Амударё туман ихтисослаштирилган мактабига ўқишга марҳамат!

Президентимизнинг 2022 йил 14 апрель кунги фармони асосида Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги тизимида 2022-2023 ўқув йилидан бошлаб Амударё туман ихтисослаштирилган мактаби ўз иш фаолиятини бошлади. Ўтган қисқа фурсат ичида мактабимиз педагогик жамоанинг куч-ғайрати ҳамда билимга чанқоқ ўқувчиларнинг интилишлари туфайли қатор натижаларга эришди.

Мактабимизда аниқ ва табиий фанлар йўналишларида ўқувчиларга халқаро таълим стандартларига мос интерактив услублар асосида 28 нафар олий, 17 нафар биринчи ҳамда 16 нафар иккинчи тоифали ўқитувчилар дарс беради. 34 нафар ўқитувчиларимиз халқаро ва миллий сертификатларга эга.

Ўқувчиларимизнинг билимларини оширишда тажрибали ўқитувчиларнинг ўрни беқиёсдир. Улар нафақат билим бериш, балки ўқувчиларнинг шахсий ривожланиши ва мотивациясини оширишга ҳам катта эътибор қаратишади. Ўз соҳасининг етук билимдони бўлган педагогларимиз ўқувчиларга мураккаб мавзуларни тушунишда ёрдам беради, уларнинг фикрлаш қобилиятини ривожлантиради ва мустақил ишлаш кўникмаларини шакллантиради. Шунингдек, улар ўқувчиларнинг индивидуал хусусиятларини ҳисобга олиб, ҳар бир ўқувчига мос келадиган ўқитиш усулларини қўллайди. Бу эса ўқувчиларнинг билимларини мустаҳкамлаш ва уларнинг заиф томонларини аниқлаш ҳамда бартараф этишда муҳим роль ўйнайди.

Мана шундай фидойи устозларимизнинг саъй-ҳаракатлари билан ўтган ўқув йилида мактабимиз битирувчиларининг 85 фоизи талаба бўлди. Бу – катта кўрсаткич. Мактабни тамомлаган йили ўзлари истаган олий таълим даргоҳларига кира олмаган ўқувчилар ҳам бу йил албатта талаба бўлишларига ишонамиз.

Ўқувчиларимизнинг ютуқлари ҳақида тўхталар эканмиз, улар биргина жорий ўқув йилида асосий фанлар олимпиадасининг III босқичида 5та совринли ўрин эгалари бўлишганини, 2 нафари олимпиаданинг Республика босқичида иштирок этганини алоҳида таъкидлаш лозим. Қолаверса, STEAM фанлари олимпиадасида мактаб ўқувчилари жами 7та совринли ўринларни эгаллаб, уларнинг 4 нафари Республика босқичида иштирок этди. Шунингдек, қизлар ўртасида ташкил қилинган математика олимпиадасида ҳам 2 нафар ўқувчи Республика босқичида иштирок этиб, билимларини синовдан ўтказди.

Мактабнинг 11-синф ўқувчиси Ботиржон Камолов муддатидан олдин 4та халқаро олийгоҳга ўқишга қабул қилинди. Мактаб бўйича умумтаълим фанларидан сертификатларни қўлга киритган ўқувчилар сони эса 70 нафардан ортиқ. Бу каби ютуқлар мактабимиз рейтингини кўтариши билан бирга ушбу таълим даргоҳида келгусида туманимиз, Қорақалпоғистон ва Ўзбекистон миқёсида халқ хўжалигининг турли соҳаларида фаолият юритиб, давлат ва жамият ривожига ҳисса қўшадиган ёшлар камолга етаётганининг ёрқин далилидир.

Мактаб муҳити ўқувчиларнинг таълим олишида муҳим роль ўйнайди, чунки уларнинг академик ютуқлари ва шахсий ривожланишига катта таъсир кўрсатади.

