“Ijtimoiy himoyadan ijtimoiy faollik sari!” loyihasi doirasida tadbir oʻtkazildi

5-aprel kuni Oʻzbekiston Xalq demokratik partiyasining Amudaryo tuman Kengashi tomonidan “Ijtimoiy himoyadan – ijtimoiy faollik sari!” loyihasi doirasida tadbir oʻtkazildi.

Tadbirda Oʻzbekiston Xalq demokratik partiyasining Amudaryo tuman Kengashi raisi Maqsud Saʼdullayev, “Inson” ijtimoiy xizmatlar markazi shoʻʼba mudiri Murodjon Boltayevlar soʻzga chiqib, inson va uning manfaatlari ustun sanalgan yurtimizda amalga oshirilayotgan ijtimoiy siyosat zamirida xalqimiz turmush  farovonligini yuksaltirish, ayniqsa fuqarolarni har tomonlama qoʻllab-quvvatlashdek olijanob maqsadlar mujassam ekanini taʼkidladilar. Bu muhim masalalar “Oʻzbekiston-2030” strategiyasida ham oʻz ifodasini topgani alohida qayd etildi.

Darhaqiqat, yurtimizda keyingi yillarda ijtimoiy muomalalarni oʻz vaqtida hal qilish, aholi uchun munosib turmush sharoitini yaratishga birlamchi eʼtibor qaratib kelinmoqda. Ayniqsa huquq va imkoniyatlar tengligini taʼminlash davlat siyosatining eng ustuvor yoʻnalishlaridan biriga aylandi.

Xususan, yangi tahrirdagi Konstitutsiyamizning 1-moddasida Oʻzbekiston ijtimoiy davlat ekani belgilab quyildi. Endilikda yordamga muhtoj aholi vakillarini ijtimoiy himoyalash tizimi mahalla darajasiga tushirilmoqda.

Joriy yilning 1-iyunidan boshlab ijtimoiy himoyaga muhtoj aholini aniqlash tartibi va ular bilan ishlash tizimi oʻzgaradi. Bunda ehtiyojmand toifaga kiritilgan aholining aynan qanday yordamga muhtojligi aniq belgilab beriladi. Muhtojlarning har biri boʻyicha individual ijtimoiy xizmatlar dasturi boʻladi. Bu borada yagona savolnoma joriy qilinadi. Xonadonga “mahalla yettiligi”ning qaysi vakili kirishidan qatʼiy nazar, oiladagi muammo va imkoniyatlar aniqlanib, oilaning “ijtimoiy portreti” chiziladi. Yordamdan soʻng xonadonda nima oʻzgargani monitoring qilib boriladi.

Yana bir muhim jihati shundan iboratki, mahalladagi barcha ijtimoiy xizmatlarni bosqichma-bosqich ijtimoiy xizmat koʻrsatish shartnomasi orqali taqdim etish yoʻlga qoʻyiladi. Bunda xizmat koʻrsatuvchi ham, yordam oluvchi ham oʻziga majburiyatlar oladi.

Endi nafaqa oluvchilar roʻyxatiga, birinchi navbatda, nogironligi bor, ota-onasi yoʻq, boquvchisini yoʻqotgan, kasalligi va boshqa sababga koʻra uzoq muddat ishlay olmaydiganlarning oilalari kiritiladi. Boshqa fuqarolarni “ijtimoiy reyestr”ga kiritishda ularning faqat daromadi emas, balki xarajatlari ham baholanadi.

Shu yil 1-oktyabrdan aholiga koʻrsatiladigan barcha ijtimoiy yordamlar “ijtimoiy karta” orqali moliyalashtiriladi. Kelgusi yildan 40 ta tumanda reabilitatsiya, sogʻlomlashtirish va nogironligi boʻlgan shaxslarga qarovchilarni oʻqitish boʻyicha koʻp tarmoqli ijtimoiy xizmatlar markazlari ishga tushiriladi.

Tadbirda tuman “Inson” ijtimoiy xizmatlar markazining shoʻʼba mudiri Murodjon Boltayev soʻzga chiqib, markaz xodimlarining yolgʻiz qariyalar va nogironligi boʻlgan, oʻzgalar yordamiga muhtoj kishilar bilan ishlashish, qiyin hayotiy vaziyatga tushib qolgan shaxslar va oilalarga har tomonlama yordam koʻrsatish va odamlarning ogʻir ijtimoiy ahvolga tushib qolishining oldini olish borasidagi ishlari haqida maʼlumotlar berdi.

Maqsud Saʼdullayev, Oʻzbekiston Xalq demokratik partiyasining Amudaryo tuman Kengashi raisi