Xalq deputatlari Amudaryo tuman Kengashining 69-sessiyasi toʻgʻrisida axborot

2024-yil 17-yanvar kuni Amudaryo tumani hokimligining majlislar zalida Xalq deputatlari tuman Kengashining navbatdagi – 69-sessiyasi boʻlib oʻtdi.

Sessiyani Xalq deputatlari tuman Kengashi raisining oʻrinbosari Gʻulomjon Yeshniyozov ochdi va olib bordi. Sessiya kotibligiga 8-Boʻston saylov okrugidan deputat Maqsud Saʼdullayev saylandi.

Sessiyada sektorlar rahbarlari, hokimlik masʼul xodimlari, boʻlimlar, ovul va mahalla fuqarolar yigʻinlari masʼullari hamda ommaviy axborot vositalari vakillari ishtirok etdi.

Sessiyada dastlab qonuniylik hamda jinoyatchilikka qarshi kurashning holati toʻgʻrisida tuman prokurori Aziz Roʻzmetovning axboroti tinglandi.

Axborotda tuman prokuraturasi tomonidan 2023-yil davomida “Inson qadri uchun” degan ezgu gʻoyani toʻliq roʻyobga chiqarish, hududda qonun ustuvorligini taʼminlash, fuqarolarning huquq va erkinliklarini, jamiyat va davlat manfaatlarini himoya qilish, huquqbuzarliklarning oldini olish va profilaktika qilish borasida amalga oshirilgan ishlar haqida maʼlumot berildi.

Xususan, 2023-yilda oʻtkazilgan nazorat tadbirlari davomida 525ta prokuror nazorati hujjati qoʻllanilgan hamda mansabdor shaxslarning noqonuniy buyruq va qarorlariga 187ta protestlar keltirilgan, 60ta taqdimnomalar kiritilgan, 162 nafar shaxslar intizomiy va maʼmuriy javobgarlikka tortilgan.

Sessiya ishida tumanda jinoyatchilik va huquqbuzarliklarning oldini olish hamda ularning profilaktikasini tashkil etish boʻyicha oʻtgan yil davomida amalga oshirgan ishlar yuzasidan tuman Ichki ishlar boʻlimi boshligʻi Jamoladdin Yusupov hisobot berdi.

Tumanda umumiy jinoyatchilik tahlil qilinganda, oʻtgan yilga nisbatan 275 dan 285 ga, jinoyat qidiruv yoʻnalishida 184 dan 189 ga hamda boshqa sohadagi jinoyatlar esa 47 dan 52 ga oshgan. Oʻtgan yil davomida 1-sektor hududida 87ta, 2-sektor hududida 85ta, 3-sektor hududida 40ta, 4-sektor hududida 73ta jinoyatlar sodir etilgan. Hisobotda jinoyatchilik va huquqbuzarliklarning oldini olish boʻyicha amalga oshirilayotgan ishlar haqida ham batafsil maʼlumotlar berildi.

Sessiyada tumanda jismoniy va yuridik shaxslarning qishloq xoʻjaligiga moʻljallanmagan yerlariga joriy yil uchun yer soligʻi stavkalarini belgilash toʻgʻrisida Davlat soliq inspektsiyasi boshligʻining oʻrinbosari Rasul Oʻrazimbetov hisobot berdi.

Hisobotda 2024-yil uchun jismoniy shaxslarning qishloq xoʻjaligiga moʻljallanmagan yerlari boʻyicha yer soligʻi stavkasini tuman markazi, yaʼni Mangʻit shahri uchun 1 kvadrat metr yerga 210 soʻm 24 tiyin miqdorida, tumanning qishloq joylari uchun esa 1 kvadrat metr yerga 163 soʻm 52 tiyin miqdorida belgilash taklif qilindi.

2024-yil uchun yuridik shaxslarning qishloq xoʻjaligiga moʻljallanmagan yerlari boʻyicha yer soligʻi stavkasini esa tuman markazi, yaʼni Mangʻit shahri uchun 1 gektar yerga 24 ming 97 soʻm 50 tiyin miqdorida, tumanning qishloq joylari uchun esa 1 gektar yerga 19 ming 845 soʻm miqdorida belgilash taklif qilindi.

Shundan soʻng sessiyada tuman Tibbiyot birlashmasi boshligʻi Faxriddin Abdullayevning “Aholiga sifatli tibbiy xizmat koʻrsatilishini taʼminlash va takomillashtirishning chora-tadbirlari toʻgʻrisida”gi masala yuzasidan hisoboti tinglandi.

Hisobotda taʼkidlanganidek, bugungi kunda tumanimizda 415-oʻrinli markaziy shifoxona, 1ta koʻp tarmoqli markaziy poliklinika, 9ta oilaviy poliklinika va 4ta oilaviy shifokorlik punkti faoliyat yuritmoqda. Bugungi kunga qadar tumanda jami 91 nafar shifokor, 328 nafar oʻrta tibbiyot xodimlaridan iborat 91ta tibbiyot brigadalari tashkil etilgan.

2023-yil davomida tuman boʻyicha 74 ming 309 nafar aholi profilaktik koʻriklardan oʻtkazilgan. Koʻrik natijasi boʻyicha ularning 6 ming 508 nafari ambulator, 353 nafari statsionar sharoitda sogʻlomlashtirilgan. Statsionar sharoitda sogʻlomlashtirilganlarning 284 nafari tumanda, 67 nafari Nukus shahrida va 2 nafari Toshkent shahrida davolangan. 40 yoshdan oshgan 60 ming 55 nafar aholini yurak-qon tomir, qandli diabet va boshqa yuqumli boʻlmagan kasalliklar boʻyicha skriningdan oʻtkazish rejalashtirilib, amalda 63 ming 192 nafar aholi skrining koʻrigidan oʻtkazilgan. Hisobotda aholiga tibbiy xizmat koʻrsatish sifatini yanada takomillashtirish boʻyicha kelgusidagi rejalar haqida ham maʼlumotlar berildi.

Sessiyada tuman Ichki ishlar boʻlimi boshligʻining jamoat xavfsizligi xizmati boʻyicha oʻrinbosari, mayor Sharapat Joldasbayev tumanda jamoat xavfsizligini taʼminlash, jinoyatchilikning oldini olish borasida 2023-yilda amalga oshirilgan ishlar xususida hisobot berdi.

Oʻtgan yil mobaynida tuman boʻyicha profilaktika inspektorlari tomonidan jami 6 ming 337ta maʼmuriy bayonnomalar rasmiylashtirilgan. Maʼmuriy bayonnomalarning 1 ming 34tasi ayollarga, 5 ming 303tasi esa erkaklarga nisbatan tuzilgan. 2023-yil davomida 180 nafar shaxsga nisbatan maʼmuriy qamoq jazosi qoʻllanilgan. Hisobotda 2023-yil davomida tuman Ichki ishlar boʻlimi xodimlari tomonidan jinoyatchilik va huquqbuzarliklarning oldini olish borasida amalga oshirilgan ishlar haqida ham batafsil maʼlumotlar berildi.

Sessiyada Kengash vakolatiga kiruvchi boshqa masalalar ham muhokama qilindi.

Kun tartibidagi barcha masalalar atroflicha koʻrib chiqilib, tuman Kengashining tegishli qarorlari qabul qilindi.

Shuning bilan sessiya oʻz ishini yakunladi.

Tuman hokimligi Axborot xizmati