Шу сабабли ҳам Амударё туман ихтисослаштирилган мактабида таълим сифатини ошириш ва ўқувчиларга замонавий билим бериш мақсадида барча шароитлар яратилган. Таълим жараёнида замонавий ўқув материаллари ва педагогик технологиялардан фойдаланилиб, ўқувчиларнинг ижодий ва танқидий фикрлаш қобилиятларини ривожлантиришга қаратилган дастурлар жорий этилмоқда.

Бундан ташқари, ўқитувчиларнинг малакасини ошириш ва уларга ўқувчилар билан ишлашда зарур бўлган ресурсларни тақдим этишга ҳам катта эътибор берилмоқда. Шунингдек, ўқувчиларнинг мактабдаги муҳитга мослашиши ва уларнинг ижтимоий ҳамда эмоционал фаровонлигини таъминлаш учун мактабда турли хил тўгараклар фаолияти йўлга қўйилган.

Мактабда 120 ўринли фаоллар зали, замонавий компьютерлар билан жиҳозланган 2та информатика хонаси, амалий машғулотлар ўтказишга мўлжалланган ва тўлиқ жиҳозланган кимё, биология, физика лаборатория хоналари мавжуд. Бу каби жиҳозланган хоналар ўқувчиларга амалий кўникмаларни ривожлантириш ва фанларни янада чуқурроқ ўрганиш имконини беради. Шунингдек, бу ўқувчиларнинг ижодий ва интеллектуал салоҳиятини оширишга ҳам хизмат қилади.

Таълим масканимизда келгуси 2024-2025 ўқув йили учун қабул жараёнига ҳам пухта тайёргарлик кўрилмоқда. Мактабнинг 5-синфига аниқ фанлар йўналиши бўйича, 7-синфига эса табиий фанлар йўналиши бўйича иқтидорли ўқувчилар тест синовлар асосида қабул қилинади.

Аниқ фанлар йўналишида математика ва мантиқий фикрлаш ҳамда инглиз тили, табиий фанлар йўналишида эса тегишли табиий фан ҳамда инглиз тили фанларидан тест синовлари ўтказилади. Белгиланган квота доирасида кириш имтиҳонлари натижаларига кўра энг юқори балл тўплаган ўқувчилар ўқишга қабул қилинади.

Ихтисослаштирилган мактабга ўқувчиларнинг қуйидаги ҳужжатлари онлайн шаклда Агентликнинг расмий веб-сайти орқали қабул қилинади:

- тегишли ўқув йили натижасига кўра баҳолар табелининг мактаб директори томонидан тасдиқланган нусхаси;

- охирги 2 ой давомида тушган фотосурати;

- туғилганлик ҳақида гувоҳномаси ва ота-онаси ёки қонуний вакилининг фуқаролик паспорти маълумотлари, боғланиш учун телефон рақамлари.

Туманимиздаги барча умумтаълим мактабларининг 4- ва 6-синфларини тамомлаётган, аниқ ва табиий фанларга қизиқувчи иқтидорли ўқувчиларни Амударё туман ихтисослаштирилган мактабига ўқишга таклиф қиламиз! Бунинг учун қабул жараёни бошлангач махсус веб-сайт – ariza.piima.uz орқали ҳужжатларингизни топширинг. Кириш имтиҳонлари натижасига кўра энг юқори балл тўплаган ўқувчилар белгиланган қабул квотаси доирасида баллар кетма-кетлигида ўқувчилар сафига қабул қилинади.

Таълим муассасасининг мақсади – кенг дунёқарашга эга бўлган лидер ёшларни тарбиялаш, уларга халқаро таълим стандартлари асосида билим бериш, ўз соҳасининг энг билимдон кадрлари бўлиб етишишларига имконият яратишдир.

Амударё туман ихтисослаштирилган мактаби – имкониятлар масканидир.

Отабек Йўлдошов, Амударё туман ихтисослаштирилган мактаби директори.