг 508 нафари амбулатор, 353 нафари стационар шароитда соғломлаштирилган. Стационар шароитда соғломлаштирилганларнинг 284 нафари туманда, 67 нафари Нукус шаҳрида ва 2 нафари Тошкент шаҳрида даволанган. 40 ёшдан ошган 60 минг 55 нафар аҳолини юрак-қон томир, қандли диабет ва бошқа юқумли бўлмаган касалликлар бўйича скринингдан ўтказиш режалаштирилиб, амалда 63 минг 192 нафар аҳоли скрининг кўригидан ўтказилган. Ҳисоботда аҳолига тиббий хизмат кўрсатиш сифатини янада такомиллаштириш бўйича келгусидаги режалар ҳақида ҳам маълумотлар берилди.

Сессияда туман Ички ишлар бўлими бошлиғининг жамоат хавфсизлиги хизмати бўйича ўринбосари, майор Шарапат Жолдасбаев туманда жамоат хавфсизлигини таъминлаш, жиноятчиликнинг олдини олиш борасида 2023 йилда амалга оширилган ишлар хусусида ҳисобот берди.

Ўтган йил мобайнида туман бўйича профилактика инспекторлари томонидан жами 6 минг 337та маъмурий баённомалар расмийлаштирилган. Маъмурий баённомаларнинг 1 минг 34таси аёлларга, 5 минг 303таси эса эркакларга нисбатан тузилган. 2023 йил давомида 180 нафар шахсга нисбатан маъмурий қамоқ жазоси қўлланилган. Ҳисоботда 2023 йил давомида туман Ички ишлар бўлими ходимлари томонидан жиноятчилик ва ҳуқуқбузарликларнинг олдини олиш борасида амалга оширилган ишлар ҳақида ҳам батафсил маълумотлар берилди.

Сессияда Кенгаш ваколатига кирувчи бошқа масалалар ҳам муҳокама қилинди.

Кун тартибидаги барча масалалар атрофлича кўриб чиқилиб, туман Кенгашининг тегишли қарорлари қабул қилинди.

Шунинг билан сессия ўз ишини якунлади.

Туман ҳокимлиги Ахборот хизмати