Futbol va mini futbol boʻyicha Davlat xavfsizlik xizmati kubogi musobaqalariga start berildi

Maʼlumki, 2021-yildan boshlab mahallalarda 16-30 yosh toifasidagi oʻgʻil va qizlar oʻrtasida har yili anʼanaviy tarzda futbol va mini futbol boʻyicha Davlat xavfsizlik xizmati kubogi musobaqalari keng qamrovda oʻtkazib kelinmoqda.

Futbolni rivojlantirish boʻyicha amalga oshirilayotgan keng koʻlamli islohotlarni eng quyi tizimgacha tushirish hamda mahallalardan boshlab iqtidorli yoshlarni saralab olish maqsadida tashkil qilinayotgan mazkur musobaqalarda har yili mamlakat boʻylab yuz minglab yoshlar ishtirok etib, iqtidorlarini namoyish qilmoqda va salomatliklarini mustahkamlamoqda.

11-aprel kuni Amudaryo tumanida ham sportning futbol va mini futbol turlari boʻyicha Davlat xavfsizlik xizmati kubogi musobaqalariga start berildi.

Ochilish marosimida tuman hokimi, sektorlar rahbarlari, Davlat xavfsizlik xizmati tuman boʻlimi masʼullari hamda jamoatchilik faollari ishtirok etdilar.

Tadbirda soʻzga chiqqanlar mamlakatimizda yoshlarni har tomonlama sogʻlom va yetuk insonlar qilib tarbiyalash, ularni sportga keng jalb qilish orqali salomatliklarini mustahkamlash, boʻsh vaqtlarini mazmunli oʻtkazishga koʻmaklashish, shuningdek, mahallalarda sport infratuzilmasini yanada rivojlantirish maqsadida tizimli ishlar amalga oshirilayotganini alohida qayd etdilar.

Maʼlumki, shu yil 20-mart kuni qabul qilingan Prezident qarorida mahalladagi yoshlar yetakchisiga mahalla yoshlarini ommaviy va professional futbolga qiziqtirish, shuningdek, bu borada turli targʻibot-tashviqot ishlarini tashkil etish, mahallalarda mavjud boʻlgan futbol boʻyicha sport inshootlari hamda boshqa sport maydonchalaridan tizimli va samarali foydalanilishini tashkil etish, mahallada futbol boʻyicha erkaklar va ayollarning turli yosh toifalari kesimidagi “mahalla terma jamoa”larini shakllantirish hamda ularni tayyorlashni tashkil etish va shu kabi boshqa qoʻshimcha vazifalar yuklangan edi.

Prezidentimizning ushbu qarori bilan mahalla terma jamoalarining 12-15 yosh toifalari oʻrtasida ikki bosqichli “Mahalla ligasi” va 16-30 yosh toifalari oʻrtasida uch bosqichli Davlat xavfsizlik xizmati kubogi musobaqalarini oʻtkazish tizimi ravishda yoʻlga qoʻyildi.

Anʼanaviy tarzda futbol va mini futbol boʻyicha Davlat xavfsizlik xizmati kubogi musobaqalari ham mahallalardagi yosh iqtidorli futbolchilarni aniqlash hamda ularni professional futbol taʼlim muassasalariga yoʻnaltirib borish, mahallalarni sport inventarlari bilan taʼminlash borasida muhim vosita boʻlmoqda.

Musobaqa Nizomiga koʻra futbol va mini futbol boʻyicha saralash va sektor bosqichlaridan muvafaqqiyatli oʻtgan jamoalar tuman bosqichida oʻzaro kuch sinashadilar. Maʼlumot oʻrnida aytish kerakki, oʻtgan yili futbol boʻyicha musobaqalarning tuman bosqichida mutloq gʻoliblikni Toʻlqin ovuli yoshlari, ikkinchi oʻrinni kuyuk-koʻpirlik yoshlar jamoasi va uchinchi oʻrinni Xolimbeg ovuli yoshlari egallashgan edi.

Mini futbol boʻyicha esa Boʻston mahallasi yoshlari faxrli birinchi oʻrinni, Xizir eli mahallasi yoshlari ikkinchi oʻrinni, Daryoboʻyi mahallasi yoshlari esa uchinchi oʻrinni qoʻlga kiritgan edilar.

Jamoalar bu yilgi musobaqalarga alohida puxta tayyorgarlik koʻrgani bois saralash va sektor bosqichlaridanoq oʻyinlar shiddatli tus oldi. Bir necha hafta davom etadigan saralash va sektor bosqichlari yakunlariga koʻra may oyida musobaqalarning tuman bosqichi oʻtkaziladi. Fursatdan foydalanib, futbol va mini futbol boʻyicha Davlat xavfsizligi xizmati kubogi oʻyinlarida ishtirok etayotgan barcha jamoalarga omad tilaymiz!

Gʻ.Yeshniyozov