XITOY QIShLOGʻI YoShLARI TANIQLI YoZUVChI VA ShOIRLAR BILAN UChRAShDILAR

Har qanday xalqni va millatni dunyoga tanituvchi omillardan biri – bu uning maʼnaviyati, adabiyoti va joʻshqin sheʼriyatidir. Chunki adabiyot bor joyda, sheʼriyat hokim davralarda koʻngillar birlashadi, ulugʻ ustoz shoir, Oʻzbekiston Qahramoni Ibroyim Yusupov aytganlariday, “koʻngillar-koʻngillardan suv ichadi!” Bu – inson ruhiyatining tozarishiga, maʼnaviy barkamollikka ishora.

www.amunews.uz veb-sayti tahririyatining Oliy Majlis huzuridagi NNTlar va fuqarolik jamiyatining boshqa institutlarini qoʻllab-quvvatlash jamoat fondi tomonidan moliyalashtirilgan “Sogʻlom muhit – sogʻlom hayot” grant loyihasi ish rejasiga koʻra, Amudaryo tumanining Xitoy ovul fuqarolar yigʻini hududidagi 2-sonli umumtaʼlim maktabida boʻlib oʻtgan yozuvchi va shoirlar bilan Xitoy qishlogʻi yoshlarining uchrashuvida ham yaxshi sheʼr, samimiy suhbat, oʻzaro fikr almashuvlardan ishtirokchilar maʼnaviy bahra oldilar.

Mahallalarda, oilalarda ijtimoiy-maʼnaviy muhit barqarorligini taʼminlash, yoshlarni kitob mutolaasiga qiziqtirish, ularning dunyoqarashini rivojlantirishga hissa qoʻshish maqsadida amalga oshirilayotgan “Sogʻlom muhit – sogʻlom hayot” grant loyihasi doirasidagi mazkur tadbirda Oʻzbekiston Yozuvchilari ijodiy Uyushmasi aʼzosi, shoir Tursunboy Abdullayev, Oʻzbekiston Yozuvchilari ijodiy Uyushmasi aʼzosi, Qoraqalpogʻistonda xizmat koʻrsatgan jurnalist, shoira Robiya Yoʻldosheva, Oʻzbekiston jurnalistlari Uyushmasi aʼzosi, “Taraqqiyot koʻzgusi” gazetasi masʼul kotibasi Ozoda Xudoyberganova, 2-sonli umumtaʼlim maktabining yuqori sinf oʻquvchilari, oʻqituvchilari, maktab direktorining maʼnaviy-maʼrifiy ishlar boʻyicha oʻrinbosari Oybek Otamurodov, Bahodir Shomurodovlar ishtirok etishdi.

Uchrashuv tadbirini taniqli yozuvchi va shoir Tursunboy salomchi Abdulluyev ochdi va www.amunews.uz veb-sayti ijodkorlari tomonidan “Sogʻlom muhit – sogʻlom hayot” grant loyihasi doirasida tumanning turli hududlarida amalga oshirilayotgan maʼnaviy-maʼrifiy tadbirlarning yoshlar tarbiyasi, oilalarda barqaror maʼnaviy muhitni shakllantirishdagi ahamiyati haqida soʻz yuritdi. Shu bilan birga mamlakatimizda Uchinchi Renessansni barpo etishda yoshlar kitobxonligining tutgan oʻrni toʻgʻrisida qimmatli fikrlar bildirdi.

Shundan soʻng, shoira Robiya Yoʻldosheva ayni paytda balogʻat yoshi ostonasida turgan oʻquvchi-yoshlar bilan samimiy muloqot oʻtkazdi. Ularni yanada yaxshi oʻqishga davʼat etib, Xitoy qishlogʻidan yetishib chiqqan akademik-olimlar, yozuvchi va shoirlar, adabiyotshunos olimlar, ayni paytda dunyoning rivojlangan davlatlarida tahsil olib, ilmiy izlanishlar olib borayotgan boʻlgʻusi olim yoshlar xususida soʻzlab berdi, yoshlarni oʻqib-izlanishdan toʻxtamaslikka davʼat etdi.

Tadbir davomida navbatma-navbat Tursunboy Abdullayev, Robiya Yoʻldoshevalar yangi sheʼrlaridan oʻqib berdilar.

Oʻzbekiston Jurnalistlari Uyushmasi aʼzosi, iqtidorli jurnalist Ozoda Xudoyberganova ishtirokchilarga kitobxonlikning ahamiyati, turli buzgʻunchi oqimlardan himoyalanishdagi oʻrni, mafkuraviy xurujlarga qarshi kurashda insonning kitobdan olgan bilimi mustahkam qalqon boʻlishi xususida hayotiy misollar orqali fikr yuritib, adabiyot va sheʼriyatning yuksak maʼnaviy qudrati toʻgʻrisida sermazmun maʼruza qildi.

Samimiy va dildan muloqot tarzida boʻlib oʻtgan uchrashuv tadbiri ishtirokchilar qalbida kitobxonlikka, adabiyot va sheʼriyatga mehr-muhabbat tuygʻusini mustahkamlagani bilan katta ahamiyat kasb etdi.

Muyassar Xalillayeva.