ҚИЛИЧБОЙЛИКЛАР НАВРЎЗ БАЙРАМИНИ КЎТАРИНКИ КАЙФИЯТДА НИШОНЛАШДИ

Наврўз – янгиланиш, яшариш айёми. Юртимизга баҳор фасли кириб келиши билан барча ҳудудларда, эл орасида Наврўз шукуҳи кеза бошлайди. Ҳар гал орзиқиб кутадиган ва катта хурсандчилик, шодиёна билан ўтказадиган Наврўз байрами ҳаёт абадийлиги, табиатнинг қудрати ва чексиз саховатининг, халқимизнинг кўп минг йиллик миллий қиёфаси, олижаноб урф-одатларимизнинг бетакрор ифодасидир.

Барча жойларда бўлгани каби Амударё туманида ҳам Наврўзи олам тантаналари кенг нишонланиб, байрам тадбирлари барчага кўтаринки кайфият бахш этди.

23 март куни туманнинг Қиличбой овулида ҳам “Олам нурга тўлсин сен билан, Наврўз!” шиори остида жўшқинлик билан ўтказилган байрам сайли кўнгилларга баҳорий илиқлик ва гўзаллик олиб кирди.

Байрам сайлида Ўзбекистон маҳаллалар уюшмаси туман бўлими бошлиғи Баҳром Қодиров, фуқаролар йиғини раиси вазифасини вақтинча бажарувчи Амина Юсупова ҳамда бошқа масъуллар, ҳудуддаги мактаблар, мактабгача таълим ташкилотлари жамоалари қатнашишди.

Сайилгоҳ байрам томоша қилиш учун келган овулдаги катта-ю кичик аҳоли, ёшлар, отахону-онахонлар билан тўлди. Азалий урф-одатларимизга мувофиқ сайилгоҳда дастурхонлар безатилиб, баҳорий таомлар, ширмой кулчалар-у патирлар, сумалак тортилди. Кўклам гўзаллигига мос атлас-у адрас кийган қизлар ўзбекона одатларга биноан келинсаломлар билан келганларни кутиб олдилар.

Сайилга келганлар мактаб ва мактабгача таълим ташкилотлари, кўчалар фаоллари томонидан ташкил этилган миллий таомлар кўргазмасини завқ билан томоша қилишди. Уларга миллий таомлар, Наврўзнинг шоҳ таоми – сумалаклар тортиқ қилинди.

Тадбирни очиб бериш учун сўзга чиққан Ўзбекистон маҳаллалар уюшмаси туман бўлими бошлиғи Баҳром Қодиров барча қиличбойликларни байрам билан табриклади ва байрам арафасида овул ҳудудида ҳар бир хонадон, кўчалар ободонлаштирилиб, кўчатлар ўтқазилгани, қишлоқ мутлақо янгича қиёфа касб этгани, беморлар, кўмакка муҳтожлар ҳолидан хабар олингани ҳақида сўзлади.

Шунингдек, сўзга чиққан бошқа масъуллар ҳам овул аҳлини байрам билан табриклади ва деҳқонлар эли бўлган Қиличбойнинг меҳнаткаш бободеҳқонлари юксак хирмон умидида аллақачон далага чиқиб, ишга киришгани, дастлабки қадалган уруғлар униб чиқа бошлаганини айтиб, барака тиладилар.

Шундан сўнг, овулдаги Қиличбой маданият маркази томонидан ҳудуддаги 15-, 83-, 69-сонли мактаблар ва 22-, 27-сонли мактабгача таълим ташкилотлари билан ҳамкорликда тайёрланган мусиқий дастур намойиш этилди. Дастур давомида турли халқ ва спорт ўйинлари, лапар-у айтишувлар, айниқса, боқий қадриятларимизни намойиш этишга кенг ўрин берилди.

Марказдаги бадиий ҳаваскорлик тўгараги аъзолари, мактаблар ўқувчилари, мактабгача таълим ташкилотлари тарбияланувчиларининг чиқишлари, ижро этилган халқ оғзаки ижоди термаларидан намуналар, она-Ватанни, тинчликни, обод ва озод юртимизни мадҳ этувчи куй-қўшиқлар барчага қувонч улашди. Дастурдан ўрин олган турли томошалар, спорт ўйинлари, миллий кураш ва арқон тортишиш ўйинлари ҳам барчага манзур бўлди.

Сайилда қатнашган қиличбойликлар мана шундай улкан шодиёналарга йўл очиб берган, элимизни тараққиётнинг ёрқин йўлига олиб чиққан истиқлолга шукроналар айтдилар. Бундай тантанавор кунларнинг бардавом бўлишини тилаб, дуога қўл очдилар.

“Олам нурга тўлсин сен билан, Наврўз!” шиори остида ўтказилиб, ҳар бир кишининг руҳиятини янгилаган шу кунги Наврўз сайли бутун овулга ўзгача тароват бахш этди.

О.Худойберганова.