ДУРУНКИ МАҲАЛЛАСИДА ЁЗУВЧИ-ШОИР ВА ИЖОДКОРЛАРНИНГ ЁШЛАР БИЛАН УЧРАШУВИ ЎТКАЗИЛДИ
Маҳаллаларда, оилаларда ижтимоий-маънавий муҳит барқарорлигини таъминлашга ҳисса қўшиш мақсадида amunews.uz веб-сайтининг “Соғлом муҳит – соғлом ҳаёт” номли грант лойиҳаси доирасида турли тадбирлар ўтказилиб келинмоқда. Грант лойиҳаси иш режасига мувофиқ ижрочилар томонидан жойларга борган ҳолда аҳоли ўртасида ўтказилаётган мазкур тадбирлар оилалардаги маънавий муҳит барқарорлигига салбий таъсир кўрсатувчи турли иллатлар кўпайишининг олдини олишда, соғлом ҳаётнинг аҳамиятини англаб етишларида муҳим ўрин тутмоқда.
16 февраль куни лойиҳанинг навбатдаги иш режасига кўра Дурунки маҳалласидаги 56-сонли мактабда “Жайҳун илҳомлари” нодавлат нотижорат ташкилоти билан ҳамкорликда ёзувчи-шоир ва ижодкорларнинг ёшлар билан учрашуви ташкил этилди. Учрашувда “Жайҳун илҳомлари” нодавлат нотижорат ташкилоти аъзолари Қорақалпоғистонда хизмат кўрсатган журналист, Ўзбекистон Ёзувчилар уюшмаси ва Журналистлар ижодий уюшмаси аъзоси Робия Йўлдошева, Ўзбекистон Журналистлар ижодий уюшмаси аъзоси, журналист Озода Худойбергановалар ҳамда мактаб ўқитувчилари ва ўқувчилари қатнашишди. Тадбирни мактаб директори Арзигул Худойберганова очиб берди ва ташриф буюрган ижодкорларни ёшларга таништириб ўтди.
Тадбирда дастлаб amunews.uz веб-сайтининг “Соғлом муҳит – соғлом ҳаёт” номли грант лойиҳаси ҳамда ушбу грант лойиҳаси доирасида амалга оширилаётган тадбирлар, уларнинг аҳамияти, эришилаётган натижалар ҳақида батафсил маълумотлар берилди. Лойиҳа доирасида овул ва маҳаллаларда аҳоли ўртасида ичкиликбозлик, гиёҳвандликка берилиш, яқин қариндошлар ўртасидаги ва эрта турмушнинг олдини олиш борасида тажрибали шифокорлар, нуроний отахон ва онахонлар иштирокида давра суҳбатлари ташкил қилинаётгани, шу мавзуларда мақолалар, телелавҳалар тайёрланиб, тумандаги оммавий ахборот воситаларида ёритилаётгани хусусида сўз юритилди. Шунингдек, лойиҳа доирасидаги тадбирлар Президентимизнинг 5та муҳим ташаббусини чекка қишловларда янада фаол амалга оширишда муҳим ўрин тутаётгани, китобхон ёшларнинг сафини кенгайтиришга қаратилган сайёр китоблар карвонлари, турли танловларга кўплаб ёшлар қамраб олинаётгани баён қилинди.
Учрашув тадбири давомида китобхонликнинг аҳамияти, бадиий ижод, ўзбек мумтоз адабиёти намояндалари ва турли даврларда яшаб ижод қилган таниқли адибларнинг ҳаёти, ижоди, уларнинг миллий адабиётимизни ривожлантиришга қўшган ҳиссалари тўғрисида қизғин суҳбат ўтказилди. Ундан ташқари, миллий адабиётимизни ривожлантириш, қалам аҳлининг самарали ижод қилиши учун қулай шарт-шароит яратиш, ёш истеъдод эгаларини аниқлаш ва ҳар томонлама қўллаб-қувватлашга алоҳида эътибор қаратилаётгани, юртимизнинг турли ҳудудларида ижод қилаётган ёш истеъдод эгаларини ҳар томонлама рағбатлантириш, жамиятда ўз ўрнини топишига кўмаклашиш давлатимиз сиёсатининг устувор йўналишларидан бирига айлангани эътироф этилди.
Тадбирда мамлакатимизда ёш авлоднинг таълим олиши, истеъдод ва иқтидорларини намоён этишлари учун яратилган шароитлар ҳам тилга олинди. Ўқувчиларнинг бугун устозларидан фан сирларини чуқур ўрганиб, келажакда жамият тараққиётига муносиб ҳисса қўшадиган шахс бўлиб вояга етишлари зарурлиги уқтирилди. Шунингдек, ҳар бир шахснинг, айниқса, ёшларнинг билимли, зукко бўлишида, интеллектуал ривожланишида китобларнинг ўрни ва аҳамияти тушунтирилди.
Таниқли ижодкорлар ёшларга ўз ижодий фаолияти, ҳаётидаги қизиқарли воқеалар, илк ва бугунги кундаги ижодий ишлари ҳақида ҳам сўзлаб беришди. Ёшларнинг адабиёт соҳасидаги саволларига жавоб берар экан, ўз ижодларидан намуналар ўқиб бердилар. Ўз навбатида ёшлар ҳам завқланиб, ўзлари севган ижодкорлар қаламига мансуб бўлган шеърларини ёд айтдилар.
Дурунки маҳалласида грант лойиҳаси доирасида ташкил этилган ижодий учрашув ниҳоятда қизиқарли ўтди ва шеъриятга, адабиётга қизиқувчи ёшлар учун ҳақиқий маҳорат дарси бўлди.
М.Халиллаева.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
