“Ижтимоий ҳимоядан ижтимоий фаоллик сари!” лойиҳаси доирасида тадбир ўтказилди

5 апрель куни Ўзбекистон Халқ демократик партиясининг Амударё туман Кенгаши томонидан “Ижтимоий ҳимоядан – ижтимоий фаоллик сари!” лойиҳаси доирасида тадбир ўтказилди.

Тадбирда Ўзбекистон Халқ демократик партиясининг Амударё туман Кенгаши раиси Мақсуд Саъдуллаев, “Инсон” ижтимоий хизматлар маркази шўъба мудири Муроджон Болтаевлар сўзга чиқиб, инсон ва унинг манфаатлари устун саналган юртимизда амалга оширилаётган ижтимоий сиёсат замирида халқимиз турмуш  фаровонлигини юксалтириш, айниқса фуқароларни ҳар томонлама қўллаб-қувватлашдек олижаноб мақсадлар мужассам эканини таъкидладилар. Бу муҳим масалалар “Ўзбекистон-2030” стратегиясида ҳам ўз ифодасини топгани алоҳида қайд этилди.

Дарҳақиқат, юртимизда кейинги йилларда ижтимоий муомалаларни ўз вақтида ҳал қилиш, аҳоли учун муносиб турмуш шароитини яратишга бирламчи эътибор қаратиб келинмоқда. Айниқса ҳуқуқ ва имкониятлар тенглигини таъминлаш давлат сиёсатининг энг устувор йўналишларидан бирига айланди.

Хусусан, янги таҳрирдаги Конституциямизнинг 1-моддасида Ўзбекистон ижтимоий давлат экани белгилаб қуйилди. Эндиликда ёрдамга муҳтож аҳоли вакилларини ижтимоий ҳимоялаш тизими маҳалла даражасига туширилмоқда.

Жорий йилнинг 1 июнидан бошлаб ижтимоий ҳимояга муҳтож аҳолини аниқлаш тартиби ва улар билан ишлаш тизими ўзгаради. Бунда эҳтиёжманд тоифага киритилган аҳолининг айнан қандай ёрдамга муҳтожлиги аниқ белгилаб берилади. Муҳтожларнинг ҳар бири бўйича индивидуал ижтимоий хизматлар дастури бўлади. Бу борада ягона саволнома жорий қилинади. Хонадонга “маҳалла еттилиги”нинг қайси вакили киришидан қатъий назар, оиладаги муаммо ва имкониятлар аниқланиб, оиланинг “ижтимоий портрети” чизилади. Ёрдамдан сўнг хонадонда нима ўзгаргани мониторинг қилиб борилади.

Яна бир муҳим жиҳати шундан иборатки, маҳалладаги барча ижтимоий хизматларни босқичма-босқич ижтимоий хизмат кўрсатиш шартномаси орқали тақдим этиш йўлга қўйилади. Бунда хизмат кўрсатувчи ҳам, ёрдам олувчи ҳам ўзига мажбуриятлар олади.

Энди нафақа олувчилар рўйхатига, биринчи навбатда, ногиронлиги бор, ота-онаси йўқ, боқувчисини йўқотган, касаллиги ва бошқа сабабга кўра узоқ муддат ишлай олмайдиганларнинг оилалари киритилади. Бошқа фуқароларни “ижтимоий реестр”га киритишда уларнинг фақат даромади эмас, балки харажатлари ҳам баҳоланади.

Шу йил 1 октябрдан аҳолига кўрсатиладиган барча ижтимоий ёрдамлар “ижтимоий карта” орқали молиялаштирилади. Келгуси йилдан 40 та туманда реабилитация, соғломлаштириш ва ногиронлиги бўлган шахсларга қаровчиларни ўқитиш бўйича кўп тармоқли ижтимоий хизматлар марказлари ишга туширилади.

Тадбирда туман “Инсон” ижтимоий хизматлар марказининг шўъба мудири Муроджон Болтаев сўзга чиқиб, марказ ходимларининг ёлғиз қариялар ва ногиронлиги бўлган, ўзгалар ёрдамига муҳтож кишилар билан ишлашиш, қийин ҳаётий вазиятга тушиб қолган шахслар ва оилаларга ҳар томонлама ёрдам кўрсатиш ва одамларнинг оғир ижтимоий аҳволга тушиб қолишининг олдини олиш борасидаги ишлари ҳақида маълумотлар берди.

Мақсуд Саъдуллаев, Ўзбекистон Халқ демократик партиясининг Амударё туман Кенгаши раиси