Амударё тумани ҳокими кубоги учун кураш бўйича туман очиқ биринчилиги ўтказилди

Кураш – бу ўзбек халқининг қадимий миллий спорт тури бўлиб, унинг илдизлари камида уч ярим минг йиллик тарихга эга. Бу спорт тури адолатли ва ҳалол йўл билан мақсадга эришишни тарғиб қилади.

Мамлакатимиз мустақилликка эришганидан сўнг кураш миллий спорт тури мақомини олиб, унинг ривожланиши ва халқаро майдонга чиқишига катта эътибор қаратила бошланди. 1998 йилда Халқаро Кураш Ассоциацияси ташкил этилган бўлиб, ушбу спорт турининг қоидалари стандартлаштирилди ҳамда глобал миқёсда тарғиб қилина бошланди.

Курашнинг техникалари, анъаналари, қоидалари ва фалсафаси авлоддан-авлодга ўтиб келмоқда. Мана шу минг йиллик анъаналарни сақлаш ва ривожлантириш мақсадида кураш бўйича турли спорт мусобақалари, очиқ биринчиликлар, турнирлар ўтказиб келинмоқда. Амударё тумани ҳокими Собир Хўжаметов ташаббуси билан туман ҳокими кубоги учун Болалар ва ўсмирлар спорт мактабида ўтказилган очиқ биринчилик ҳам шулар жумласидандир.

Туманнинг Чордара маҳалласи ҳудудидаги спорт мактаби филиали иморатида ўтказилган туман очиқ биринчилиги мусобақалари кўплаб янги номларни кашф қилишда восита бўлди. Икки кун давомида ўтказилган мусобақаларда спортчилар турли вазн тоифасида ғолиблик учун курашдилар.

Ҳоким кубоги учун ўтказилган туман очиқ биринчилигида амударёлик полвонлардан ташқари Қорақалпоғистон Республикаси ва Хоразм вилоятининг турли ҳудудларидан келган спортчилар ҳам иштирок этди.

Мусобақаларнинг очилиш маросимида сўзга чиққанлар таъкидлаганларидек, спорт ёшларнинг жисмоний ва маънавий ривожланишида муҳим роль ўйнайди, уларнинг бўш вақтларини мазмунли ташкил этиш ва ёт ғоялардан асрашда асосий омил ҳисобланади. Спорт орқали ёшлар ўзларининг жисмоний кучларини ошириш билан бирга, жамоавий ишлаш, мақсад сари интилиш ва ўз-ўзини назорат қилиш каби муҳим кўникмаларни ҳам ривожлантирадилар. Шунингдек, спорт ёшларга ўзларининг энергияларини ижобий йўналишда сарфлашга ҳам ёрдам беради. Шу сабабли ҳам мамлакатимизда ёшларни спортга жалб қилиш ва уларнинг бўш вақтларини мазмунли ўтказишлари учун давлат томонидан турли дастурлар амалга оширилмоқда.

Айтиш жоизки, спортнинг ёшлар ҳаётидаги аҳамияти фақатгина уларнинг шахсий ривожланиши билан чекланмай, балки уларнинг ижтимоий муносабатларини ҳам яхшилашга хизмат қилади. Спорт мусобақалари ва машғулотлари орқали ёшлар бошқа тенгдошлари билан танишиб, дўстлашиш ва ўзаро ҳамкорлик қилиш имкониятларига эга бўладилар. Бу эса уларнинг ижтимоий алоқаларини кенгайтириш ва жамиятда ўз ўринларини топишларига ёрдам беради.

Бундан ташқари, спорт ёшларнинг жисмоний саломатлигини мустаҳкамлаш ва уларни турли касалликлардан ҳимоя қилишда ҳам катта аҳамиятга эга. Жисмоний фаоллик ёшларнинг иммун тизимини кучайтиради ва уларни стресс ва депрессия каби руҳий муаммолардан сақлайди. Энг муҳими, спорт ёшларга ўзларининг мақсадларига эришишда сабр-тоқат ва меҳнатсеварлик каби фазилатларни ривожлантиришга ёрдам беради. Спортдаги муваффақиятлари ва мағлубиятлари орқали ёшлар ҳаётдаги муҳим дарсларни ўрганадилар ва бу тажрибалар уларнинг келажакдаги ҳаётларида муҳим роль ўйнайди.

Туман ҳокими кубоги учун ўтказилган очиқ биринчилик ҳам мана шундай мақсаднинг рўёбга чиқишини кўзлаб амалга оширилган ижтимоий тадбирдир.

Очиқ биринчилик якунларига кўра ёшлар ўртасидаги барча вазн тоифаларида Амударё тумани БЎСМ спортчилари ғолиб бўлди. Жумладан, 55 килограмм вазн тоифасида Азамат Собиров, 60 килограмм вазн тоифасида Жавоҳир Бозорбоев, 71 килограмм вазн тоифасида Каромаддин Йўлдошевларга тенг келадиган полвон топилмади. Катталар ўртасида 60 килограмм вазн тоифасида нукуслик Парахат Ережепов, 66 килограмм вазн тоифасида амударёлик Сардор Оғабоев, 73 килограмм вазн тоифасида гурланлик Сирож Сапаримбетов, 81 килограмм вазн тоифасида ҳам гурланлик Иззат Раҳимбоев, 81 килограммдан ортиқ вазндаги курашчилар ўртасида эса амударёлик Самир Назарбоевлар ғолибликни қўлга киритди. Умумжамоа ҳисобида амударёлик полвонлар биринчи ўринни эгаллашди. 2-ўрин Нукус шаҳри жамоасига, 3-ўрин эса Гурлан тумани полвонларига насиб этди. Мусобақа ғолиблари ва фаол иштирокчиларга туман ҳокимлиги томонидан диплом ва эсдалик совғалари топширилди.

Чоршам Тажимуродов, туман БЎСМ директори