ҚИЛИЧБОЙ ОВУЛИДАГИ 27-СОНЛИ МТТ ТАРБИЯЧИЛАРИ “БАЛЛИ, ҚИЗЛАР!” КЎРИК-ТАНЛОВИДА ФАОЛ ҚАТНАШИШДИ

Юртимизда Наврўзи олам шукуҳи кезаётган айни кунларда барча ҳудудларда тадбирлар ўтказилиб, байрам хуш кайфиятда кутиб олинмоқда. Овул ва маҳаллаларда сумалак сайиллари, корхона-ташкилотлар, таълим муассасаларида эса турли тадбирлар ташкил этилиб, ҳаммага байрамона кайфият улашилмоқда.

Қиличбой овулидаги 27-сонли мактабгача таълим ташкилотида ҳам баҳор байрамлари муносабати билан, шунингдек, юқори малакали тарбиячиларни аниқлаш ва рағбатлантириш, уларнинг педагогик маҳорати, ижодий қобилиятларини ривожлантириш, илғор тажрибаларини кенг оммалаштириш, касбий фаолиятда соғлом рақобат ҳамда ижодкорлик муҳитини яратиш мақсадида “Балли, қизлар!” кўрик-танлови ўтказилди. Наврўз байрами арафасида ўтказилган ушбу тадбирга фуқаролар йиғини масъуллари, овул фаоллари, ота-оналар ва шу ерда ишлаган, айни кунда нафақадаги онахонлар, тарбиячилар ташриф буюришди.

Тадбирни ташкилот директори Муҳаббат Раҳимбоева очиб берди ва меҳмонларни баҳор байрамлари билан қутлаб, танлов қатнашчиларига омад тилади. Шунингдек, ташкилотда узоқ йиллар мудиралик қилиб, айни пайтда қарилик гаштини сураётган Рўзика Асқарова, тарбиячи бўлиб ишлаган онахон Ойгул Юсупова ва бошқалар, овулнинг фаол онахонларидан Амина Юсуповалар ҳам сўзга чиқиб, барчани яқинлашиб келаётган Наврўзи олам билан табриклашди.

Ташкилот тарбиячилари ўртасида бўлиб ўтган ушбу кўрик-танловда тайёрлов гуруҳи тарбиячилари Малоҳат Ибодуллаева, Зиёда Давлетова, Гулзебо Қиличбекова, Лайло Атажоновалар, катта гуруҳ тарбиячилари Дилрабо Бозорбоева, Шаҳло Жумамуродовалар иштирок этишди. Танловда қатнашган тарбиячи-қизлар бешта шарт асосида ўз иқтидорларини, билимдонликлари, чаққонликлари ва эпчилликларини кўрсатишга ҳаракат қилишди. Танлов давомида қизлар шартларга кўра, саломлашиш одобини, савол-жавоблар асосида билимдонликлари, касбий маҳоратини, қўл ишлари, пазандаликлари ва истеъдодларини кўрсатишди.

Танловнинг биринчи шартига кўра тарбиячилар саломлашиш одобини талқин қилиб беришди ва таълим-тарбия жараёнида ёш авлодга энг аввало бу одобни сингдиришаётганини ифода этишди. Кейинги, савол-жавоб шарти давомида эса ташкилотда қўлланилаётган “Илк қадам” дастури ва бошқа таълим-тарбия усуллари хусусидаги билимдонликларини синовдан ўтказишди.

Баҳорий безак деб номланган шарт бўйича эса гулқоғозлардан турфа баҳорий гуллар, байрамларга табрикномалар, пластилиндан мультфильмлар қаҳрамонларини ясаб маҳоратларини кўрсатишди. Ўзлари ёқтирган салатларни тайёрлаш шарти бўйича эса турли кўклам салатларини тайёрлаб, пазандаликларини намойиш этишди. Эркин мавзу шарти давомида эса қизлар истеъдодли эканликларини ҳам кўрсатиб, қўшиқлар куйлашди, рақслар ижро этиб, тадбирга янада файз киритишди. Айниқса, маромига етказиб ижро этилган она алласи жуда таъсирли чиқди ва барчага манзур бўлди.

Қизларнинг ҳар бирининг чиқишлари ҳакамлар ҳайъати томонидан одилона баҳолаб борилди ва тайёрлов гуруҳи тарбиячиси Малоҳат Ибодуллаева кўрик-танловнинг мутлақ ғолиби деб топилиб, 1-ўрин берилди. Кўрик-танловда иштирок этган бошқа қизлар ҳам “Энг ижодкор тарбиячи”, “Энг ташаббускор тарбиячи”, “Энг эпчил тарбиячи”, “Энг зукко тарбиячи”, “Энг нафосатли тарбиячи” номинацияларига эга бўлишди.

Кўрик-танлов давомида Наврўз, кўклам, гўзал юрт мадҳига бағишлаб ижро этилган қўшиқлар, ўзбек миллий кийимларидаги болажонлар, атлас, адрас кўйлаклардаги жажжи қизалоқлар иштирокидаги ажойиб рақслар барчани янада хушнуд этди. Қизиқарли ўтган тадбир барчада катта таассурот қолдирди.

О.Худойберганова.