Футбол ва мини футбол бўйича Давлат хавфсизлик хизмати кубоги мусобақаларига старт берилди
Маълумки, 2021 йилдан бошлаб маҳаллаларда 16-30 ёш тоифасидаги ўғил ва қизлар ўртасида ҳар йили анъанавий тарзда футбол ва мини футбол бўйича Давлат хавфсизлик хизмати кубоги мусобақалари кенг қамровда ўтказиб келинмоқда.
Футболни ривожлантириш бўйича амалга оширилаётган кенг кўламли ислоҳотларни энг қуйи тизимгача тушириш ҳамда маҳаллалардан бошлаб иқтидорли ёшларни саралаб олиш мақсадида ташкил қилинаётган мазкур мусобақаларда ҳар йили мамлакат бўйлаб юз минглаб ёшлар иштирок этиб, иқтидорларини намойиш қилмоқда ва саломатликларини мустаҳкамламоқда.
11 апрель куни Амударё туманида ҳам спортнинг футбол ва мини футбол турлари бўйича Давлат хавфсизлик хизмати кубоги мусобақаларига старт берилди.
Очилиш маросимида туман ҳокими, секторлар раҳбарлари, Давлат хавфсизлик хизмати туман бўлими масъуллари ҳамда жамоатчилик фаоллари иштирок этдилар.
Тадбирда сўзга чиққанлар мамлакатимизда ёшларни ҳар томонлама соғлом ва етук инсонлар қилиб тарбиялаш, уларни спортга кенг жалб қилиш орқали саломатликларини мустаҳкамлаш, бўш вақтларини мазмунли ўтказишга кўмаклашиш, шунингдек, маҳаллаларда спорт инфратузилмасини янада ривожлантириш мақсадида тизимли ишлар амалга оширилаётганини алоҳида қайд этдилар.
Маълумки, шу йил 20 март куни қабул қилинган Президент қарорида маҳалладаги ёшлар етакчисига маҳалла ёшларини оммавий ва профессионал футболга қизиқтириш, шунингдек, бу борада турли тарғибот-ташвиқот ишларини ташкил этиш, маҳаллаларда мавжуд бўлган футбол бўйича спорт иншоотлари ҳамда бошқа спорт майдончаларидан тизимли ва самарали фойдаланилишини ташкил этиш, маҳаллада футбол бўйича эркаклар ва аёлларнинг турли ёш тоифалари кесимидаги “маҳалла терма жамоа”ларини шакллантириш ҳамда уларни тайёрлашни ташкил этиш ва шу каби бошқа қўшимча вазифалар юкланган эди.
Президентимизнинг ушбу қарори билан маҳалла терма жамоаларининг 12-15 ёш тоифалари ўртасида икки босқичли “Маҳалла лигаси” ва 16-30 ёш тоифалари ўртасида уч босқичли Давлат хавфсизлик хизмати кубоги мусобақаларини ўтказиш тизими равишда йўлга қўйилди.
Анъанавий тарзда футбол ва мини футбол бўйича Давлат хавфсизлик хизмати кубоги мусобақалари ҳам маҳаллалардаги ёш иқтидорли футболчиларни аниқлаш ҳамда уларни профессионал футбол таълим муассасаларига йўналтириб бориш, маҳаллаларни спорт инвентарлари билан таъминлаш борасида муҳим восита бўлмоқда.
Мусобақа Низомига кўра футбол ва мини футбол бўйича саралаш ва сектор босқичларидан мувафаққиятли ўтган жамоалар туман босқичида ўзаро куч синашадилар. Маълумот ўрнида айтиш керакки, ўтган йили футбол бўйича мусобақаларнинг туман босқичида мутлоқ ғолибликни Тўлқин овули ёшлари, иккинчи ўринни куюк-кўпирлик ёшлар жамоаси ва учинчи ўринни Холимбег овули ёшлари эгаллашган эди.
Мини футбол бўйича эса Бўстон маҳалласи ёшлари фахрли биринчи ўринни, Хизир эли маҳалласи ёшлари иккинчи ўринни, Дарёбўйи маҳалласи ёшлари эса учинчи ўринни қўлга киритган эдилар.
Жамоалар бу йилги мусобақаларга алоҳида пухта тайёргарлик кўргани боис саралаш ва сектор босқичлариданоқ ўйинлар шиддатли тус олди. Бир неча ҳафта давом этадиган саралаш ва сектор босқичлари якунларига кўра май ойида мусобақаларнинг туман босқичи ўтказилади. Фурсатдан фойдаланиб, футбол ва мини футбол бўйича Давлат хавфсизлиги хизмати кубоги ўйинларида иштирок этаётган барча жамоаларга омад тилаймиз!
Ғ.Ешниёзов
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
