ХИТОЙ ҚИШЛОҒИ ЁШЛАРИ ТАНИҚЛИ ЁЗУВЧИ ВА ШОИРЛАР БИЛАН УЧРАШДИЛАР
Ҳар қандай халқни ва миллатни дунёга танитувчи омиллардан бири – бу унинг маънавияти, адабиёти ва жўшқин шеъриятидир. Чунки адабиёт бор жойда, шеърият ҳоким давраларда кўнгиллар бирлашади, улуғ устоз шоир, Ўзбекистон Қаҳрамони Ибройим Юсупов айтганларидай, “кўнгиллар-кўнгиллардан сув ичади!” Бу – инсон руҳиятининг тозаришига, маънавий баркамолликка ишора.
www.amunews.uz веб-сайти таҳририятининг Олий Мажлис ҳузуридаги ННТлар ва фуқаролик жамиятининг бошқа институтларини қўллаб-қувватлаш жамоат фонди томонидан молиялаштирилган “Соғлом муҳит – соғлом ҳаёт” грант лойиҳаси иш режасига кўра, Амударё туманининг Хитой овул фуқаролар йиғини ҳудудидаги 2-сонли умумтаълим мактабида бўлиб ўтган ёзувчи ва шоирлар билан Хитой қишлоғи ёшларининг учрашувида ҳам яхши шеър, самимий суҳбат, ўзаро фикр алмашувлардан иштирокчилар маънавий баҳра олдилар.
Маҳаллаларда, оилаларда ижтимоий-маънавий муҳит барқарорлигини таъминлаш, ёшларни китоб мутолаасига қизиқтириш, уларнинг дунёқарашини ривожлантиришга ҳисса қўшиш мақсадида амалга оширилаётган “Соғлом муҳит – соғлом ҳаёт” грант лойиҳаси доирасидаги мазкур тадбирда Ўзбекистон Ёзувчилари ижодий Уюшмаси аъзоси, шоир Турсунбой Абдуллаев, Ўзбекистон Ёзувчилари ижодий Уюшмаси аъзоси, Қорақалпоғистонда хизмат кўрсатган журналист, шоира Робия Йўлдошева, Ўзбекистон журналистлари Уюшмаси аъзоси, “Тараққиёт кўзгуси” газетаси масъул котибаси Озода Худойберганова, 2-сонли умумтаълим мактабининг юқори синф ўқувчилари, ўқитувчилари, мактаб директорининг маънавий-маърифий ишлар бўйича ўринбосари Ойбек Отамуродов, Баҳодир Шомуродовлар иштирок этишди.
Учрашув тадбирини таниқли ёзувчи ва шоир Турсунбой саломчи Абдуллуев очди ва www.amunews.uz веб-сайти ижодкорлари томонидан “Соғлом муҳит – соғлом ҳаёт” грант лойиҳаси доирасида туманнинг турли ҳудудларида амалга оширилаётган маънавий-маърифий тадбирларнинг ёшлар тарбияси, оилаларда барқарор маънавий муҳитни шакллантиришдаги аҳамияти ҳақида сўз юритди. Шу билан бирга мамлакатимизда Учинчи Ренессансни барпо этишда ёшлар китобхонлигининг тутган ўрни тўғрисида қимматли фикрлар билдирди.
Шундан сўнг, шоира Робия Йўлдошева айни пайтда балоғат ёши остонасида турган ўқувчи-ёшлар билан самимий мулоқот ўтказди. Уларни янада яхши ўқишга давъат этиб, Хитой қишлоғидан етишиб чиққан академик-олимлар, ёзувчи ва шоирлар, адабиётшунос олимлар, айни пайтда дунёнинг ривожланган давлатларида таҳсил олиб, илмий изланишлар олиб бораётган бўлғуси олим ёшлар хусусида сўзлаб берди, ёшларни ўқиб-изланишдан тўхтамасликка давъат этди.
Тадбир давомида навбатма-навбат Турсунбой Абдуллаев, Робия Йўлдошевалар янги шеърларидан ўқиб бердилар.
Ўзбекистон Журналистлари Уюшмаси аъзоси, иқтидорли журналист Озода Худойберганова иштирокчиларга китобхонликнинг аҳамияти, турли бузғунчи оқимлардан ҳимояланишдаги ўрни, мафкуравий хуружларга қарши курашда инсоннинг китобдан олган билими мустаҳкам қалқон бўлиши хусусида ҳаётий мисоллар орқали фикр юритиб, адабиёт ва шеъриятнинг юксак маънавий қудрати тўғрисида сермазмун маъруза қилди.
Самимий ва дилдан мулоқот тарзида бўлиб ўтган учрашув тадбири иштирокчилар қалбида китобхонликка, адабиёт ва шеъриятга меҳр-муҳаббат туйғусини мустаҳкамлагани билан катта аҳамият касб этди.
Муяссар Халиллаева.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
